ᓄᓇᕗᑦ Nunavut ’99

“ᓄᓇᖃᖅᑳᖅᑐᑦ ᓄᓇᕐᔪᐊᓕᒫᒻᒥ ᓇᓂᑐᐃᓐᓇᖅ . . . ᖃᐅᔨᔪᒪᓚᐅᕐᐳᑦ ᖃᓄᐋᓗᒃ ᒐᕙᒪᑐᖃᒃᑯᑦ ᐱᕝᕕᒋᔪᓐᓇᓚᐅᕆᐊᒃᓴᑦᑎᓐᓂᑦ ᓄᓇᒥᓐ ᐊᓯᕗᑦ ᓄᓇᖃᖅᑳᖅᑐᑦ ᑕᐃᒪᓐᓇ ᐱᔪᓐᓇᕐᐸᖏᑎᓪᓗᒋᑦ ᐊᔩᖃᑎᒌᖕᓂᒃᑯᑦ.”
— ᐹᓪ ᖁᐊᓴ, ᐊᖓᔪᖄᖑᓪᓗᓂ ᐊᔩᖃᑕᐅᓂᑯ ᐃᓄᖕᓄ ᓄᓇᑖᕋᓱᖕᓂᕐᒧᓐ

outdoor scene

ᐊᑎᖅ ᖃᓄᐃᔾᔪᑕᐅᖕᒪᓐ?

ᐊᑏᑦ, ᐊᒻᒪ ᐱᓕᕆᓂᐅᔪᑦ, ᓇᓗᓇᐃᒃᑯᑕᐅᕗᑦ ᐊᖅᑯᑎᒧᓐ ᓄᓇᕗᑦᒧᓐ

ᑎᑎᕋᖅᑐᖅ ᐋᓐ ᒥᑭᔾᔪᒃ ᕼᐋᓐᓴᓐ

ᑐᑭᒋᔭᖓ ᑎᑎᕋᖅᑕᐅᓯᒪᓂᖓᒍᑦ ᓄᓇᕗᑦ ᑐᑭᑐᐃᓐᓇᓕᒃ “ᐅᕙᒍᑦ ᓄᓇᕗᑦ.” ᐃᒃᐱᒋᓂᒃᑯᑦ, ᐃᓅᓯᒃᑯᑦ, ᑕᕐᓂᒃᑯᑦ ᑐᑭᖃᕐᓂᖅᓴᐅᔪᖅ ᓄᓇᕗᑦ ᐅᕝᕙᓐᓃᑦ ᓄᓇᕗᓐ “ᐅᕙᒍᑦ ᐊᖏᕐᕋᕆᓪᓗᒍ ᓄᓇᖁᑎᒋᔭᕗᑦ.” ᑕᐃᒋᐊᖃᙱᑕᕗᑦ ᑐᑭᖃᖅᑐᖅ “ᐊᖏᕐᕋᕆᒐᑦᑎᒍ.” ᐃᓄᖕᓄᑦ ᐃᓚᖏᓐᓄᑦ ᑐᑭᓯᓯᒪᓂᖃᕐᓂᖅᓴᐅᔪᓄᑦ ᐅᖃᐅᓯᕐᒥᒃ, ᐅᓇ ᐅᖃᐅᓯᖅ ᓄᓇᕗᑦ ᑕᐃᔭᐅᔭᕌᖓᑦ, ᐅᖃᖅᑕᐅᒋᐊᖃᙱᑦᑐᒃᑯᑦ ᑐᑭᓯᓂᖃᕈᑕᐅᓱᖅᑐᖅ. ᐃᒪᓐᓇ “ᐅᓇ ᓄᓇ ᓄᓇᒋᔭᕗᑦ, ᐃᓱᒪᖅᓱᑦᑎᐊᖅᖢᑕ” ᐊᒻᒪᓗ ᐊᒃᓱᐊᓗᒃ ᖁᔭᓕᓂᖃᖅᑐᖅ ᑐᑭᖓ.

ᐊᒃᓱᕈᕐᓂᖃᖅᓯᒪᔪᒍᑦ ᐊᑯᓂᐅᙱᑦᑑᒐᓗᐊᖑᔪᒥ. ᒪᑯᓄᖓᓗ ᐊᓯᔾᔨᖅᑕᐅᓯᒪᓪᓗᑕ ᑎᑭᑦᑐᓄᑦ ᐊᕐᕕᕐᓂᐊᖅᑎᓄᑦ, ᐊᔪᕆᖅᓱᐃᔨᓄᑦ, ᓂᐅᕕᖅᑎᓄᑦ, ᐸᓖᓯᓄᑦ, ᐃᓕᓐᓂᐊᖅᑎᑎᔨᓄᑦ, ᖃᐅᔨᒪᔨᕐᔪᐊᓄᑦ, ᐊᒻᒪᓗ ᖃᓪᓗᓈᕐᖕᒑᖅᑐᓄᑦ ᒐᕙᒪᓕᕆᔨᓄᑦ. ᐊᒥᓱᑦ ᑖᒃᑯᐊ ᐱᑦᑎᐊᕈᒪᓪᓗᑎᑦ ᐃᖅᑲᓇᐃᔭᓚᐅᕋᓗᐊᖅᑐᑦ ᐊᒻᒪᓗ ᓯᕗᓪᓕᕆᔭᕗᑦ ᑐᕐᖓᓇᓚᐅᖅᖢᑎᒃ ᑎᑭᓕᓵᖅᑐᓄᑦ. ᐃᓕᖅᑯᓯᒥᖕᓂᒃ ᐊᑐᖅᖢᑎᒃ ᑐᕐᖓᓱᒃᑎᑎᓚᐅᕐᒪᑕ, ᐱᑦᑎᐊᕆᐊᖃᕐᓂᕐᒥᒃ ᐊᒻᒪᓗ ᑕᑯᔭᕆᐅᕐᓂᕐᒧᑦ. ᐃᓄᐃᑦ ᐅᓪᓗᒥᐅᔪᖅ ᑕᒪᒃᑭᖕᓂᒃ ᐱᐅᔪᓂᒃ ᐱᐅᙱᑦᑐᓂᒡᓗ ᑭᖑᓂᖃᖅᑎᑕᐅᓯᒪᓕᖅᑐᑦ.

ᐱᕈᓚᐅᖅᑐᖓ ᖃᐅᔨᒪᓪᓗᖓ ᐃᓅᒐᒪ. ᑭᖑᓂᐊᒍᑦ ᐃᓕᑎᑕᐅᓪᓗᖓ ᑕᐃᔭᐅᒐᒪ Eskimo-ᒥᒃ. ᐅᖃᐅᓯᐅᑉ ᐱᐅᙱᓐᓂᖓᓂᒃ ᐃᓱᒪᒋᓚᐅᙱᑕᕋᓕ. ᓲᖃᐃᒻᒪᓕ, ᐊᐅᓪᓚᖅᓯᒪᓕᕋᐃᒐᒪ ᓄᓇᕗᑦ ᓯᓚᑎᖓᓐᓄᑦ ᐅᖃᖅᐸᓚᐅᖅᑐᖓ ᐊᓕᐊᓇᐃᒍᓱᒃᖢᖓ “Eskimo-ᖑᔪᖓ.” ᐅᓪᓗᒥ, ᐅᑎᕐᒥᔪᖓ ᐃᓅᓂᕋᖅᖢᖓ.

ᑕᐃᑦᓱᒪᓂ, ᐃᓐᓇᑐᖃᐃᑦ ᐊᑦᑏᖃᑦᑕᓚᐅᖅᑐᑦ ᐃᓅᓕᓵᖅᑐᓂᒃ ᐃᓚᒋᔭᒥᖕᓂᒃ ᐅᕝᕙᓐᓃᑦ ᖃᓂᒋᔭᒥᖕᓂᒃ ᐃᓄᖕᓂᒃ ᐊᑦᑎᖅᖢᒋᑦ, ᐊᒻᒪᓗ ᐊᒥᓱᑦ ᐊᑎᑐᖃᕆᔭᐅᔪᑦ — ᐃᒪᓐᓇᑐᑦ ᐊᓂᖅᒥᐅᖅ, ᐊᓐᓄᒐᑯᓄ, ᐊᓐᓄᕌᖅ, ᐊᕐᓇᖅᑯᖅ, ᑭᒪᓗ, ᐊᐃᑏ, ᒫᑐ, ᖁᕕᐊᓇᑦᑐᑯᓗᒃ, ᒪᑭᕝᕕᒃ, ᔪᑕᐃ, ᐊᐃᐅᓛ, ᓲ, ᔪᒐᔪᒐᐅᓯᖅ, ᐊᕐᓇᖅᑯᐊᒃᓵᖅ, ᐊᖑᓯᒫᔪᖅ, ᕿᓚᕝᕙᖅ, ᓄᐃᔭᐅᑦ, ᐃᑭᓪᓗᐊᖅ, ᐊᒻᒪᓗ ᐊᓯᖏᑦ ᐊᒥᓱᒻᒪᕇᑦ. ᐊᔪᕆᖅᓱᐃᔨᑦ ᑎᑭᒻᒪᑕ, ᑕᒪᒃᑯᓂᖓ ᐊᑎᑐᖃᕐᓂᒃ ᑕᐃᓯᑦᑎᐊᕈᓐᓇᓚᐅᙱᑦᑐᑦ. ᐅᕙᑦᑎᓐᓂᒃ ᐊᑦᑏᑦᑕᓚᐅᕐᒪᑕ ᒪᒃᐱᕌᒥᖕᒑᖅᑐᒥᑦ (ᐃᔾᔪᔪᓂᑦ) — ᒪᑯᓂᖓ ᔪᐊᓇᓯ, John-ᒥᑦ, ᔩᒥᓯ, (James), ᐅᑎ (Ruth), ᒥᐊᓕ (Mary), ᓵᓚᒨᓂ (Solomon), ᓄᐊ, ᔫᓇ, ᐊᐃᐱᓕ (Abel), ᐃᓕᓴᐱ (Elizabeth), ᐊᒻᒪᓗ ᑕᐃᒪᓐᓇ ᐊᒥᓱᑦ ᓱᓕ. ᐅᕙᑦᑎᓐᓂ, ᐊᑎᑐᖃᕗᑦ ᐊᑐᖅᑕᓚᐅᖅᑕᕗᑦ. ᐸᖅᑎᑕᐅᒐᒪ, Annie-ᖑᓚᐅᖅᓯᒪᔪᖓ, ᑭᓯᐊᓂᓕ ᐊᖓᔪᖅᑳᓐᓄᑦ ᐃᓄᑐᖅᑲᓄᓪᓗ, ᐊᑎᖃᓚᐅᖅᑐᖓᓕ ᓗᑖᖅ, ᐱᓕᑕᖅ, ᐸᓪᓗᖅ, ᐅᕝᕙᓐᓃᑦ ᐃᓅᓯᖅ.

ID tagᑲᓇᑕᐅᑉ ᒐᕙᒪᒃᑯᖓᓐᓄᓪᓕ, ᑭᓯᐊᓂᓕ, Annie E7-121-ᖑᓚᐅᖅᓯᒪᔪᖓ! ᐊᕐᕌᒍᐃᑦ ᐱᒋᐊᓕᓵᖅᑎᓪᓗᒋᑦ 1940-ᓂ ᐃᓄᐃᑦ ᓈᓴᖅᑕᐅᒋᐊᖃᓚᐅᕐᒪᑕ ᐊᒻᒪᓗ ᓇᓗᓇᐃᔭᖅᑕᐅᓗᑎᒃ ᒐᕙᒪᒃᑯᓐᓄᑦ ᑎᑎᕋᖅᓯᒪᖁᑎᖏᓐᓄᑦ ᐊᖓᔪᖅᑳᕗᑦ ᑲᒪᔨᒋᔭᕗᓪᓕ ᓄᑕᕋᖅᓯᐅᑎᑖᖅᑕᖁᓪᓗᒋᑦ. ᕆ ᑐᑭᖃᖅᑎᑕᐅᓪᓗᓂ ᑲᓇᖕᓇᖅ ᐊᒻᒪᓗ ᐱ ᐱᖓᖕᓇᖅ. ᑐᑭᖃᖅᑎᑕᐅᓪᓗᓂ ᐅᐊᓕᓂᕐᒧᑦ. ᒥᑭᔪᕈᓗᖕᓂᒃ ᐊᖕᒪᓗᑭᑖᖑᔪᓂᑦ ᑐᓂᔭᐅᓚᐅᖅᑐᒍᑦ ᐅᔭᒥᒃᓴᑦᑎᓐᓂᒃ ᓴᕐᖏᔪᒥᒃ ᐱᑐᒍᑎᖃᖅᖢᑎᒃ ᓂᕕᖓᑖᖑᓇᔭᖅᑐᒥᒃ, ᑲᔪᖅᖢᓂ ᕿᕐᓂᖅᑐᓂᒃ ᑎᑎᕋᖃᐅᖅᖢᓂ. ᖃᐅᔨᓕᑕᐃᓐᓇᓚᐅᖅᑐᖓ ᑭᖑᓪᓕᕐᒥᒃ ᐊᑎᖃᖅᐸᒃᑐᓂᒃ ᐊᐅᓪᓚᕋᒪ ᑐᕌᓐᑐᒧᑦ ᐱᒋᐊᓕᓵᖅᑎᓪᓗᒋᑦ ᐊᕐᕌᒍᑦ 1960-ᖑᔪᑦ. ᑎᒍᐊᖅᓯᒃᑲᒃ ᐊᒥᕐᒥᖕᓂᒃ ᐊᑐᖅᑎᑎᖕᒪᑎᒃ ᑕᐃᔭᐅᑦᑕᓚᐅᖅᑐᖓ, ᑐᕌᑐᒦᑎᓪᓗᖓ ᐃᒪᓐᓇ ᒍᓴᓴᓂᕿ ᕋᓕᑎᑎᕿᑭᓂᓗᓗ Annie Cotterill — E7-121 ᐊᑎᑎᐊᕙᐅᙱᑦᑐᕈᓚᐅᕐᒪᑦ ᓂᕕᐊᖅᓯᐊᒧᑦ! ᐊᖏᕐᕋᓐᓄᑦ ᐅᑎᕋᒪ ᑕᐃᔭᐅᔪᓐᓇᓚᐅᙱᓐᓇᒪ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᐅᑎᓪᓗᖓ ᐃᒪᓐᓇ Miss — E7-121, ᑕᐃᒪᓕ ᐊᑖᑕᒪ ᐊᑎᖓᓂᒃ ᓯᕗᓪᓕᐅᔪᒥᒃ, ᒥᑭᔾᔪᖕᒥᒃ ᐊᑎᖃᓕᓚᐅᖅᐳᖓ ᑐᒡᓕᖓᓂᒃ ᐊᑎᕆᓕᖅᖢᒍ.

ᐃᓄᑐᐊᖑᓚᐅᙱᑦᑐᖓ ᐱᐅᒃᓴᙱᓐᓂᓐᓂ ᓈᓴᐅᑎᖃᖃᑦᑕᕐᓂᕐᒥᒃ. ᐊᑐᓕᑐᖃᖅᑎᓪᓗᒋᑦ 1960-ᖑᔪᑦ, ᓯᐃᒧᓂ ᒪᐃᑯ, ᓯᕗᓪᓖᑦᑑᔪᒥᒃ ᒪᓕᒐᓕᐅᖅᑎᓄᑦ ᓂᕈᐊᖅᑕᐅᓯᒪᔪᖅ ᐃᓅᓪᓗᓂ ᖃᐅᔨᒪᔭᐅᒍᒪᙱᒻᒪᑦ E7-ᓈᓴᐅᑎᒥᒍᑦ. ᑕᐃᒪᓐᓇ ᐊᑏᓂᕐᒧᑦ ᐱᕙᓪᓕᐊᑎᑕᐅᔪᖅ ᐱᒋᐊᖅᑎᑕᐅ­ᓚᐅᖅᓯᒪᔪᖅ. ᐄᑉ ᐅᒃᐱᒃ, ᖃᐅᔨᒪᔭᐅᑦᑎᐊᖅᑐᖅ ᐅᐊᓕᓂᕐᒥᐅᑕᖅ, ᓯᕗᓕᖅᑎᐅᓚᐅᖅᑐᖅ ᐱᕙᓪᓕᐊᑎᑕᐅᔪᒥ. ᐱᒋᐊᓕᓵᖅᑎᓪᓗᒋᑦ 1968ᓗ 1970ᓗ ᐊᑯᓂᖓᓂ ᖑᔪᑦ, ᐅᒃᐱᒃ ᓇᒧᓗᒃᑖᖅ ᐃᓄᐃᑦ ᐃᒡᓗᖏᓐᓄᐊᖅᖢᓂ ᐊᑎᓕᖅᑐᐃᓚᐅᖅᑐᖅ ᐊᐱᕆᑦᑕᖅᖢᓂᒋᑦ ᐃᓚᒌᑦ ᖃᓄᖅ ᐊᑎᖃᕈᒪᖕᒪᖕᒑᑕ. ᐃᓚᒌᓂ ᐊᖓᔪᖅᑳᕆᔭᐅᔪᖅ ᓂᕈᐊᖅᖢᓂ ᐊᑎᕆᔭᐅᓚᖓᔪᒥᒃ-ᐊᒥᓱᐃᖅᖢᓂ ᐊᑎᕆᔭᐅᓪᓗᓂ ᐃᓚᒋᔭᐅᔪᑉ-ᐊᒻᒪᓗ ᑕᐃᒪ ᓈᓴᐅᑎᒃᑯᑦ ᓇᓗᓇᐃᖅᓯᒪᔪᓐᓃᓚᐅᖅᑐᒍᑦ.

ᓄᓇᓄᑦ ᐊᑎᖁᑎᒋᔭᐅᔪ, ᓲᕐᓗ ᐊᑎᖅᑎᑎᑐᑦ, ᐊᑎᕆᔭᑐᖃᐅᔪᑦ ᐊᒻᒪᓗ ᑐᑭᖃᑦᑎᐊᖅᖢᑎᒃ. ᑭᒻᒥᕈᑦ, ᐅᕝᕙᓐᓃᑦ ᑭᖕᒥᒃ, ᐊᑎᕆᔭᐅᓯᒪᔪᖅ ᐅᔭᖅᑲᒥᒃ ᑭᖕᒥᒃᑎᑐᑦ ᑕᐅᑦᑐᓕᖕᒥᒃ ᐱᔾᔪᑎᖃᖅᖢᑎᒃ. ᖃᖓᓵᖑᓚᐅᖅᑐᕐᓕ ᖃᐅᔨᒪᔭᐅᑦᑕᓚᐅᖅᑐᖅ ᐃᒪᓐᓇ Lake Harbour ᓄᓇᕐᖑᐊᓂ. ᐱᓇᓱᒃᑕᐅᓯᒪᔪᑦ ᓲᕐᓗ ᕿᑭᖅᑖᑉ ᓄᓇᓂᒃ ᐊᑎᑐᖃᖏᓐᓂᒃ ᑲᑎᖅᓱᐃᓂᖏᑕ ᐱᕙᓪᓕᐊᑎᑕᐅᓂᖓᑕ ᓱᒃᑲᐃᑦᑐᒥᒃ ᐅᑎᖅᑎᑎᕙᓪᓕᐊᒐᓗᐊᖅᑐᖅ ᐊᑎᑐᖃᓂᒃ: Frobisher Bay ᐃᖓᓗᕐᖑᖅᖢᓂ 1987-ᒥ, ᐊᒻᒪᓗ ᓄᕕᐱᕆᒥ 1998-ᒥ, Broughton Island ᕿᑭᖅᑕᕐᔪᐊᖑᓚᐅᖅᑐᖅ.

ᐊᑐᕐᓂᖅᐸᖑᔪᕐᓕ, ᑖᓐᓇ ᐅᖃᐅᓯᖅ ᓄᓇᕗᑦ (nunavut). ᑖᓐᓇᑦᑕᐃᓐᓇᖅ ᓱᓕ ᐅᖃᐅᓯᖅ, ᑐᑭᓕᒃ ᐊᖏᕐᕋᕆᔭᑦᑎᓐᓂ ᓄᓇᒥᒃ, ᐊᑎᓪᓚᑦᑖᕐᖑᖅᑎᑕᐅᔪᖅ ᑎᑎᖅᑲᖓ ᓯᕗᓪᓖᑦᑐᖅ ᐊᖏᓕᖅᑎᑕᐅᓪᓗᓂ Nunavut, ᒫᓐᓇ ᐊᑎᕆᔭᐅᓕᖅᖢᓂ ᓄᓇᒧᑦ, ᓄᑖᖑᓪᓗᓂ ᐃᓄᒃᓱᒃᑎᑐᑦ ᑭᒃᑯᓗᒃᑖᓄᑦ ᑕᑯᔭᐅᔪᓐᓇᖅᑐᖅ, ᐊᒻᒪᓗ ᐅᕙᒍᑦ ᑭᖑᕚᑦᑎᓐᓄᑦ ᑐᓂᔪᓐᓇᕋᔭᖅᑕᕗᑦ. ᐊᓕᐊᓇᐃ!