ᓄᓇᕗᑦ Nunavut ’99

ᐅᓪᓗᒥᐅᔪᖅ ᐅᐊᔭᓕᒃᑯᑦ ᑭᓯᐊᓂ ᓱᓇᑐᐃᓐᓇᐃᑦ ᐃᖏᕐᕋᓕᕐᒪᑕ.
ᐊᒻᒪᑦᑕᐅᖅ ᐃᓄᐃᑦ ᐆᒻᒪᔾᔪᑎᖃᕐᓂᖓᑦ ᐊᖑᓇᓱᖕᓂᒃᑯᑦ ᓄᓇᒋᔭᒥᖕᓂ.

monochrome photograph of truck and drying skins

ᐊᖑᓇᓱᖕᓂᒃᑯᑦ
ᐆᒻᒪᔾᔪᑎᖃᕐᓂᖅ

 

ᑎᑎᕋᖅᑐᖅ ᓕᐅᕆ ᓯᒻᓴᓐ

ᑕᐅᑐᕐᖑᐊᕐᓗᒍ ᒪᖃᐃᑎ ᐃᓄᒃ ᓄᓇᒥ ᓯᑯᒥᓐᓃᑦ ᑐᒃᑐᓕᐊᖅᓯᒪᔪᖅ ᓇᑦᑎᖅᓯᐅᖅᑐᕐᓐᓃᑦ ᐊᒡᓗᒥ. ᒪᖃᐃᑎ ᐃᓱᒪᒋᔭᓕᒃ ᐊᖑᓇᓱᒃᑕᓂ ᐱᐅᑐᐊᖅᐸᑦ ᓇᖕᒥᓂᕐᒥᓄᑦ ᓂᕆᐅᒋᓪᓗᓂᐅ ᐊᑲᐅᓂᖃᕐᓂᐊᕐᓂᖓ. ᑕᒪᐃᓐᓂ ᐊᑯᓂᒧᑦ ᖃᓂᑦᑐᒧᓪᓗ.

ᑕᐃᒪᓕ ᑕᐅᑐᕐᖑᐊᕐᓗᒍ ᐊᖑᑦ ᖃᑯᖅᑐᒥᒃ ᐅᕕᓂᕈᖅᓯᒪᔪᖅ ᕿᒥᕐᕈᔪᖅ ᑮᓇᐅᔭᓕᐅᖅᑕᐅᔪᑦ ᓄᐊᑕᐅᔾᔪᑎᖏᑕ ᑕᑯᓐᓇᕐᕕᒃᓴᐅᔾᔪᑎᖏᓐᓂᒃ. ᐅᔾᔨᕆᔭᖃᖅᖢᓂ ᑮᓇᐅᔭᐃᑦ ᖁᒻᒧᒃᐸᓪᓕᐊᓂᖏᑦ ᐊᒻᒪᓗ ᑲᑕᒃᐸᓪᓕᐊᓂᖏᑦ, ᓯᓚᕐᔪᐊᒥ ᐊᑭᐊᓃᑦᑐᑦ ᑕᕆᐅᑉ. ᐊᒻᒪᓗ ᖃᓄᖅ ᐃᓅᓯᖓᓄᑦ ᐊᒃᑐᖅᑕᐅᓂᖃᕋᔭᕐᒪᖕᒑᑦ. ᑖᒃᑯᐊᒃ ᐃᓅᓯᕆᔭᐅᔪᒃ ᐊᔾᔨᒌᙱᓗᐊᕐᓂᖃᖅᐸᒃ? ᐃᒻᒪᖄ ᐋᒃᑲ. ᑕᒪᒃᑭᖕᓂ ᐃᓅᔪᖃᕈᓐᓇᖅᐸ? ᐊᑲᐅᓂᖅᓴᐅᔪᖅ, ᐃᖑᓇᔭᖅᐸᑦ. ᐅᓪᓗᒥᐅᔪᖅ ᐅᐊᔭᓕᒃᑯᑦ ᑭᓯᐊᓂ ᓱᓇᑐᐃᓐᓇᐃᑦ ᐃᖏᕐᕋᓕᕐᒪᑕ. ᐊᒻᒪᑦᑕᐅᖅ ᐃᓄᐃᑦ ᐆᒻᒪᔾᔪᑎᖃᕐᓂᖓᑦ ᐊᖑᓇᓱᖕᓂᒃᑯᑦ ᓄᓇᒋᔭᒥᖕᓂ.

ᐊᖑᓇᓱᖕᓂᒃᑯᑦ ᐆᒻᒪᔾᔪᑎᖃᕐᓂᖅ ᖃᐅᔨᓴᖅᑕᐅᔪᓐᓇᙱᑦᑐᖅ ᑲᓇᑕᐅᑉ ᑮᓇᐅᔭᖁᑎᓗᒃᑖᖏᑎᑐᑦ ᓇᓗᓇᐃᔭᖅᑕᐅᓂᖓᑎᑐᑦ, ᑭᓯᐊᓂᓕ ᐊᑭᖃᕋᔭᕐᓂᖏᑦ ᓂᐅᕕᐊᒃᓴᐅᓇᔭᖅᐸᑕ ᓂᕿᒋᔭᐅᔪᑦ ᐊᖑᓇᓱᖕᓂᒃᑯᑦ ᐊᑭᑐᔫᓇᔭᕐᒪᑕ. ᐊᑭᓕᖅᑕᐅᒋᐊᖃᕋᔭᖅᐸᑕ ᓂᕿᒋᔭᐅᓗᒃᑖᖅᑐᑦ ᓂᕿᑐᐃᓐᓇᕆᔭᐅᔪᑦ ᓄᓇᕗᒥ ᖃᓂᒋᔭᖓᓂ ᐃᒪᓐᓇ ᐊᑭᖃᖅᑰᕋᔭᖅᑐᑦ $30 ᒥᓕᐊᓐᓂᒃ. ᐅᕝᕙᓐᓃᑦ ᓇᓕᒧᒐᔭᖅᑐᑦ ᐊᑭᒋᔭᐅᓇᔭᖅᑐᓂᒃ ᑲᓇᑕᐅᑉ ᓄᓇᖁᑎᒋᓐᓂᕐᖕᒑᖅᑐᓂᒃ ᖃᓐᓗᓈᑦ ᓄᓇᖓᓐᓂᑦ. ᐊᒻᒪᑦᑕᐅᖅ, ᐃᓱᒪᒋᔭᐅᔭᕆᐊᓕᒃ ᓄᓇᒥᐅᑕᐃᑦ ᓂᕿᒋᔭᐅᔪᑦ ᓂᕿᑦᑎᐊᕙᐅᓂᖅᓴᐅᓂᖏᑦ ᓂᐅᕕᖅᑕᐅᔪᓂᑦ.

ᓴᐃᕌ ᑯᓄᒃ ᐊᒻᒪ ᑯᕆᔅᑏᓇ ᓱᐃᓇᕐ ᖁᕕᐊᓲᑎᖃᕐᐳᑦ ᐱᕈᕐᐸᓪᓕᐊᔪᒥ ᕿᓯᓕᕆᓂᕐᒥᓐ ᓄᓇᕗᒻᒥ

ᓱᓇᑐᐃᓐᓇᕐᓂᒃ ᐊᑐᕈᑎᖃᕐᓂᕆᔭᖏᑦ ᐊᖑᓇᓱᒃᖢᑎᒃ ᐱᒋᔭᐅᓱᖅᑐᑦ ᓄᓇᕗᒥ ᓴᓇᐅᒐᕐᓂᕐᒧᑦ ᐊᒻᒪᓗ ᐊᒡᒐᖕᒧᑦ ᓴᓇᓯᒪᔪᓂᒃ ᐃᓚᒋᔭᖃᖅᐸᖕᓂᖓ ᐃᑲᔪᖅᑕᐅᕐᔪᐊᕈᑎᖃᕐᒥᔪᖅ. ᑐᒃᑐᐃᑦ ᓇᒡᔪᖏᑦ ᓴᓇᕐᖑᐊᖅᑕᐅᕙᒃᖢᑎᒃ, ᑑᒐᓕᖕᓂᓪᓗ ᐊᒻᒪᓗ ᐊᐃᕖᑦ ᑑᒐᖏᓐᓂᒃ ᓴᓇᕐᖑᐊᒐᓕᐅᖅᑕᐅᓪᓗᑎᒃ ᐱᐅᓴᕈᑎᓕᐅᖅᑕᐅᓪᓗᑎᒡᓗ. ᓇᑦᓰᓪᓗ ᐊᒥᖏᑦ ᐊᑐᖅᑕᐅᓪᓗᑎᒃ ᓂᕕᖓᐅᔭᓄᑦ ᐊᓐᓄᕌᓄᑦ ᒥᑭᔪᓄᑦ ᐱᕐᖑᐊᓄᑦ. ᒫᓐᓇᐅᔪᖅ ᓄᓇᕗᑦ ᓴᓇᕐᖑᐊᕐᓂᖏᑕ ᐊᑭᒋᕙᒃᑕᖏᑦ ᑲᑕᒃᓯᒪᔫᒐᓗᐊᑦ, ᑭᓯᐊᓂᓕ ᐊᒥᓱᒻᒪᕆᖕᓂᒃ ᒥᓕᐊᓐᓂᒃ ᑮᓇᐅᔭᓂᒃ ᑐᕌᖓᓂᖃᖅᑐᑦ ᐊᕐᕌᒍᒥ ᐊᑕᐅᓯᕐᒥ ᐃᓄᖕᓄᑦ.

ᐃᖅᑲᐅᒪᔭᐅᒋᐊᖃᕐᒥᔪᖅ, ᐊᒻᒪ ᓱᓕ, ᐊᓐᓄᕌᑦ ᓴᓇᔭᐅᕙᒃᑐᑦ ᐆᒪᔪᐃᑦ ᐊᒥᖏᓐᓂᑦ ᐃᓇᖏᖅᑕᐅᒃᐸᑕ ᐊᑭᑐᒐᔭᕐᒥᔪᑦ ᐊᒻᒪᓗ ᐊᑲᐅᔾᔪᑎᖃᖅᖢᑎᒃ ᐊᓐᓇᐅᒪᒍᓐᓇᕐᓂᕐᒧᑦ. ᐊᔾᔨᖃᙱᒻᒪᑦ ᑐᒃᑐᐃᑦ ᐊᒥᖏᑕ ᐅᖅᑯᓂᖓᓂᒃ ᐊᑐᖅᑕᐅᔪᓐᓇᖅᑐᒥᒃ ᐊᓐᓄᕌᕆᔭᐅᓗᓂ.

ᑭᖑᓪᓖᑦᑐᒥᒃ, ᐆᒪᔪᖅᓯᐅᖃᑦᑕᕐᓂᕐᒧᑦ ᑐᑭᖃᕐᒥᔪᖅ ᑮᓇᐅᔭᖃᖃᑦᑕᕈᓐᓇᕐᓂᕐᒧᑦ. ᐊᖑᓇᓱᖕᓂᒃᑯᑦ ᑮᓇᐅᔭᓕᐅᕈᑕᐅᓱᖅᑐᑦ ᓇᑦᓰᑦ ᐊᒥᖏᑦ ᓂᐅᕕᐊᒃᓴᐅᓂᖏᑎᒍᑦ ᓄᓇᓕᖕᓂ ᐱᔭᐅᔪᓂᒃ ᐊᖑᓇᓱᖕᓂᒃᑯᑦ. ᐊᒻᒪᓗ ᐃᖃᓗᒃᐲᑦ ᓂᐅᕕᐊᒃᓴᐅᕙᖕᓂᖏᓐᓄᑦ, ᑐᒃᑐᐃᑦ ᐊᓯᖏᓐᓂᒡᓗ ᓂᕿᒋᔭᐅᕙᒃᑐᓂᒃ. ᐃᓚᖓᑕ ᑮᓇᐅᔭᓕᐅᖅᑕᐅᔪᑉ ᐊᑐᖅᑕᐅᑦᑕᖅᑦᑐᑦ ᒐᓴᓖᒥᒃ ᓂᐅᕕᕐᓂᕐᒧᑦ, ᐊᖑᓇᓱᒍᑎᓄᑦ ᐊᒻᒪᓗ ᑕᖁᐊᓄᑦ ᓯᕗᓂᕐᒥ ᐊᖑᓇᓱᒡᓗᓂ ᐊᑐᖅᑕᐅᓛᖅᑐᓄᑦ. 500 ᐸᐅᓐᔅᓂᒃ ᐅᖁᒪᐃᓐᓂᖃᖅᑐᒥᒃ ᐃᖃᓗᒃᑐᖃᕋᔭᖅᐸᑦ ᐊᒻᒪᓗ ᐅᓯᔭᐅᓗᑎᒃ ᖃᒧᓯᒃᑯᑦ ᓂᐅᓂᐊᖅᑕᐅᓗᑎᒃ (ᕿᒻᒥᒃᑯᑦ ᖃᒧᑕᐅᔭᒃᑯᓪᓐᓃᑦ), ᒪᖃᐃᑎ ᓂᐅᕕᐊᒃᓴᖃᕈᓐᓇᕋᔭᖅᑐᖅ 100 ᐸᐅᔅᓂᒃ ᐅᖁᒪᐃᓐᓂᓕᖕᓂᒃ, ᐃᒪᓐᓇᖃᐃ ᐊᑭᖃᖅᑎᑕᐅᕐᖑᐊᕐᓗᑎᒃ $1.75-ᓂᒃ ᐊᑕᐅᓯᕐᒧᑦ ᐸᐅᔅᒧᑦ. ᑖᒪᓐᓇ ᑮᓇᐅᔭᓕᐊᕆᔭᐅᔪᖅ $175 ᐊᑭᓖᒍᑕᐅᒍᓐᓇᕋᔭᖅᑐᖅ ᐊᓯᖏᓐᓂᒃ ᐅᓯᔭᒃᓴᓂᒃ ᐱᓇᓱᒃᑕᐅᔪᓂᒃ ᐅᖁᒪᐃᓐᓂᓕᖕᓂᒃ 400 ᐸᐅᓐᔅᑲᓐᓂᕐᓂᒃ ᓱᓕ. ᑭᓯᐊᓂᓕ 400 ᐸᐅᓐᔅᖑᔪᑦ ᐃᓇᖏᖅᑕᐅᓇᔭᖅᐸᑦ ᐃᖃᓗᐃᑦ ᐊᑭᓪᓚᕆᖓᑦ ᐃᒪᐃᒃᑲᔭᖅᑐᖅ $2,000-ᓂᒃ ᓂᕿᒃᓴᕆᔭᐅᓇᔭᖅᑐᓂᒃ. ᓵᖑᔪᒥ ᓂᕿᒋᔭᐅᒍᓂ ᑕᐃᒪᓐᓇ ᐊᑭᓪᓚᕆᔭᖃᕋᔭᖅᑐᖅ (ᕼᐋᒻᐴᒐ ᐊᕿᒡᒋᐅᔭᕐᓐᓃᑦ ᑯᐊᐸᒥᑦ ᓂᐅᕕᖅᑕᐅᓇᔭᖅᑐᖅ ᐊᑭᓖᔭᐅᑦᑕᕋᔭᖅᑐᖅ ᒪᖃᐃᑎᒧᑦ ᓂᐅᕕᖅᑕᐅᒍᓂ ᐃᒪᓐᓇ $5-ᓂᒃ ᐸᐅᓐᔅᓄᑦ ᐊᑕᐅᓯᕐᒧᑦ). ᑕᒪᓐᓇ ᐃᓕᑕᕆᔭᐅᓂᖃᕐᓂᖓ ᐱᔾᔪᑎᒋᓪᓗᒍ ᓄᓇᕗᑖᕈᑦ ᐊᖏᕈᑕᐅᓚᐅᖅᑐᖅ ᑐᙵᓂᕆᔭᐅᖕᒪᑦ ᐋᖅᑮᒍᑕᐅᓪᓗᓂ ᐊᐅᓚᑦᑎᔨᐅᖃᑕᐅᒐᔭᖅᑐᓂᒃ ᑎᒥᖁᑎᐅᔪᓂᒃ. ᓄᓇᕗᒥ ᐊᖏᕈᑕᐅᓚᐅᖅᑐᖅ ᐊᒻᒪᓗ ᒐᕙᒪᒋᔭᐅᔪᖅ ᐃᑲᔪᐃᒐᔪᖅ ᓄᓇᓕᒐᓛᖃᖅᑐᓂᒃ, ᒪᖃᐃᑎᑦ ᐃᑲᔪᖅᑕᐅᕙᖕᓂᖏᓐᓂᒃ, ᐃᓄᑐᖃᐃᑦ ᒪᒃᑯᒃᑐᐃᓪᓗ ᑲᑎᒪᒍᓐᓇᖃᑦᑕᕐᓂᖏᓐᓂᒃ, ᑮᓇᐅᔭᓕᐅᖅᑕᐅᕙᒃᑐᑦ ᐊᓯᔾᔨᒋᐊᖅᑕᐅᓂᖏᓐᓂᒃ, ᐊᒻᒪᓗ ᐊᒥᓱᓂᒃ ᐊᓯᖏᓐᓂᒃ. ᑲᒪᒋᔭᐅᑦᑎᐊᖅᑐᒃᑯᑦ ᒪᖃᐃᑦᑐᓂᒃ ᐊᐅᓚᓐᓂᖃᕐᓂᖅ ᑕᒪᒃᑯᐊ ᓯᕗᓪᓕᐅᑎᔭᐅᖏᓐᓇᖅᑎᓪᓗᒋᑦ ᐆᒪᔪᖅᓯᐅᕐᓂᐅᔪᑦ ᐸᐸᑕᐅᒋᐊᖃᖅᑐᖃᓕᕌᖓᑦ. ᓯᕗᓪᓕᐅᑎᔭᐅᓗᓂ ᑮᓇᐅᔭᓕᐅᕐᓂᕐᒧᑦ ᐅᕝᕙᓐᓃᑦ ᐳᓚᕋᖅᑎᔪᑦ ᐱᔭᐅᔪᓐᓇᖅᑎᑕᐅᓂᖏᓐᓄᑦ.

ᐊᖑᓇᓱᖕᓂᒃᑯᑦ ᐱᓇᓱᒍᓐᓇᕐᕕᖃᕐᓂᖅ ᐊᑐᓪᓚᕆᖕᓂᖓ ᓇᓗᓇᐃᖅᑕᐅᔪᓐᓇᖅᑐᖅ ᓇᑦᓰᑦ ᕿᓯᖏᑕ ᐊᑭᖏᑕ ᑲᑕᓚᐅᖅᑎᓪᓗᒋᑦ 1970ᑦ ᐊᑐᓕᖅᑎᓪᓗᒋᑦ ᕿᑭᖅᑖᑉ ᒥᒃᓵᓐᓂ. ᐃᓅᓯᕐᒧᑦ ᐊᑕᓂᖃᕐᓂᖓ ᖃᐅᔨᔭᐅᓚᐅᖅᑐᖅ. ᐊᒥᓱᑦ ᐆᒪᔪᓂᒃ ᓯᕐᓈᖅᑎᑦ ᑐᑭᓯᓯᒪᙱᒻᒪᑕ ᑲᑕᒃᑎᑎᓚᐅᕐᓂᕐᒥᖕᓂᒃ ᓇᑦᓰᑦ ᕿᓯᖏᑕ ᐊᑭᖏᓐᓂᒃ ᐃᓅᓯᖏᓐᓂᒡᓗ ᐊᔪᖅᓴᖅᑎᑎᓚᐅᕐᓂᖏᓐᓂᒃ ᐃᓄᖕᓄᑦ. ᐃᓄᐃᑦ ᐊᒃᑐᐃᓂᖃᑦᑎᐊᖅᑎᓪᓗᒋᑦ ᐊᕙᑎᒥᖕᓄᑦ ᒪᓕᒃᑕᖃᖅᖢᑎᒃ ᐃᓕᖅᑯᓯᕐᒥᖕᓂᒃ ᐊᒻᒪᓗ ᐸᐸᑦᓯᒍᓐᓇᑦᑎᐊᖅᖢᑎᒃ ᐆᒪᔪᓂᒃ ᐊᑐᕆᐊᖃᖅᐸᒃᑕᕐᒥᖕᓂᒃ. ᐃᓄᐃᑦ ᐃᓚᒋᔭᐅᓪᓗᑎᒃ ᐸᐸᑕᐅᔭᕆᐊᖃᕐᓂᖏᑦ. ᐊᖑᓇᓱᖃᑦᑕᕐᓂᖅ ᐊᒃᑐᐊᒍᑕᐅᖕᒪᑦ ᐃᓄᖕᓄᑦ ᐊᕙᑎᒥᖕᓄᑦ, ᐊᒻᒪᓗ ᓇᒥᑐᐃᓐᓇᖅ ᓯᓚᕐᔪᐊᒥ ᑐᑭᖃᖅᑐᖅ “ᐊᑐᖅᑕᐅᑦᑎᐊᖅᐸᑦ ᐸᐸᑕᐅᓂᖃᖅᑐᖅ.”

ᐊᖑᓇᓱᖕᓂᒃᑯᑦ ᐆᒻᒪᔾᔪᑎᖃᕐᓂᖅ ᐊᑐᖅᑕᐅᒐᔪᙱᓕᕐᒪᑦ. ᐊᖑᓇᓱᒃᐸᕐᓂᖅ ᓂᕿᖃᕈᑕᐅᑦᑕᕐᒪᑦ, ᐊᒻᒪᓗ ᑐᑭᖃᕆᓪᓗᓂ ᓄᓇᒥᒃ ᑲᒪᑦᑎᐊᕐᓂᕐᒥᒃ. ᐊᒻᒪᓗ ᐃᓅᓯᖃᑎᒌᑦᑎᐊᕐᓂᕐᒥᒃ ᐃᓚᖁᑎᒋᔭᒥᒃ ᐊᒻᒪᓗ ᓄᓇᓕᖁᑎᒋᔭᒥᒃ. ᐊᖑᓇᓱᖃᑦᑕᕐᓂᒃᑯᑦ ᐆᒻᒪᔾᔪᑎᖃᕐᓂᖅ ᖃᐅᔨᒪᔭᐅᑐᖃᖅᑐᓂᒃ ᐃᓕᕝᕕᒃᓴᐅᒍᓐᓇᕐᒥᔪᖅ: ᑕᐃᑦᓱᒪᓂ ᐃᓄᐃᑦ ᖃᐅᔨᒪᔭᑐᖃᖏᑦ ᖃᐅᔨᒪᔭᐅᑦᑕᕈᒪᓚᐅᙱᑦᑐᑦ ᐊᑐᙱᓐᓇᓱᒋᔭᐅᓪᓗᑎᒃ. ᒫᓐᓇᐅᔪᖅ ᐃᓕᑕᕆᔭᐅᓯᒪᓕᖅᑐᖅ ᓄᓇᖃᖅᑳᖅᑐᓄᑐᐃᓐᓇᐅᙱᑦᑐᖅ ᑭᓯᐊᓂᓕ ᓄᓇᖃᖅᑳᖅᑑᙱᑦᑐᓄᓪᓗ ᐊᑐᕈᓐᓇᕐᓂᖓ. ᖃᓄᖅ ᐃᓅᓯᖅ ᐃᓕᖓᓂᖃᕐᒪᖕᒑᑦ ᓄᓇᐃᓐᓇᕐᒥ ᑕᕆᐅᒥᓐᓃᑦ.

ᓄᓇᕗᑦ ᓴᓇᕕᒡᔪᐊᕐᕕᓕᖕᓂᒃ ᓄᓇᒃᑰᔫᕈᑎᓕᐅᑎᕋᓗᖕᓂᒃ ᐱᑕᖃᖅᓯᒪᓂᐊᙱᑦᑐᖅ ᐊᒻᒪᓗ ᐊᓯᖏᓐᓂᒃ ᐃᖅᑲᓇᐃᔭᕐᕕᒡᔪᐊᓂᒃ ᓴᓇᕕᖕᓂᒃ ᓱᓇᑐᐃᓐᓇᓂᒃ. ᑭᓯᐊᓂᓕ ᑖᓐᓇᑐᐊᖑᑐᐃᓐᓇᕆᐊᓕᒃ ᓯᓚᕐᔪᐊᒥ ᐃᓄᖏᓐᓂᒃ ᒪᕐᕉᖕᓂᒃ ᐱᔪᓐᓇᖅᑐᓂᒃ ᐊᑐᖅᑕᐅᑐᖃᖅᑐᓂᒃ ᓄᑖᓂᒡᓗ, “ᓄᓇᒥᒃ” ᐃᓐᑐᓂᑦᒥᒡᓗ.

Notes about the transcoding and transcription of this article.