ᓄᓇᕗᑦ Nunavut ’99

photograph of author

ᖃᓄᖅ
ᐊᑭᖃᖅᓯᒪᕙ
ᓄᓇᕗᑦ?

ᑎᑎᕋᖅᑐᖅ ᔮᓐ ᐊᒪᕈᐊᓕᒃ

ᐊᕐᕌᒍᐃᑦ 30-ᐅᔪᑦ ᖄᖏᖅᓯᒪᓕᖅᑐᑦ ᑲᒪᓇᒻᒪᕆᒃᑐᓂᒃ ᐊᓯᔾᔨᕈᑕᐅᔪᓂᒃ ᐃᓄᖕᓄᑦ ᓄᓇᕗᒥᐅᓄᑦ ᐊᑐᖅᑕᐅᓂᖃᖅᓯᒪᓕᕐᒪᑕ. ᑕᒪᒃᑯᐊ ᐊᓯᔾᔨᕈᑕᐅᔪᐃᑦ, ᐊᒥᓱᑦ ᐱᐅᔪᑦ, ᐱᒋᐊᓕᖅᑎᑕᐅᓯᒪᔪᑦ ᓯᕗᓕᖅᑎᐅᔪᓄᑦ ᐃᓄᖕᓄᑦ ᐊᒃᓱᕈᖅᓯᒪᓂᖃᖅᑐᓄᑦ ᐃᓄᐃᑦ ᐃᓅᓯᖏᑦ ᐊᑲᐅᓯᕙᓪᓕᐊᑎᑕᐅᖁᓪᓗᒋᑦ. ᑕᒪᓐᓇ ᓴᓇᓂᑐᖃᐅᔪᖅ ᓄᖅᑲᔪᐃᑦᑐᓄᑦ ᑲᒪᒋᔭᐅᓯᒪᑐᖃᓕᖅᑐᖅ ᐊᒻᒪᓗ ᐊᑭᖃᓪᓚᕆᒃᓯᒪᓪᓗᓂ ᐱᓇᓱᒃᑎᐅᔪᓄᑦ ᓄᓇᒥᒃ ᓇᖕᒥᓂᖅᑖᕐᓂᕐᒥᒃ ᐊᒻᒪᓗ ᒐᕙᒪᓕᕆᓂᕐᒥᒃ ᐱᔪᓐᓇᐅᑕᐅᔪᓂᒃ ᐃᓄᖕᓄᑦ. ᑕᒪᐃᑕ ᓱᕈᓰᑦ ᑭᖑᕚᓪᓗ ᓇᖕᒥᓂᖃᕐᓗᑎᒃ ᐱᔪᓐᓇᐅᑎᖃᖁᓪᓗᒋᑦ.

ᐱᒋᐊᓕᓵᖅᑎᓪᓗᒋᑦ 1970-ᒥᑦ, ᐃᓅᓪᓗᓂ ᓯᕗᓕᖅᑎᐅᓪᓗᓂ ᐃᖅᑲᓇᐃᔮᕆᔭᖃᕐᓗᓂ ᓄᓇᕗᑖᕋᓱᐊᕐᓂᕐᒥᒃ ᐃᓄᑑᓗᐊᕐᓇ­ᓚᐅᖅᓯᒪᔪᖅ. ᐃᓐᓇᒻᒪᕆᐅᓂᖅᓴᐅᔪᑦ ᑐᑭᓯᑎᑕᐅᓇᓱᒃᐸᓚᐅᖅᑎᓪᓗᒋᑦ "ᓇᖕᒥᓂᖃᓕᕐᓂᕐᒥᒃ" ᓄᓇᒥᒃ ᐊᒻᒪᓗ ᓱᓇᐅᑎᖓᑎᒃ ᖃᐅᔨᒃᑲᐃᓇᓱᒃᑎᐅᓪᓗᓂ. ᑕᒪᓐᓇ ᐊᔪᕐᓇᙱᑦᑑᙱᑦᑑᓚᐅᖅᑐᖅ. ᑐᑭᓯᑎᑦᓰᓇᓱᒡᓗᓂ ᖃᓄᖅ ᑐᑭᖃᕐᒪᖕᒑᑦ ᐊᖏᕈᑎᓕᐅᕐᓂᕐᒥᒃ ᓄᓇ ᐱᔾᔪᑎᒋᓪᓗᒍ ᐊᒻᒪᑦᑕᐅᖅ ᐊᔪᕐᓇᕈᔪᖃᑦᑕᓚᐅᕐᒥᔪᖅ.

ᐊᒻᒪᑦᑕᐅᖅ ᐃᓄᐃᑦ ᓯᕗᓕᖅᑎᐅᔪᑦ ᓵᕐᖓᒋᐊᖃᖃᑦᑕᓚᐅᕐᒪᑕ ᒐᕙᒪᓂᒃ ᐊᑭᕋᖅᑐᖅᐸᒃᑎᐅᔪᓂᒃ ᐊᒻᒪᓗ ᑲᓇᑕᒥᐅᓂᒃ ᖃᐅᔨᒪᙱᓗᐊᖅᑐᓂᒃ ᐃᓄᖕᓂᒃ, ᓄᓇᒋᔭᖃᓐᓂᒃ ᐊᒻᒪᓗ ᓯᕗᓂᕆᓚᐅᖅᑕᖓᓐᓂᒃ. ᐃᓄᐃᑦ ᐊᖏᕋᓱᒃᑎᐅᔪᑦ ᓄᑖᓂᒃ ᐊᖅᑯᑎᓕᐅᖅᐸᓪᓕᐊᒋᐊᖃᖅᐸᓚᐅᕐᒪᑕ. ᒐᕙᒪᐃᑦ ᒪᓕᒐᒃᓴᖃᓚᐅᙱᒻᒪᑕ ᐊᑐᐊᒐᒃᓴᓂᒃ ᐃᓄᐃᑦ ᐱᑕᖃᖁᔭᖏᓐᓂᒃ ᐃᓚᒋᔭᐅᖁᔭᐅᔪᓂᒃ ᐊᖏᖃᑎᒌᒍᑕᐅᓂᐊᖅᑐᒥ ᑭᖑᓪᓖᑦᑐᒥ. ᓄᖅᑲᕋᔪᓚᐅᖅᑐᑦ ᐊᒥᓱᐃᖅᖢᑎᒃ ᒐᕙᒪᐅᔪᑦ ᑐᑭᓯᑦᑕᕈᓐᓈᖅᐸᒃᑎᓪᓗᒋᑦ ᒪᑯᓂᖓ ᓄᓇᒥᒃ ᐊᑐᒐᖃᕐᓂᕐᒧᑦ ᐊᑭᓕᐅᑎᓂᒃ, ᑕᕆᐅᕐᒥᐅᑕᓂᒃ ᐱᔪᓐᓇᕐᓂᖃᕐᓂᕐᓂᒃ, ᓇᖕᒥᓂᖅ ᒐᕙᒪᖃᕐᓂᕐᒧᑦ ᓱᓇᒃᑯᑖᖑᓚᖓᔪᓂᒃ ᒪᓕᒐᑎᒍᑦ ᓴᙱᓂᖃᕋᔭᖅᑐᓂᒃ, ᐊᒻᒪᓗ ᓄᑖᑦ ᑎᒥᖁᑎᐅᔪᑦ ᒐᕙᒪᓕᕆᓂᕐᒧᑦ. ᐊᖅᑯᑎᒋᔭᐅᔪᖅ ᓱᒃᑲᐃᑦᑐᒻᒪᕆᐊᕙᓚᐅᖅᑐᖅ ᐊᒻᒪᓗ ᐱᔭᕆᑐᓪᓗᓂ.

ᐅᖁᒪᐃᒃᓴᖅᐸᓪᓕᐊᒍᑎᖃᖅᖢᑎᒃ ᐊᒻᒪᓗ ᓴᓇᓪᓗᐊᕐᓇᖅᑎᓪᓗᒍ ᓯᕗᒻᒧᒐᓱᐊᕐᓂᖅ ᑕᖃᒍᑕᐅᑦᑕᓚᐅᖅᑐᖅ ᓯᕗᓕᖅᑎᐅᔪᓄᑦ ᐃᓄᖕᓄᑦ. ᐊᒥᓱᑦ ᓱᒃᑯᕙᓚᐅᖅᑐᑦ ᐅᖁᒪᐃᒃᓴᓗᐊᕐᓂᕐᒧᑦ ᐊᒃᓱᕈᕐᓇᖅᐸᒃᑎᓪᓗᒍ ᐊᒃᓱᐊᓗᒃ ᐊᖏᖃᑎᒌᒐᓱᐊᕐᓂᖅ. ᐊᒻᒪᓗ ᐊᑯᓂᐊᓗᒃ ᐊᐅᓪᓚᖅᓯᒪᒋᐊᖃᖃᑦᑕᖅᑎᓪᓗᒋᑦ ᑕᑯᑦᑕᙱᓪᖢᑎᒃ ᐃᓚᒥᖕᓂᒃ ᓄᓇᓕᒥᖕᓂᒡᓗ. ᐅᐸᐃᓯᒪᒋᐊᖃᖃᑦᑕᖅᖢᑎᒃ ᐃᓄᒋᐊᒃᑐᓂᒃ ᓱᖏᐅᑎᓯᒪᙱᑕᒥᖕᓂᒃ. ᐃᒥᐊᓗᒃ ᐊᔪᕐᓇᕈᑎᐅᕙᒃᖢᓂ ᐊᒻᒪᓗ ᓱᓕᒃᑲᓐᓂᖅ ᑲᑕᖕᓂᕐᒧᑦ ᓵᓚᒋᔭᐅᔾᔪᑎᑐᐃᓐᓇᐅᕙᓚᐅᖅᑐᖅ ᐊᓯᖏᓐᓄᓪᓗ ᖁᕕᐊᓇᙱᑦᑐᓄᑦ ᐊᑐᓕᕈᑎᑐᐃᓐᓇᐅᒍᑕᐅᓪᓗᓂ, ᓲᕐᓗ ᐃᓚᒌᑦ ᐊᕕᑦᑕᕐᓂᖏᑦ ᐊᒻᒪᓗ ᐊᓯᔭᒃᓴᖑᖅᑎᑕᐅᕙᒃᖢᑎᒃ ᒪᓕᒐᕐᓂᒃ ᓱᕋᐃᓂᒃᑯᑦ. ᐃᓄᐃᓪᓕ ᓴᓗᒪᔪᓂᒃ ᓯᕗᓕᖅᑎᖃᕈᒪᓂᖏᓐᓄᑦ ᑕᐃᒃᑯᐊ ᐱᐅᓂᖅᓴᒃᑯᑦ ᐊᖅᑯᑎᖃᓕᖅᑎᑕᐅᓚᐅᖅᑐᑦ ᐊᒻᒪᓗ ᓯᕗᓕᖅᑎᐅᔪᑦ ᖁᓚᕐᓇᙱᓐᓂᖅᓴᐅᓪᓗᑎᒃ ᐊᕐᕌᒎᔪᓂ ᖃᓂᑦᑐᓂ ᖄᖏᖅᓯᒪᓕᖅᑐᓂ.

ᑕᐃᒃᑯᓄᖓᓗᒃᑖᖅ ᔭᒐᐃᓂᖃᓚᐅᖅᑐᖅ ᖃᓄᑐᐃᓐᓇᖅ ᓯᕗᓂᕐᓴᒧᑦ ᐋᖅᑮᓇᓱᒃᑎᓪᓗᒋᑦ, ᐃᓄᑑᓗᐊᕈᑎᐅᓃᑦ ᐊᒻᒪᓗ ᐊᒃᓱᕈᖅᐸᓚᐅᕐᓃᑦ ᐃᓕᑕᕆᕙᕗᑦ.