“ᐃᓄᐃᑦ ᑭᓱᒥ ᐱᔪᒪᒑᖓᒥᒃ, ᐱᔪᓐᓇᓲᖑᕗᑦ.”
— ᐸᑉ ᑲᓪᓗᓐ, ᐊᔩᖃᑕᐅᓂᑯ ᐃᓄᖕᓄ ᓄᓇᑖᕋᓱᖕᓂᒃᑯᑦ
ᐊᖅᑯᑎ ᓄᓇᕗᒻᒧᑦ
ᓄᓇᑖᕋᓱᖕᓂᐅᔪᖅ ᐃᓚᐃᓐᓇᕆᓚᐅᕐᐹ ᐃᓄᐃᑦ ᐃᓱᒪᒋᔭᖏᓐᓂᑦ — ᐊᐅᓚᑦᑎᓂᒻᒪᕆᒃ ᑭᖑᓂᐊᒍ ᐊᑐᕐᓂᐊᕐᖢᓂ ᐊᒃᓱᕈᓐᓇᕐᑐᒥᓐ-ᓵᓚᒃᓴᕐᓂᒃᑯᑦ ᐃᒻᒥᒃᑰᖓᔪᒥᓐ ᐊᕕᒃᓯᒪᔪᒥᓐ ᐊᒻᒪᓗ ᒐᕙᒪᓕᕆᓂᕐᒥᓐ
ᐊᑕᐅᓯᖅ ᐃᓕᖁᓯ ᐃᓱᓕᑉᐳᖅ, ᐊᓯᖓᓗ ᐱᒋᐊᓕᕐᖢᓂ. ᑐᖁᓚᐅᕋᓂ 90ᖏᓐ ᐊᕐᕌᒍᖃᓕᕐᖢᓂ 1995ᒥ, ᐸᖕᓂᕐᑑᕐᒥᐅᑕᖅ ᐊᑲᔪᒃ ᐃᑐᐊᙵᑦ, ᑕᓕᕐᐱᐊᓂ, ᑭᖑᓪᓕᕐᐹᖑᓚᐅᕐᑐᖅ ᐊᕐᕙᒐᓱᒃᑎᓂ, ᑕᐅᑐᒃᓯᒪᕗᖅ ᐊᓯᖑᕐᐸᓪᓕᐊᒻᒪᕆᒃᑐᒥᓐ ᐱᕙᓪᓕᐊᒻᒪᕆᒃᑐᓂ ᓄᓇᓂ ᐊᑐᕐᑕᐅᔪᒥᓐ ᐊᕐᕌᒍᓂ 5000-ᓗᐊᐸᓗᖕᓂ ᐱᕙᓪᓕᐊᓂᒃᑯᑦ. ᑭᓯᐊᓂᓕ ᑕᑯᖏᑦᑐᖅ ᖁᕕᐊᓇᕐᑐᒥᓐ ᐱᓇᓱᒃᑕᐅᓯᒪᔪᒥᓐ ᐃᓅᖃᑎᖏᓐᓂᑦ — ᓄᓇᕗᑦ ᓴᖅᑭᓐᓂᖓᓂᑦ.
[ᐊᖏᓛᒻᒪᕆᒃ ᓄᓇᑖᕆᔭᐅᔪᖅ ᑲᓇᑕᒥ ᓇᓗᓇᐃᕐᓯᒪᔪᓂᑦ]
[ᓄᓇᕗᑦ ᑎᑭᑉᐸᓪᓕᐊᓪᓗᒍ]
[ᐃᓄᐃᑦ ᓇᓂᓯᓚᐅᕐᐳᑦ ᓯᕗᓕᐅᕐᑎᓂ ᓴᖅᑭᑦᑎᔪᓐᓇᕐᑐᓂᑦ]
ᓇᕐᔪᐊᓕᒫᒥᓐ ᐅᓇᑕᕕᒡᔪᐊᕐᓇᕐᑕᖃᕐᑎᓪᓗᒍ ᐊᐃᑉᐸᖓᓂ ᐊᓯᖑᖅᑎᑦᑎᒻᒪᕆᓚᐅᕐᐳᖅ ᐅᑭᐅᕐᑕᖅᑐᕐᒥ, ᑕᒪᒃᑯᐊ ᒥᑦᑕᕐᕖ ᓴᓇᔭᐅᑲᑕᓕᕐᑎᓪᓗᒋᑦ. ᑭᖑᓂᐊᒍᑦ ᐊᑭᕋᖅᑐᖃᑦᑕᐅᑎᓂᕐᑕᖃᕐᑎᓪᓗᒍ, ᐊᒥᓱᑦ ᑲᓇᖕᓇᕐᒥ-ᐱᖓᖕᓇᕐᒧ ᖃᐅᔨᓴᕈᑎᓂᑦ ᓴᓇᔭᐅᓕᓚᐅᕐᓯᒪᕗ ᑑᓚᐃᙳᓂᕋᕐᑕᐅᔪᑦ (Dew Line) ᑕᒪᒃᑯᐊ ᖃᐅᔨᓴᕈᑕᐅᓪᓗᑎᒃ ᐅᓇᑕᖅᑐᒃᓴᓄᑦ. 1950-ᒥ, ᓄᑖᒥᓐ ᐅᒥᐊᕐᔪᐊᕐᒥ ᖃᐅᔨᓴᕈᑕᐅᓂᐊᕐᑐᒥᓐ, ᓯᑏ ᕼᐊᐅ (CD Howe) ᓴᖅᑭᑕᐅᓕᓚᐅᕐᓯᒪᕗᖅ, ᖃᐅᔨᓴᕈᑎᓂᑦ ᐅᓄᕐᓯᒋᐊᕐᑎᑦᑎᒃᑲᓐᓂᕐᖢᑎᒃ, ᐊᒻᒪᓗ ᑖᓐᓇ ᐋᓐᓂᐊᕐᑐᓂᑦ ᖃᐅᔨᓴᕈᑕᐅᓪᓗᓂ ᐊᒻᒪᓗ ᐊᐅᓚᑦᑎᓂᕐᒧᓐ ᐊᑐᕐᑕᐅᓕᕆᓪᓗᓂ ᐅᑭᐅᕐᑕᖅᑑᑉ ᑲᓇᖕᓇᖓᓄᑦ. ᐳᕙᒡᓗᒃᑐᑦ ᖃᓪᓗᓈᓄᑦ ᐊᐅᓪᓚᕐᑎᑕᐅᖃᑦᑕᓚᐅᕐᐳᑦ, ᐃᓛᓐᓂᒃᑯ ᐊᑯᓂᐊᓘᕐᐸᒃᖢᑎᒃ ᐊᐅᓪᓚᕐᓯᒪᓪᓗᑎᒃ; ᓄᑕᕋᑦ ᐳᐃᒍᕐᐸᓵᖅᐸᒃᖢᑎᒃ ᐅᖃᐅᓯᑐᖃᒥᖕᓂ ᐊᒻᒪᓗ ᐊᒃᓱᕈᖅᖢᑎᒃ ᑭᓯᐊᓂ ᐃᓅᓯᕐᒥᓂᑦ ᐅᑭᐅᕐᑕᖅᑐᕐᒥ ᐅᑎᕐᑎᑦᑎᕙᓚᐅᕐᐳᑦ.
ᐃᓚᖃᓯᐅᑎᓯᒪᓪᓗᓂ ᐃᓄᐃᑦ ᓅᖃᑦᑕᕐᓂᖏᓐᓂ ᐊᖑᔭᒃᓴᓂ ᒪᓕᒃᖢᑎ ᑮᔭᖃᑦᑕᓕᕆᓪᓗᑎᒡᓗ, ᒐᕙᒪᒃᑯ ᐃᓚᒌᓂ ᓅᑎᕆᓕᓚᐅᕐᐳᑦ ᓄᓇᓄ ᐱᕙᓪᓕᐊᓂᕐᒧᓐ ᐃᑲᔫᑕᐅᒐᔭᕆᔭᐅᔪᓄᑦ, ᓲᕐᓗ ᐅᕗᖓ ᑰᒡᔪᐊᕌᓗᖕᒧᓐ, ᒫᓂᑑᐸᒥ, ᐊᒻᒪᓗ ᐃᓅᕕᖕᒧᓐ ᑖᓐᓇ ᓄᑖᖑᑎᓪᓗᒍ ᓄᓇ, ᓄᓇᑦᓯᐊᕐᒥ. 1953-ᒥ, ᒐᕙᒪᑐᖃᒃᑯ ᓄᒃᑎᕐᑎᑦᑎᓚᐅᕐᐳᑦ 17ᖑᒪᔨ;-ᓂ ᐃᓚᒌᓂ ᒥᑦᑎᒪᑕᓕᖕᒥ ᐊᒻᒪᓗ ᑯᐸᐃᒃ ᐅᐊᖕᓇᖓᓂ ᐃᓄᒃᔪᐊᕐᒥ ᖃᐅᓱᐃᑦᑐᒧᓐ ᐊᒻᒪ ᐊᐅᓱᐃᑦᑐᒧᓐ ᖁᑎᒃᑐᕐᒥᑦ. ᑕᕝᕙᓂ ᐊᕐᕌᒍᑦᑕᐃᓐᓇᕐᒥ, ᒐᕙᒪᑐᖃᒃᑯ ᓴᖅᑭᑦᑎᓕᓚᐅᕐᐳᑦ ᓄᑖᒥᓐ ᐃᓄᓕᕆᔨᑐᖃᒃᑰᓂᐊᕐᑐᒥᓐ, ᐊᒻᒪ ᑭᖑᓂᑦᑎᐊᖓᒍ ᑖᒃᑯᐊ ᐱᓕᕆᔨᒃᓴᖏᓐᓂ ᐃᓄᐃᑦ ᓄᓇᖓᓄᑦ ᐊᐅᓪᓚᕐᑎᑦᑎᖃᑦᑕᓕᒪᐅᕐᓯᒪᕗᑦ ᑲᒪᔨᐅᓂᐊᕐᑐᓂᑦ ᐱᓕᕆᐊᕆᔭᖏᓐᓂᑦ. ᐱᕐᓕᕐᓂᕐᒧᓐ ᑐᖁᑲᑕᓕᓚᐅᕐᓯᒪᕗᑦ ᓅᑎᕆᑲᑕᖕᓂᕐᒧᓐ ᑭᕙᓪᓕᕐᒥ, ᓄᑖᒥᓐ ᓄᓇᒥ ᓴᖅᑭᑦᑎᓂᕐᒥᓐ (ᑲᖏᖅᖠᓂᖅᒥ), ᐊᒻᒪ ᐅᔭᕋᒃᓴᖅᓯᐅᕐᕕᖕᒥᓐ ᒪᕐᕈᐃᓂ ᐃᖅᑲᓇᐃᔭᖅᕕᖃᖅᑎᑦᑎᒐᓱᒧᓐ ᐃᓄᖕᓂ. ᑕᒫᓂᑦᑕᐃᓐᓇᖅ, ᓰᐲᓰᑯ ᐃᓄᒃᑎᑑᖓᔪᒥᓐ ᓈᓛᐅᑎᒃᑯᑦ ᓴᖅᑭᑎᑦᑎᓕᓚᐅᕐᓯᒪᕗᑦ 1950-ᖏᓐᓂ, ᐊᒻᒪ ᑭᖑᓂᐊᒍᑦ ᐃᑲᔪᕐᖢᑎᒃ ᓴᖅᑭᑦᑎᓂᕐᒥᓐ ᐃᓄᒃᑎᑐᑦ ᓈᓛᐅᓯᕆᓂᕐᒥᓐ.
1960-ᖏᓐᓕᓕᕐᑎᓪᓗᒍ ᓄᓇᕐᔪᐊᖅ ᑎᔾᔭᕐᓚᓕᓚᐅᕐᓯᒪᕗᖅ, ᕕᐊᑦᓈᒻᒥᓐ ᐅᓇᑕᕕᒡᔪᐊᕐᓂᖃᕐᖢᓂ, ᖃᓪᓗᓈᓪᓗ ᓄᔭᖅᑯᖅᑐᔪᐊᓘᓕᕐᖢᑎᒃ ᕼᐃᐱᐅᓂᕋᕐᑕᐅᓪᓗᑎᒃ, ᖃᖓᑦᑕᖅᑎᑦᑎᑲᑕᒃᖢᑎᒡᓗ ᓯᓚᐃᓐᓇᕐᒧᓐ, ᓈᓚᐅᑎᕋᓛᓂ ᓴᓇᓕᕐᖢᑎᒃ, ᐲᑐᔅ (Beatles) ᐊᒻᒪ ᓯᑭᑑᓪᓗ. ᐃᓕᖁᓯᖃᑎᒌᖏᓐᓂᖅ, ᐱᓕᕆᐊᖃᕋᓱᖕᓂᖅ ᐊᒻᒪ ᑐᓴᐅᑎᓕᕆᓂᖅ ᐱᐅᓯᕚᓪᓕᕐᓂᐅᔪᖅ ᑲᓇᑕᐅᑉ ᐅᑭᐅᕐᑕᖅᑐᖓᓂᑦ ᐊᓯᖑᐃᑎᑦᑎᓗᐊᓕᕐᓂᑰᖃᑕᐅᕗᑦ.
ᑐᓴᒐᒃᓴᓕᐅᕈᑎᕈᓘᔭᑦ ᐃᓐᓇᕐᓂ ᐃᓕᓐᓂᐊᕐᑐᓂᑦ ᓴᖅᑭᑕᐅᑲᑕᓕᓚᐅᕐᓯᒪᕗᑦ, ᓴᓇᔭᐅᕙᒃᖢᑎᒃ ᒪᒃᑯᒃᑐᓄᑦ, ᐊᒻᒪᓗ ᑕᒪᓐᓇ ᒪᓕᒐᓕᕆᓂᕐᒥᓐ ᐱᒋᐊᕈᑕᐅᓕᓚᐅᕐᓯᒪᕗᖅ ᐅᑭᐅᕐᑕᖅᑑᑉ ᑲᓇᖕᓇᖓᓂ, ᐊᒻᒪᓗ ᒪᑲᓐᔨ ᑎᐊᑕᒥᓐ, ᑲᑎᒪᔩᑦ ᐃᓄᐃᑦ ᐱᔪᓐᓇᐅᑎᖏᓐᓄ ᓴᖅᑭᔾᔪᑕᐅᓕᓚᐅᕐᓯᒪᕗᖅ, ᓯᕗᓪᓕᕐᒥ ᑭᒡᒐᕐᑐᐃᓪᓗᑎᒃ ᐊᔾᔨᒌᖏᑦᑐᓂᑦ ᐃᓕᖁᓯᓕᖕᓄᑦ ᐊᒻᒪ ᑭᖑᓂᐊᒍ, ᐃᓅᕕᐊᓗᖕᓄ ᑐᕌᖓᑐᐃᓐᓇᓕᕐᖢᓂ. 1960 ᐊᑯᓐᓂᖓᓂ, ᒐᕙᒪᑐᖃᒃᑯ ᐃᒡᓗᓕᕆᓂᕐᒧᓐ ᐱᓕᕆᓂᕐᒥᓐ, ᐱᒋᐊᕈᑎᒥᓐ ᐱᑕᖃᕐᖢᓂ, ᓴᖅᑭᑦᑎᓂᐅᓕᓚᐅᕐᓯᒪᕗᖅ ᓄᓇᓕᖕᓂᑦ ᐃᒡᓗᑕᖃᓕᕐᑐᓂᑦ. ᑕᒪᓐᓇᓗ ᓄᓇᓕᕋᓛᓂᑦ ᓄᖑᕋᐃᓕᓚᐅᕐᐳᖅ.
ᓄᓇᖃᖅᑳᖅᑐᑦ ᐱᔪᒪᔭᖏᓐᓄ, ᑲᒥᓯᓇᒥᓐ ᓄᓇᖃᖅᑳᖅᑐᓄᑦ ᑎᒃᑯᐊᕐᑕᐅᔪᖃᓕᓚᐅᕐᓯᒪᕗᖅ ᑎᓯᐱᕆ 1969-ᒥᓐ, ᐊᒻᒪᓗ ᒐᕙᒪᑐᖃᒃᑯ ᑮᓇᐅᔭᓂ ᐊᑐᐃᓐᓇᐅᑎᑦᑎᓕᓚᐅᕐᓯᒪᕗᑦ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓄᑦ ᐱᓇᓱᒃᑕᖏᓐᓄᑦ ᑐᕌᖓᔪᓂᑦ. ᑲᓇᑕᐅᑉ ᐅᑭᐅᕐᑕᖅᑐᖓᑕ ᓴᓂᑦᑎᐊᖓᓕᑦᑐᓪᓕ ᐱᓇᓱᐊᕐᑕᖏᓐᓂ 1973-ᒥ ᐊᑐᓕᓚᐅᕐᓯᒪᕗᑦ: ᐊᓛᔅᑲᒥ ᓄᓇᖃᖅᑳᖅᑐᑦ ᓄᓇᑖᖅᖢᑎᒃ. ᑖᓐᓇ ᓯᕗᓪᓕᕐᐸᐅᓚᐅᕐᓯᒪᕗᖅ ᑕᐃᒪᐃᓐᓇᓱᒃᑐᓂᑦ. ᑕᒪᓐᓇ ᐊᓛᔅᑲᒥᐅᑦ ᐃᓄᖏᓐᓂ ᓄᓇᑖᕈᑕᐅᓕᓚᐅᕐᓯᒪᕗᖅ 180,000 ᑭᓘᒥᑕᔾᓂᒃ ᐊᖏᑎᒋᔪᒥᓐ ᐊᒻᒪᓗ ᑮᓇᐅᔭᕐᑖᕈᑕᐅᓪᓗᓂ $962 ᒥᓕᐊᓐ ᑖᓚᓂᑦ.
ᐹᑉ ᑲᓪᓗᓐ, ᓇᓴᕐᓯᒪᔪᖅ, ᐊᒻᒪ ᑐᓇᑦ ᒥᓗᕐᑐᒃᓃ.
ᐃᓅᓯᖅ ᓄᓇᓕᕋᓛᒥᓐ. ᑖᒪᔅ ᓱᓗᒃ. ᓄᓇᕗᑦ ᐱᓇᓱᐊᓗᐊᖏᓚᑦ ᑲᓇᑕᐅᑉ ᐃᓗᐊᓂ. ᓄᓇᕐᔪᐊᓕᒫᒥᓪᓕ, ᑭᓯᐊᓂ ᑕᑯᒃᓴᐅᕗ ᐊᓯᐊᒍᑦ. “ᐃᖅᑲᐅᒪᕗᖓ ᖃᐅᐸᖑᑐᐊᕐᒪᓐ ᒫᔅᑲᐅᒧᐊᕆᐊᖃᕐᑐᖓ,” ᐃᖃᐅᒪᔪᖅ ᔮᒃ ᔅᑖᒡ, ᒐᕙᒪᑐᖃᒃᑯ ᓇᓗᓇᐃᓚᐅᕐᑎᓪᓗᒋ ᓄᓇᑖᕐᑎᑦᑎᓂᕐᒥ ᐃᒻᒥᒃᑰᕐᑐᒥᓐ ᐊᖏᕈᑎᑎᒍ ᑎᓯᐱᕆ 1991. “ᑕᓚᕕᓴᓐ ᐃᑭᖢᒍ ᓰᐊᓐᐊᓐᒧᓐ ᐅᖃᐅᓯᐅᔪ ᓴᖅᑭᔮᕐᖢᓂ. ᐃᖃᕐᕋᑦ 24 ᐃᓗᐊᓂ ᓄᓇᕐᔪᐊᓕᒫᒥ ᑐᓴᐅᒪᔭᐅᓕᓚᐅᕐᐳᖅ.”
ᑕᕝᕙᓂᑦᑕᐃᓐᓇᖅ ᐊᕐᕌᒍᒥ, ᐃᓄᐃᑦ ᑕᐱᕇᒃᓴᑦᑯ ᑲᓇᑕᒥ ᐋᖅᑭᒃᑕᐅᓕᓚᐅᕐᐳᖅ ᓄᓇᑖᕋᓱᖕᓂᕐᒥ ᐱᓕᕆᓂᐊᕐᒪᑕ. ᐊᒻᒪᓗ ᑯᐸᐃᒃ ᑕᕐᕋᖓᓂ ᐃᓄᐃᑦ ᑲᑐᔾᔨᖃᑎᒌᑦ ᓴᖅᑭᓕᓚᐅᕐᓯᒪᕗᑦ ᐊᕐᕌᒍ ᐊᓂᒍᕐᑎᓪᓗᒍ ᐊᒻᒪᓗ ᔭᐃᒻᔅ ᐸᐃᒥ ᓄᓇᑖᕋᓱᖕᓂᕐᒥ ᐱᓕᕆᓯᒋᐊᕐᖢᑎᒃ
ᓄᓇᖃᖅᑳᖅᑐᑦ ᐱᓇᓱᒃᑕᖏ ᐊᒻᒪ ᓇᖕᒥᓂᖅ ᒐᕙᒪᖃᕐᓂᖅ ᐱᒋᐊᒻᒪᕆᓕᓚᐅᕐᓯᒪᕗᖅ 1973-ᒥ ᐱᖓᓱᓂ ᐃᖅᑲᖅᑐᐃᕕᖕᓂ ᑕᑉᐱᕐᑕᐅᓪᓗᑎᒃ ᓄᓇᖃᖅᑳᖅᓂᕐᒧᑦ, ᑕᒪᓐᓇ ᐱᔪᓐᓇᕐᓂᐅᔪᖅ ᐱᒋᐊᕐᓯᒪᓪᓗᓂ ᐊᑯᓂᐋᓗᒃ ᓄᓇᖃᕐᓂᕐᒧᓐ ᐊᒡᓛᑦ ᐊᓯᐊᕐᒥᐅᑦ ᑎᑭᓚᐅᕐᑎᓐᓇᒋᑦ. ᐃᓄᐃᑦ ᑕᐱᕇᒃᓴᑦᑯ ᒐᕙᒪᒃᑯᓐᓂ ᐅᖃᖃᑎᖃᖃᑦᑕᓕᓚᐅᕐᓯᒪᕗᑦ ᐊᖑᓇᓱᒡᕕᐅᔪᓐᓇᕐᑐᑦ ᒥᒃᓵᓄᑦ, ᐊᒻᒪᓗ ᑮᓇᐅᔭᓂ ᑐᓂᔭᐅᓪᓗᑎᒃ ᖃᐅᔨᓴᕈᑎᒃᓴᒥᓐ ᓄᓇᒥ ᐊᑐᕐᓂᐅᔪᒥᓐ ᐊᒻᒪ ᓄᓇᖃᕐᓂᕐᒥᓐ ᐃᑲᔪᖅᑐᐃᒐᓱᒃᑐᒥᓐ ᐃᓄᖕᓂ ᓄᓇᑦᓯᐊᕐᒦᑦᑐᓂᑦ. ᑕᐃᒪᐃᑎᓪᓗᒋ, ᐃᓄᐃᑦ ᑯᐸᐃᒃᒥ ᐊᓪᓚᓂᑦ ᐱᓕᕆᖃᑎᖃᓕᓚᐅᕐᐳᑦ ᐱᔾᔪᑕᐅᓪᓗᓂ ᔭᐃᒻᔅ ᐸᐃ ᐃᒪᕐᒧᓐ ᖃᐅᒻᒪᖁᑎᓕᕆᓂᕐᒥᓐ, ᐊᒻᒪᓗ ᐊᖏᕈᑎᒥᓐ ᓵᓚᒃᓴᕐᖢᑎᒃ ᓄᕕᐱᕆ 1975-ᒥ.
ᐹᓪ ᐅᑲᓕᖅ, ᑕᐃᕕᑦ ᐊᒡᓘᑲᖅ ᐊᒻᒪ ᐋᓚᓐ ᒪᒃᓴᒐᖅ ᓄᖃᖓᓚᐅᑲᒃᐳᑦ ᐋᔩᑲᑕᖕᓂᕐᒥᓐ. ᓄᓇᕗᑦ ᒐᕙᒪᑖᕐᑎᒐᓱᖕᓂᖓᑦ ᐱᒻᒪᕆᐅᓚᐅᕐᐳᖅ, ᐅᖃᕐᑐᖅ ᐊᖓᔪᖅᑳᖑᓂᑯ ᐋᔩᕐᑎᓄ ᒪᒃᓴᒐᖅ, “ᓄᓇᑖᕋᓲᑎᕗᑦ ᑕᒪᐃᓐᓂ ᐱᑕᖃᕐᑎᒐᓱᒃᖢᑎᒍ. ᓄᓇᑖᕋᓲᑎᕕᓃ ᓄᓇᑦᑕᐃᓐᓇᕐᒥᓐ ᑮᓇᐅᔭᓂᓪᓗ ᐱᔾᔪᑎᖃᑐᐃᓐᓇᓚᐅᕐᓯᒪᖕᒪᑕ.”
1976 ᐱᒋᐋᓕᓵᕐᑎᓪᓗᒍ, ᐃᓄᐃᑦ ᑕᐱᕇᒃᓴᑦᑯ ᓴᖅᑭᑦᑎᓕᓚᐅᕐᐳᑦ ᓄᓇᕘᑖᕈᑎᒃᓴᒥᓐ ᒐᕙᒪᑐᖃᒃᑯᓐᓄᑦ, ᐱᖃᓯᐅᑎᓪᓗᑎᒃ ᐃᒻᒥᒃᑰᖓᔪᒥᓐ ᐊᕕᒃᑐᕐᓯᒪᓂᒃᑯ ᓄᓇᑖᕋᓲᑎᒥᓐ. ᑕᒪᓐᓇ ᐱᓕᕆᓂᖅ ᐱᓇᓱᒍᑕᐅᓪᓗᐊᑕᓚᐅᕐᐳᖅ, ᐅᖃᖅᑐᖅ ᐃᓄᐃᑦ ᑕᐱᕇᒃᓴᑦᑯ ᐱᒋᐊᕐᑎᑦᑎᔪᖅ ᐊᖓᔪᖅᑳᖑᓪᓗᓂ ᑕᒑᖅ ᑰᓕ, ᓲᖃᐃᒻᒪ ᓄᓇᑖᕋᓱᖕᓂᖅ ᓄᑖᖑᓚᐅᕐᑐᖅ ᐊᒻᒪᓗ “ᐃᒻᒥᓂᑑᓪᓗᓂ, ᐊᔪᕐᓇᒻᒪᕆᓚᐅᕐᑐᖅ. ᐃᓱᒪᓚᐅᕐᐳᒍ ᑕᐃᓱᒪᓂ ᐱᒻᒪᕆᐅᖂᔨᒋᓚᐅᕋᑦᑎᒍ ᐊᖏᓂᕐᓴᒥ ᐱᓇᓱᒍᑎᖃᕈᑦᑕ ᒪᕐᕈᐃᓂᑦ: ᓄᓇᖃᖅᑳᖅᑐᑦ ᐃᓄᐃᑦ ᓄᓇᒋᔭᖓ ᐊᒻᒪ ᓄᓇᑖᕋᓱᖕᓂᖅ ᐱᔭᐅᒐᓱᒃᓯᒪᓂᖓ, ᐊᒻᒪᓗ ᒪᓕᒐᓕᕆᓂᒃᒥᓐ ᐱᕙᓪᓕᐊᓂᐅᔪᖅ.”
ᓄᓇᑖᕋᓱᖕᓂ ᐊᖏᕐᑕᐅᓕᓚᐅᕐᓯᒪᔪᖅ ᑭᓯᐊᓂ ᐋᔩᖃᑎᒌᖕᓂᒃᑯ, ᑭᓯᐊᓂᓕ ᐊᕕᖕᓂᐅᔪᖅ ᓄᓇᑦᓯᐊᖅ ᐅᖃᐅᓯᐅᖏᖢᓂ.
“ᓕᐳᕈ ᒐᕙᒪᒃᑯ, 1980 ᐱᒋᐊᓕᓵᖅᑎᓪᓗᒍ, ᐊᖏᖏᒻᒪᕆᓚᐅᕐᓯᒪᕗᑦ ᒪᓕᒐᓕᕆᓂᕐᒥᓐ ᑕᒪᓐᓇ ᓄᓇᕗᑦ ᓴᖅᑭᓐᓂᐊᕐᓂᖓ ᐃᓚᐅᓂᐊᕈᓂ,” ᐋᔩᕐᑎᐅᖃᑕᐅᓂᑯ ᐃᓄᖕᓄ ᓄᓇᑖᕋᓱᖕᓂᕐᒧᓐ ᐸᑉ ᑲᓪᓗᓐ ᐅᖃᕐᑐᖅ. “ᑭᓯᐊᓂᓕ ᑕᒪᓐᓇ ᐱᓕᕆᐊᕇᓐᓇᓚᐅᕐᐸᕗᑦ.”
ᐊᕐᕌᒍᒐᓴᖕᓂᑦ ᐱᓕᕇᓐᓇᕐᖢᑎᒃ ᐊᒃᓱᕈᕐᓂᒃᑯ, ᓄᓇᕗᑦ ᐃᓱᒪᒋᔭᐅᓂᖓ ᒐᕙᒪᑐᖃᒃᑯᓐᓂ ᐊᖏᕐᑕᐅᓕᓚᐅᕐᓯᒪᕗᖅ ᐊᒻᒪᓗ ᓄᓇᑦᓯᐊᑉ ᒐᕙᒪᒃᑯᖏᓐᓂᑦ, ᑭᓯᐊᓂᓕ ᐊᓯᐊᒍᑦ ᐋᔩᕐᓂᒃᑯ ᐱᓕᕆᐊᕆᖁᔭᐅᓪᓗᓂ ᓴᓂᑦᑎᐊᖓᔪᒃᑯᑦ ᓄᓇᑖᕋᓱᖕᓂᐅᑉ.
ᐊᕐᕌᒍ 16 ᐃᓗᐊᓂ ᑖᒃᑯᐊ ᒪᕐᕉ ᐱᓕᕆᐊᖑᔫ ᐱᓕᕆᐊᖑᒻᒪᕆᓕᓚᐅᕐᓯᒪᕘ, ᑕᒪᒃᑯᐊ ᓄᓇᕐᔪᐊᕐᒥ, ᑲᓇᑕᒥ, ᑲᑐᔾᔨᖃᑎᒌᖕᓂᒃᑯ ᐊᒻᒪ ᐃᒻᒥᒃᑯ ᐊᑲᐅᖏᓕᐅᕈᑎᓂᑦ ᓴᖅᑭᔮᖅᑐᖃᕋᓗᐊᕐᑎᓪᓗᒍ. ᑖᒃᑯᐊᑦᑕᐃᓐᓇᖅ ᐱᓕᕆᔩᑦ ᓯᕗᓕᐅᕐᑏ ᐅᖃᐅᔾᔪᐃᔨᖏᓪᓗ ᑕᒪᑐᒥᖓ ᐱᓕᕇᓐᓇᓚᐅᕐᐳᑦ. ᐊᔪᕐᓇᕋᓗᐊᕐᑎᓪᓗᒍ ᑕᒪᐃᓐᓂ ᑕᐃᓯᔭᕆᐊᒃᓴᖅ, ᐅᑯᐊᓕ ᐱᓕᕆᓪᓗᐊᑕᓚᐅᕐᐳᑦ ᑕᒑᖅ ᑰᓕ, ᑲᓪᓗᓐ, ᑕᐃᕕᑦ ᐊᒡᓘᑲᖅ, ᒪᒃᕼᐋᒐᖅ, ᔮᒃ ᑯᐱᐅᓇ, ᔮᓐ ᐊᒪᕈᐊᓕᒃ, ᐃᕆᒃ ᑕᒍᕐᓈᖅ, ᔭᐃᒻᔅ ᐃᑦᑐᓗᒃ, ᓵᓚᒪᓐ ᑰᒐᒃ, ᑑᓇᑦ ᒥᓗᕐᑐᖅ, ᑖᒪᔅ ᓱᓗᒃ, ᓗᐃ ᑕᐹᕐᔪᒃ, ᒫᒃ ᐃᕙᓗᐊᕐᔪᒃ, ᐹᓪ ᖁᐊᓴ, ᐹᓪ ᐅᑲᓕᖅ, ᓴᐃᒪᓐ ᑕᐃᐸᓇ, ᓗᐃ ᐱᓚᑲᑉᓯ, ᒦᑲ ᕿᓚᕝᕙᖅ, ᐆᓕ ᐃᑎᓐᓄᐊᖅ, ᔮᓐ ᒥᐅᕆᑦ, ᕌᓐᑎ ᐊᐃᒻᔅ, ᐳᕉᔅ ᒋᓕᔅ, ᑎᐅᕆ ᕕᐊᓐᔾ, ᐊᒻᒪ ᒥᐊᓕ ᑯᕋᑯᕕᑦᔅ. ᒐᕙᒪᑐᖃᒃᑯᓐᓂ ᐱᓕᕆᔪᑦ ᓯᕗᓕᐅᕐᑎᖃᓚᐅᕐᐳᑦ ᓯᕗᓪᓕᕐᒥᓐ ᔮᓐ ᓇᐃᔅᒥᑦᒥᓐ, ᐊᒻᒪ ᑮᑦ ᑯᕉ, ᐊᕐᕌᒍᑦ ᐱᒋᐊᓕᓵᕐᓂᖏᓐᓂ, ᑭᖑᓂᐊᒍᓪᓕ ᐹᑉ ᒥᑦᓱᓪ ᐊᒻᒪ ᑖᒻ ᒪᓗᐊᐃ. ᐋᓐᒐᔅ ᒪᑲᐃ, ᐊᒻᒪ ᑭᖑᓂᐊᒍᑦ ᕌᔅ ᒪᑭᓇᓐ ᓯᕗᓕᐅᕐᑎᐅᓕᓚᐅᕐᐳᖅ ᓄᓇᑦᓯᐊᑉ ᒐᕙᒪᒃᑯᖏᓐᓂ ᐋᔩᕐᑎᖏᓐᓂ ᑭᒡᒐᕐᑐᐃᓪᓗᓂ.
ᐊᖏᓛᒻᒪᕆᒃ ᓄᓇᑖᕆᔭᐅᔪᖅ ᑲᓇᑕᒥ ᓇᓗᓇᐃᕐᓯᒪᔪᓂᑦ
ᐃᓚᖏ ᐃᓚᒋᔭᐅᔪᑦ ᐃᓄᐃᑦ ᑕᐱᕇᒃᓴᒃᑯᓐᓂ 1976-ᒥ ᓄᓇᕘᕐᑖᕋᓲᑎ ᐱᐅᒋᓚᐅᕐᓯᒪᖏᓚᖓ ᐅᖃᕐᖢᑎᒃ ᑖᓐᓇ ᐊᖏᕈᑎ ᑎᑎᕋᕐᑕᐅᓯᒪᓂᕋᕐᖢᓂᔾᔪᒃ ᐅᖃᓪᓚᐅᔾᔪᐃᔪᓂ ᐊᒻᒪᓗ ᑐᕌᒐᕆᔭᐅᔪᒥᓐ ᐃᓱᒪᒋᔭᐅᔪᓂᓪᓗ ᐃᓄᖕᓄ ᐱᓯᒪᖏᓐᓂᖓᓂᑦ. ᓄᑖᒥ ᑎᑎᕋᖅᓯᒪᔪᒥᓐ ᐋᖅᑭᒃᓯᓕᓚᐅᕐᓯᒪᔪᑦ ᐊᒻᒪᓗ ᓴᖅᑭᑎᑕᐅᒻᒪᕆᒃᖢᓂ ᐃᓄᐃᑦ ᑕᐱᕇᒃᓴᑦᑯ ᑲᑎᒪᓂᕐᔪᐊᖓᓂᑦ ᐃᓚᒋᔭᐅᔪᓄᓪᓗ ᐊᖏᕐᑕᐅᓪᓗᓂ ᐅᓄᕐᓂᕐᓴᓂᑦ. ᐅᓇᓕ ᑎᑎᖃᖅ ᓇᓗᓇᐃᕐᓯᓯᒪᓚᐅᕐᐳᖅ 11-ᓂ ᐱᔾᔪᑕᐅᓗᐊᕐᑐᓂᑦ ᒐᕙᒪᑖᕋᓱᖕᓂᕐᒧᓐ ᓇᖕᒥᓂᖅ, ᐊᒻᒪᓗ ᑎᑎᕋᐅᓯᖃᖅᖢᓂ ᓄᓇᒥ ᐃᒻᒥᑰᕐᑐᒃᓴᒥᓐ ᐊᕕᒃᓯᒪᓂᒃᑯᑦ.
ᐋᔩᕐᓂᐅᔪᑦ ᓄᓇᕗᑦᑖᕋᓲᑎ ᐱᒋᐊᓯᓚᐅᕐᐳᖅ ᑕᒪᓐᓇᓗ ᓇᒧᖓᐅᓇᓂ ᐊᕕᖕᓂᐅᔪᖅ. ᑕᒪᒃᑯᐊ ᐅᖃᓪᓚᖕᓂᐅᔪᑦ ᐅᓚᕕᑕᐅᖃᑦᑕᖢᑎᒃ ᖃᐅᔨᓴᕐᓂᐅᔪᓂᑦ ᐱᕙᓪᓕᐊᓂᐅᔪᒥᓪᓗ ᐅᖅᓱᐊᓗᓕᕆᓂᕐᒧᓐ, ᒑᓯᓕᕆᓂᕐᒧᓐ ᐊᒻᒪ ᐅᔭᕋᒃᓴᖅᓯᐅᕐᓂᒧᓐ ᓄᓇᑦᓯᐊᕐᒥᓐ. ᑕᕝᕙᓂᑦᑕᐃᓐᓇᖅ, ᑲᓇᑕᐅᑉ ᒥᓂᔅᑕᖏ ᐅᖃᐅᓯᖃᑲᑕᓚᐅᕐᓯᒪᕗᑦ ᑲᓇᑕᐅᑉ ᒪᓕᒐᕐᔪᐊᖓᓂ. ᐅᓄᖏᑦᑐᑦ ᐃᓄᐃᑦ ᐱᓕᕆᔨᐅᔪᑦ ᐅᖃᐅᔾᔪᐃᔨᖏᓪᓗ ᐅᐸᒍᑎᒋᐊᖃᖃᑦᑕᓚᐅᕐᐳᑦ, ᐃᖅᑲᖅᑐᐃᕕᓕᕆᔪᓂᓪᓗ ᐊᒻᒪ ᐃᓄᒋᐊᓄᑦ ᐅᖃᓪᓚᒋᐊᕐᑐᕆᐊᖃᕐᐸᒃᖢᑎᒃ ᓄᓇᑖᕋᓱᖕᓂᖅᒨᖓᔪᓂ ᐊᒻᒪᓗ ᐃᖕᒥᖕᓂ ᑭᒡᒐᕐᑐᑦᑎᐊᕐᖢᑎᒃ.
ᐃᓄᐃᑦ ᐊᒃᓱᕈᒻᒪᕆᓚᐅᕐᐳᑦ ᓄᖅᑲᖕᒑᖅᑎᑦᑎᓇᓱᖕᓂᕐᒥᓐ ᐱᕙᓪᓕᐊᓂᐅᔪᒥᓐ ᐋᔩᖃᑲᑕᒃᑎᓪᓗᒋᑦ, ᑭᓯᐊᓂ ᑕᒪᓐᓇ ᐊᓂᒍᑦᑎᐊᖏᖢᓂ. ᐊᓯᖏᑦ ᐊᑲᐅᖏᑦᑐᓕᐅᕈᑏ ᓴᖅᑭᔮᖏᓐᓇᕐᐸᒃᖢᑎᒃ, ᒪᑯᑎᑐᓇᖅ ᐊᐅᓚᑦᑎᓂᐅᔪᒥᓐ ᐆᒪᔪᓂ ᑲᑎᒪᔨᓂᑦ, ᐃᓄᐃᑦ ᐱᔪᓐᓇᐅᑎᖏᓐᓂᑦ ᐃᒪᕐᒥᐅᑕᑦ ᒥᒃᓵᓄᑦ, ᐊᒻᒪᓗ ᓄᓇᐅᑉ ᐊᕕᒃᓯᒪᓂᕆᓂᐊᕐᑕᖓ ᐊᑲᐅᖏᓐᓂᖃᕐᖢᓂ ᐊᓪᓚᓄᑦ ᐃᓄᖕᓄᓪᓗ, ᑕᒪᓐᓇᓗ ᒫᓐᓇ ᐃᖅᑲᖅᑐᐃᔨᒃᑯ ᐱᓕᕆᐊᖑᔪᖅ.
ᐊᒻᒪᑦᑕᐅᖅ ᐃᓄᐃᑦ ᐃᑲᔪᖅᑕᐅᕙᓚᐅᕆᕗᑦ. ᖃᒪᓂᑦᑐᐊᕐᒥᓐ ᐃᖅᑲᖅᑐᐃᔨᓕᕆᓂᐅᔪᖅ ᐋᖅᑭᑕᐅᓕᓚᐅᕐᓯᒪᔪᖅ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᓕᕆᔨᖏᓐᓄᑦ 1979-ᒥᓐ, ᐃᓕᓴᖅᓯᓂᖃᓕᕐᖢᑎᒃ ᓄᓇᖃᖅᑳᖅᑐᑦ ᓄᓇᒥᓐ ᐱᔪᓐᓇᐅᑎᖃᕐᓂᖏᓐᓂᑦ ᓂᕐᔪᑎᓄᓪᓗ. ᒥᐊᓕᒐᒃᑯ ᐅᒥᐊᕐᔪᐊᖏ ᒪᕐᕉᒃ ᑲᓇᑕᐅᑉ ᐃᒪᖓᓕᓕᕐᒪᑕ ᐊᖏᕐᑕᐅᓯᒪᓇᑎᒃ 1970-ᒥ (the Manhattan) ᐊᒻᒪ 1985-ᒥ (the Polar Sea), ᑕᒪᐅᓈᕐᓂᖏ ᓴᖅᑭᑎᑦᑎᓕᓚᐅᕐᓯᒪᕗᖅ ᐃᓄᐃᑦ ᐊᑐᕐᓂᖃᕐᓂᖏᓐᓂᑦ ᑲᓇᑕᐅᑉ ᐱᔪᓐᓇᐅᑎᖓᓄᑦ. ᐊᑲᐅᓈᓚᐅᕐᒥᔪᖅ ᐃᓄᖕᓄ ᐃᓚᒍᑕᖅ 35 ᐋᖅᑭᒋᐊᕐᓯᒪᓕᕐᑐᒥᓐ ᑲᓇᑕᐅᒻ ᒪᓕᒐᕐᔪᐊᖓ, 1982 ᐅᖃᕐᓯᒪᓂᖃᕐᓂᖓᓄᑦ ᓄᓇᑖᕋᓱᖕᓂᕐᒥᓐ.
ᐊᕐᕌᒍᒐᓴᑦ ᐊᓂᒍᕐᐸᓪᓕᐊᔪᑎᒍᑦ, ᒐᕙᒪᑐᖃᒃᑯ ᐊᒻᒪ ᓄᓇᑦᓯᐊᑉ ᒐᕙᒪᑯᖏ ᐊᓯᖑᓕᓚᐅᕐᐳᑦ, ᐊᒻᒪᓗ ᑕᒪᒃᑯᐊ ᐊᑐᐊᒐᑦ ᐊᒻᒪ ᒪᓕᒐᑦ. ᑲᑐᔾᔨᖃᑎᒌᖕᓂᐅᔪᑦ ᐃᓄᖕᓄ ᐊᓯᖑᕐᓯᒪᓚᐅᕐᐳᑦ ᐅᓄᕐᑐᐃᕐᓱᒻᒪᕆᒃᖢᑎᒃ. 1982-ᒥ, ᑐᙵᕕᒃᑯᑦ ᑲᑐᔾᔨᖃᑎᒌᖓ ᓄᓇᕗᒻᒧ ᓴᖅᑭᑕᐅᓕᓚᐅᕐᓯᒪᕗᖅ ᐋᔩᑲᑕᖕᓂᕐᒧᓐ ᑐᕌᖓᑎᑕᐅᓪᓗᓂ ᐃᓄᖕᓂ ᑭᒡᒐᕐᑐᐃᓪᓗᑎᒃ ᓄᓇᕗᒻᒥᐅᓂᑦ. ᐃᓛᓐᓂᒃᑯ ᓂᖓᓂᖅ ᓴᖅᑭᑉᐸᒃᑲᓗᐊᕐᑎᓪᓗᒍ, ᐃᓱᒪᒋᔭᖃᑦᑎᐊᕐᓂᖅ ᖁᕕᐊᓱᖕᓂᓪᓗ ᓴᖅᑭᔮᖏᓐᓇᖃᑦᑕᓚᐅᕐᓯᒪᕗᑦ ᑕᒪᐃᑎᒍᑦ ᐱᖓᓱᐃᓕᖃᖓᔪᓂᑦ ᐋᔩᕐᑎᐅᔪᓂᑦ, ᐋᑦᑕᐅᔭᓕᐊᓪᓚᒃᐸᒃᖢᑎᒃ ᐊᖅᑭᑦᑐᖓᓴᒃᓯᓕᐊᓪᓚᒃᐸᒃᖢᑎᒃ.
ᐊᖏᕈᑎᒥᓐ-ᐱᔾᔪᑎᒻᒪᕆᐅᔪᒧᓐ ᓴᖅᑭᑦᑐᖃᓕᓚᐅᕐᐳᖅ 1990-ᒥᓐ. ᑭᖑᓂᐊᒍᑦ ᐊᕐᕌᒎᒃ ᒪᕐᕉ ᐱᓕᕆᓂᐅᓕᓚᐅᕐᐳᑦ ᐋᖅᑭᒃᓱᐃᑲᓐᓂᕈᑕᐅᓪᓗᓂ ᓇᓗᓇᐃᕐᓯᒃᑲᓐᓂᕈᑎᓂᑦ, ᐱᖃᓯᐅᔾᔭᐅᓪᓗᓂ ᓂᕈᐊᕐᓂᖅ ᓄᓇᒥᓐ ᑲᒪᒋᔭᐅᓪᓗᓂ ᐋᔩᕐᑐᐅᔪᓂᑦ ᓄᓇᓕᖕᓄᑦ ᑕᒪᐃᓐᓄᑦ ᐳᓚᕋᖅᖢᑎᒃ.
ᑭᖑᓪᓕᖅᐹ ᐊᖏᕈᑎ ᐋᖅᑭᒃᑕᐅᓕᓚᐅᕐᓯᒪᕗᖅ ᓯᑎᐱᕆ 1992-ᒥᓐ, ᐊᒻᒪᓗ ᑕᒪᓐᓇ ᐊᖏᕐᑕᐅᓪᓗᓂ ᓄᓇᖃᕐᑐᓄᑦ ᐃᓄᖕᓄᑦ ᓂᕈᐊᕐᓂᒃᑯᑦ ᓄᕕᐱᕆ 3-ᒥ 5-ᒧ, 1992. ᐃᓚᖏᓐᓄᑦ ᓂᕈᐊᕐᑎᓄᑦ ᑕᒪᓐᓇ ᓈᒻᒪᓗᐊᓚᐅᖏᓚᖅ ᐊᔪᕐᓇᕈᑕᐅᕈᔪᒃᖢᓂ ᓲᖃᐃᒻᒪ ᐱᔪᓐᓇᐅᑎᓂ ᐃᓚᖏᓐᓂ ᓴᒃᑯᐃᒐᔭᕐᓂᖏᓐᓄᑦ ᓄᓇᒨᖓᔪᓂᑦ ᐊᒻᒪ ᐃᒪᕐᒥᐅᑕᕐᓄᑦ ᑕᒫᓂ ᓄᓇᕗᑦᖑᕐᓂᐊᕐᑐᒧᓐ, ᑭᓯᐊᓂᓕ ᑕᒪᓐᓇ ᐊᖏᓂᖃᕐᑐᖅ 355,842 ᑭᓘᒥᑕᓂᒃ ᐃᓄᐃᑦ ᓄᓇᒋᒐᔭᕐᑕᖓᑦ. ᐃᓱᐊᓂᓕ, 84.7 ᐳᓴᓐᑦ ᓂᕈᐊᕆᐊᕐᑐᑦ ᑕᒪᑐᒥᖓ ᐊᖏᓕᓚᐅᕐᐳᑦ ᐊᖏᕈᑎᒥᓐ.
“ᐃᓄᐃᑦ ᓂᕈᐊᕐᓂᖓ ᑕᒪᑐᒥᖓ ᓴᖅᑭᑎᑦᑎᒻᒪᕆᓕᓚᐅᕐᐳᖅ. ᐊᓯᖏᓐᓅᓚᐅᖏᑦᑐᕐᓕ,” ᐅᖃᕐᑐᖅ ᐊᖓᔪᒃᖠᖅ ᐋᔩᕐᑎ ᒐᕙᒪᑐᖃᒃᑯᓐᓄ ᐱᐅᕆ ᑑᕗ, ᑖᓐᓇ ᑎᔅᑲᕗᕆ ᑐᔪᕐᒥᕕᖕᒦᓚᐅᕐᑐᖅ ᐃᖃᓗᖕᓂ ᓂᕈᐊᕐᓂᐅᔪᖅ ᖃᓄᐃᓐᓂᖓ ᐅᖃᐅᓯᐅᑎᓪᓗᒍ. ᐱᖃᑎᖃᐅᕐᖢᓂ ᐋᔩᕐᑎᐅᔪᓂ ᐃᓄᖕᓂ — ᐹᓪ ᖁᐊᓴ, ᔭᐃᒻᔅ ᐃᑦᑐᓗᒃ, ᔮᒃ ᑯᐱᐅᓇ, ᐹᑉ ᑲᓪᓗᓐ — ᑕᒪᓐᓇᓕ ᐃᒃᐱᖕᓇᒻᒪᕆᓚᐅᕐᐳᖅ ᐊᑐᕐᑎᓪᓗᒍ.
“ᖁᕕᐊᓱᖕᓂᖅ, ᖃᓱᔾᔫᒥᓂᖅ, ᓴᖅᑭᑦᑎᓂᒻᒪᕆᐅᔪᖅ-ᐊᑕᐅᑦᑎᒃᑯ ᑲᑎᓯᒪᓚᐅᕐᐳᑦ ᑖᒃᑯᐊ ᑮᓇᐃ ᑕᑯᓪᓗᒋ.”
ᒪᐃ 25, 1993-ᒥ ᑭᖑᓪᓕᖅᐹᖅ ᐊᖏᕈᑎ ᐊᑎᓕᐅᕐᑕᐅᓕᓚᐅᕐᓯᒪᕗᖅ ᐃᖃᓗᖕᓂ, ᐊᖏᓂᕐᐹᖅ ᐊᖏᕈᓯᐊᕆᔭᐅᔪᖅ ᑲᓇᑕᒥ ᑕᐅᑐᒃᖢᒍ ᑮᓇᐅᔭᕐᑖᕆᔭᐅᓂᐊᕐᑐᖅ ᐊᒻᒪ ᓄᓇ: $1.1 ᐱᓕᐊᓐ ᑕᒪᓐᓇᓗ ᑐᓐᓂᖁᑕᐅᕙᖕᓂᐊᕐᖢᓂ ᐊᕐᕌᒍᑦ 1993-ᓗ 2007-ᓗ ᐊᑯᓐᓂᖓᓂ, ᐊᒻᒪ 1.9 ᒥᓕᐊᓐ ᑭᓛᒥᑕᔅ ᐊᖏᓂᖃᕐᑐᖅ ᓄᓇ ᐊᒻᒪ ᐃᒪᖅ, ᐱᖃᓯᐅᑎᓯᒪᓪᓗᓂ ᐅᔭᕋᐅᔭᓄᑦ ᐱᔪᓐᓇᐅᑎᓂᑦ ᐊᖏᓂᓕᖕᒥᑦ 35,257 ᑕᒪᑐᒪ ᓄᓇᑖᕆᔭᐅᔫᑉ ᐃᓗᐊᓂ.
ᓄᓇᕗᑦ ᑎᑭᑉᐸᓪᓕᐊᓪᓗᒍ
ᐊᕕᖕᓂᓪᓚᕆᒃ ᐊᑐᓚᐅᕐᑎᓐᓇᒍ 1999-ᒥ, ᓄᓇᑦᓯᐊᖅ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐱᖓᓲᓕᖅᑲᖓᓗᓂ ᐊᑕᐅᓯᖅ ᓄᓇᑦᓯᐊᖑᕋᔭᕐᑐᖅ ᐊᒻᒪᓗ ᑖᓐᓇ ᒪᕐᕈᐃᖑᕐᑎᓯᒪᓪᓗᓂ ᐃᒻᒥᒃᑰᕐᑐᓂ ᐊᕕᒃᓯᒪᓂᒃᑯᑦ — ᓈᐹᕐᑐᖃᐅᕐᑐᖅ ᒪᑲᓐᔩ ᕚᓕ ᐱᖓᕐᓇᕐᒦᑦᑐᖅ ᐊᒻᒪᓗ ᐃᓄᖃᐅᕐᖢᓂ ᐊᓪᓚᓂᑦ ᐃᓕᖁᓯᖃᑎᒌᙱᑦᑐᓂ ᐊᒻᒪ ᐊᓪᓚᖓᔪᓂ, ᐃᓄᖕᓂ ᐅᑭᐅᕐᑕᖅᑐᖅᒦᑦᑐᓂ ᐊᒻᒪᓗ ᓄᓇᖃᖅᑳᖅᓂᑰᖏᑦᑐᓂᑦ; ᐊᒻᒪᓗ ᑲᓇᖕᓇᕐᒥ ᑕᒪᓐᓇᓕ ᓈᐹᖅᑐᖃᔮᖏᑦᑐᖅ, ᐊᒻᒪᓗ 85 ᐳᓴᓐᑦ ᐃᓄᓪᓚᕆᐅᓪᓗᑎᒃ.
ᐃᓄᐃᑦ ᐋᔩᕐᑏ, ᔮᒃ ᑯᑉᐱᐅᓇ (ᓯᕗᓂᐊᓂ) ᐊᒻᒪ, ᑭᖑᓂᑦᑎᐊᖓᓂ, ᓵᒻ ᐅᒥᒃ, ᑕᓯᐅᖃᑦᑖᑲᑕᒃᑐᑦ ᖁᕕᐊᓱᒃᑐᓂᑦᑕᐅᖅ ᐊᑎᓕᐅᕐᓂᖃᓚᐅᕐᑎᓪᓗᒍ ᓄᓇᕗᑦ ᒪᓕᒐᖓᓂᑦ ᐃᖃᓗᖕᓂ, ᐊᒃᑑᐸ 1992.
ᒎᓗᒥ ᐱᖓᖕᓇᒥᓐ ᓇᓂᓯᔪᖃᓚᐅᕐᓯᒪᕗᖅ, ᐊᒻᒪ ᑭᖑᓂᐊᒍᑦ ᐅᖅᓱᐊᓗᒃᓴᒥᓐ. ᐊᕐᕌᒍᑦ 40 ᓯᕗᓂᑦᑎᓐᓂ, ᐃᓚᖏ ᓄᓇᖃᖅᑐᑦ ᐊᕕᖕᓂᕐᒥᓐ ᐃᓱᒪᒋᔭᖃᖃᑦᑕᓕᓚᐅᕐᓯᒪᕗ ᓄᓇᑦᓯᐊᕐᒥ ᑕᒪᓐᓇ ᐱᖓᖕᓇᖅ ᐱᕙᓪᓕᐊᔪᓐᓇᕐᓂᐊᕐᒪᓐ. 1963-ᒥ ᑏᕙᓐᐸᐃᑯ ᒐᕙᒪᖏ ᐊᓂᒍᐃᑎᑦᑎᑲᓴᑦᑎᐊᓚᐅᕐᓯᒪᕗᑦ ᐊᕕᖕᓂᕐᒥᓐ, ᑭᓯᐊᓂᓕ ᑕᒪᓐᓇ ᓄᖃᐅᔾᔭᐅᓕᓚᐅᕐᓯᒪᔪᖅ ᓵᓚᐅᖕᒪᑕ ᓂᕈᐊᕐᓂᒃᑯ. 1966-ᒥ, ᑯᕋᑐᔅ ᑲᐅᔨᓴᕐᓂᕆᔭᖓ, ᒐᕙᒪᑐᖃᒃᑯᑦ ᖃᐅᔨᓴᕈᑕᐅᑎᑕᖓ ᖃᐅᔨᒐᓱᒃᓗᑎ ᑖᔅᓱᒥᖓ ᐊᐱᖅᑯᑎᒥᓐ, ᐃᓱᒪᒋᔭᐅᔪᖅ ᐊᕕᖕᓂᐅᔪᒥᓐ. ᐃᓱᒪᒋᔭᐅᓚᐅᕐᐳᕐᓕ ᑕᒪᓐᓇ ᐊᕕᖕᓂᐅᔪᖅ ᐃᓚᐃᓐᓇᖅᓯᐅᕐᓂᐊᕋᓱᒋᔭᐅᓪᓗᓂ “ᓄᓇᖃᖅᑳᖅᑐᑦ ᐅᑭᐅᕐᑕᖅᑐᒥ ᓇᖕᒥᓂᖅ ᒐᕙᒪᖃᕐᓂᕐᒧᓐ ᐃᓚᐅᖏᑐᐃᓐᓇᕆᐊᖃᕆᔭᐅᓪᓗᑎᒃ.”
ᑲᑎᒪᔩᑦ ᓄᓇᑦᓯᐊᕐᒧ, ᐃᖅᑲᓇᐃᔭᕐᑏ ᒐᕙᒪᑐᖃᒃᑯᓐᓄ ᐋᑐᕚᒥ, ᐃᓚᑖᕐᐸᓪᓕᐊᓕᓚᐅᕐᐳᑦ ᐊᓪᓚᓂᑦ, ᐊᓪᓚᖓᔪᓂᑦ ᐊᒻᒪ ᐃᓄᖕᓂ, ᐱᖃᓯᐅᑎᓪᓗᑎᒃ ᐊᐃᑉ ᐅᒃᐱᒃᒥ ᐊᒻᒪ ᓴᐃᒨᓂ ᒪᐃᑯᓪᒥᓐ 1960 ᐊᑯᓐᓂᖓᓂᑦ. 1967ᒥ, ᑲᒥᓯᓇᐅᑉ ᐊᒡᓚᒡᕕᖓ ᓄᓇᑦᓯᐊᕐᒥ, ᑲᑎᒪᔩᓪᓗ ᓄᒃᑎᓕᓚᐅᕐᓯᒪᕗᑦ ᔭᓗᓇᐃᕝᒧᓐ, ᐊᒻᒪᓗ 1975 ᑎᑭᑎᓪᓗᒍ, ᑲᑎᒪᔩ ᓂᕈᐊᕐᑕᐅᓂᒃᑯ ᒪᓕᒐᓕᐅᕐᑎᐅᓕᓚᐅᕐᓯᒪᕗᑦ. 1980ᒥ, ᑲᓇᑕᐅᑉ ᐊᖏᔪᖅᑳᖅᐹᖓ ᐱᐅᕐ ᑐᕉᑑ ᑭᒡᒐᕐᑐᐃᔨᖓ, ᓯ. ᐊᒻ. ᑐᕉᕆ (C. M. Drury), ᓴᖅᑭᑦᑎᓕᓚᐅᕐᓯᒪᕗᖅ ᑲᑎᒪᔨᕋᓛᓂ ᓴᖅᑭᑦᑐᖃᖁᔨᓪᓗᓂ ᑕᒪᑐᒥᖓ ᐊᕕᖕᓂᕐᒥ ᖃᐅᔨᓴᕐᓂᐊᕐᑐᓂᑦ. ᑖᒃᑯᐊᓕ ᑲᑎᒪᔨᕋᓛᑦ ᐊᕕᖕᓂᕐᒥ ᐃᓱᒪᒋᔭᖃᓕᓚᐅᕐᓯᒪᕗᑦ, ᓂᕈᐊᕐᓂᕐᒥᓐ ᓴᖅᑭᑦᑐᖃᓚᐅᕐᑎᓪᓗᒍ ᓄᓇᖃᕐᑐᑦ ᐃᓚᐅᓪᓗᑎᒃ.
ᐄᐱᕈ 1982ᒥ, ᓄᓇᑦᓯᐊᓕᒫᒥ ᓂᕈᐊᕐᓂᖅᑕᖃᓚᐅᕐᐳᖅ “ᐊᖏᕐᑐ” ᐊᒥᓲᓂᕐᓴᐅᒻᒪᕆᒃᖢᑎᒃ; ᐊᒻᒪ ᓄᕕᐱᕆ ᑕᕝᕙᓂ ᐊᕐᕌᒍᑦᑕᐃᓐᓇᕐᒥ, ᑲᓇᑕᐅᑉ ᒐᕙᒪᖏ ᑐᓴᕐᑎᑦᑎᓕᓚᐅᕐᐳᑦ ᐊᖏᕐᓂᕐᒥᖕᓂ ᓄᓇᕗᑦ ᓴᖅᑭᑦᑐᒃᓴᐅᓂᖓᓂ, ᑭᓯᐊᓂ ᓂᕈᐊᕐᓂᕐᑕᖃᓚᐅᕐᑎᓪᓗᒍ ᐊᒻᒪᓗ ᐊᓯᖏᓐᓂ ᐱᖁᔭᐅᔪᓂ ᐊᑐᕐᓂᐊᕈᑎᒃ. ᑭᖑᓂᑦᑎᐊᖓᒍ, ᑲᓇᖕᓇᕐᒧ ᑭᒡᒐᕐᑐᐃᔨᒥ ᐱᒋᐊᕐᑐᖃᓚᐅᕐᓯᒪᕗᑦ ᓄᓇᑦᓯᐊᕐᒧᑦ, ᐊᒻᒪᓗ ᑭᒡᒐᕐᑐᐃᔨᖃᓕᕐᖢᑎᒃ ᓯᕗᓪᓕᖅᐹᒥᓐ ᐃᓄᓪᓚᕆᖕᒥ ᒪᓕᒐᓕᐅᕐᑎᒥᓐ, ᐲᑕ ᐃᑎᓐᓄᐊᕐ.
ᒐᕙᒪᒃᑯ ᓄᓇᑦᓯᐊᕐᒧ ᓴᖅᑭᑦᑎᓚᐅᕐᐳᑦ ᒪᓕᒐᕐᔪᐊᖅᒨᕐᑐᒃᓴᒥᓐ ᑕᐃᔭᐅᔪᖅ Constitutional Alliance, ᐊᒻᒪ ᒪᕐᕈᐃᓂ ᖃᐅᔨᓴᕐᑎᓂ ᓴᖅᑭᑦᑐᖃᕆᓪᓗᓂ: ᐱᖓᖕᓇᕐᒥ ᒪᓕᒐᓕᕆᔨᒃᓴᑦ ᐊᒻᒪᓗ ᓄᓇᕗᒻᒧ ᒪᓕᒐᓕᕆᔨᒃᓴᑦ. ᐊᕐᕌᒍᒐᓵᓗᐃᑦ ᐊᑐᕐᑕᐅᓚᐅᕐᐳᑦ ᖃᐅᔨᓴᕐᓂᕐᒧᓐ, ᒐᕙᒪᑐᖃᒃᑯ ᒪᓕᒐᓕᕆᒐᓗᐊᕐᑎᓪᓗᒋᑦ ᐊᒻᒪ ᐅᑭᐅᕐᑕᖅᑐᕐᒥ ᓄᓇᑖᕋᓱᒃᑲᓗᐊᕐᑎᓪᓗᒋᑦ. 1984ᒥ, ᐃᓅᕕᐊᓗᐃᑦ ᒪᑲᓐᔨ ᑎᐊᑕᒥ, ᑖᒃᑯᐊᑦᑕᐅᖅ ᐃᒻᒥᒃᑯ ᓄᓇᑖᕋᓱᒃᑎᓪᓗᒋ, ᐊᑎᓕᐅᓚᐅᕐᓯᒪᕗᑦ ᐊᖏᕈᑎᒥᓐ ᑲᓇᖕᓇᕐᒥᐅᑦ ᐃᓄᖏᓐᓂ ᐃᓅᖃᑎᒌᖕᓂᖏᓐᓄᑦ, ᐊᒻᒪᓗ ᐊᕕᒡᕕᐅᒐᔭᕐᑐᒥᓐ ᐱᑖᕆᒐᓱᒃᑕᖏᓐᓂᑦ. 1987ᒥ, ᑖᒃᑯᐊ ᒪᕐᕉᒃ ᐱᓕᕆᔩ ᐊᖏᕈᑎᒥᓐ ᐊᑎᓕᐅᓚᐅᕐᐳᑦ ᐊᕕᒃᕕᐅᒐᔭᕐᑐᒥᓐ ᓄᓇᕗᒻᒥ ᐊᒻᒪ ᐱᖓᖕᓇᕐᒥ ᓄᓇᑦᓯᐊᕐᒥ (ᐊᒻᒪᓗ ᐊᑎᕐᒥ ᐅᖃᓚᐅᖏᓐᓂᖏᓐᓂᑦ, ᑖᒃᑯᐊ ᓱᓕ ᓇᓗᓇᐃᕐᑕᐅᕙᒃᐳᑦ ᓄᓇᑦᓯᐊᕐᒥᓐ).
ᓂᐱᖃᖏᐅᔭᕐᑐᒥᓐ, ᐊᒡᓚᒡᕕᖕᒥ ᐃᒡᓗᐊᓗᖕᒥ ᐋᑐᕚ ᑐᔪᕐᒥᕕᖓᑦᑕ ᐃᓚᖓᓐᓂ, ᓄᓇᕗᑦ ᒪᓕᒐᓕᕆᓂᕐᒧ ᐃᓚᓕᐅᔾᔭᐅᓂᖓᓂ ᑕᒪᓐᓇᓗ ᐱᒋᐊᕈᑎᒻᒪᕆᐅᓪᓗᓂ ᑲᓇᑕᐅᑉ ᓄᑖᖑᓛᖅ ᐃᒥᒃᑰᕐᑐᖅ ᐊᕕᒃᓯᒪᓂᒃᑯ ᐊᑎᓕᐅᕐᑕᐅᓕᓚᐅᕐᐳᖅ ᔮᓐ ᐊᒪᕈᐊᓕᖕᒧᓐ ᑐᙵᕕᒃᑯᓐᓂᕐᖢᓂ, ᐋᔩᕐᑎᓪᓚᕆᒃ ᐃᓄᖕᓄᑦ; ᔮᒃ ᔅᑖᒡ, ᒐᕙᒪᑐᖃᒃᑯ ᐋᔩᕐᑎᖓ; ᐊᒻᒪᓗ ᓕᒡ ᓯᓇᐃᑐ, ᓄᓇᑦᓯᐊᑉ ᐋᔩᕐᑎᖓ. ᓂᕈᐊᕐᓂᖅᓕ ᖃᐅᔨᔾᔪᑕᐅᓕᒑᓪᓗᓂ ᓄᓇᑦᓯᐊᕐᒥᐅᑦ ᐊᖏᕋᓗᐊᕆᐊᒃᓴᖏᓐᓂᑦ.
ᒪᐃ 1992 ᓂᕈᐊᕐᓂᒃᑯ, ᐅᓄᕐᓂᖅᓴᑦ ᓄᓇᑦᓯᐊᕐᒥ ᐊᕕᖕᓂᐅᓂᐊᕐᑐᒥᓐ ᐊᖏᓚᐅᕐᓯᒪᕗᑦ. ᐊᖏᕈᑎ ᐊᑎᓕᐅᕐᑕᐅᓪᓗᓂ ᐊᑑᐸ 30, 1992ᒥ ᒥᓂᔅᑕᓄᑦ ᒐᕙᒪᑐᖃᒃᑯᓐᓄ ᐊᒻᒪᓗ ᓄᓇᑦᓯᐊᕐᒧᓐ ᐊᒻᒪᓗ ᐊᖓᔪᖅᑳᒧᓐ ᑐᙵᕕᒃᑯᓐᓄᑦ. ᒪᓕᒐᓕᐅᕐᕕᐊᓗ ᐊᖏᓕᓚᐅᕐᓯᒪᕗᑦ ᓄᓇᕗ ᒪᓕᒐᖓᓂᑦ, ᑕᒪᓐᓇᓗ ᓴᖅᑭᑦᑎᔾᔪᑕᐅᓕᒑᓪᓗᓂ ᓄᓇᒥᓐ ᐄᐱᕈ 1, 1999ᒥᓐ.
ᐃᓄᐃᑦ ᓇᓂᓯᓚᐅᕐᐳᑦ ᓯᕗᓕᐅᕐᑎᓂ ᓴᖅᑭᑦᑎᔪᓐᓇᕐᑐᓂᑦ
ᐊᕐᕌᒍᑦ 100 ᐃᓗᐊᓂ, ᐃᓄᐃᑦ ᓱᑯᑦᑲᒥᓐ ᐊᑯᑭᑦᑐᓄᑦ ᐊᓯᖑᐃᓂᕐᒥ ᖃᐅᔨᓯᒪᕗᑦ ᐊᒻᒪᓗ ᑕᒪᓐᓇ ᐱᕙᓪᓕᐊᑎᑦᑎᔨᐅᕙᒃᑐᓂᑦ ᐊᑐᕐᑕᐅᒐᔭᓚᐅᕐᑐᖅ ᐊᕐᕌᒍᓂ 5000ᓂ. ᐅᓇ ᐊᓯᖑᐃᓂᖅ ᐅᖁᒪᐃᒃᓴᕈᑕᐅᓯᒪᕗᖅ ᐃᓄᖕᓂ, ᐃᒻᒥᑰᕐᓂᒃᑯ ᐊᑕᐅᑦᑎᒃᑯᓪᓘᓐᓕᑦ, ᑭᓯᐊᓂᓕ ᐊᔪᕈᓐᓕᕈᑕᐅᓯᒪᔪᑦ ᐊᖑᓇᓱᖕᓂᒃᑯ ᐊᔪᖏᔾᔪᑕᐅᒻᒪᕆᓚᐅᕐᐳᖅ ᐊᓯᖑᕐᐸᓪᓕᐊᔪᒥᓐ ᐃᓚᓕᐅᑎᔪᓐᓇᕐᓂᕐᒥᓐ ᓄᓇᖅᔪᐊᒥᓐ.
ᑕᐃᕕᑦ ᐊᓚᕋᓚᒃᑎᑐᑦ, ᖁᓛᓂ, ᓇᓴᕐᓯᒪᔪᖅ, ᐊᒻᒪ ᔪᐊᔾ ᖁᓚᐅᑦᑎᑐᑦ ᓯᕗᓂᒃᓴᑦ ᐅᓪᓗᑦ ᓂᕆᐅᓇᕐᓯᕗᑦ ᐊᐅᓚᑦᑎᓂᓕᕆᓂᖅ ᐱᓕᕆᐊᖑᓂᐊᓕᕐᑎᓪᓗᒍ ᓄᓇᕗᒻᒥ, ᖃᐅᔨᒪᔭᐅᔪᖅ, ᐃᓄᖕᓄᑦ, ᐊᖅᑯᑎᐅᓂᐊᕐᑐᖅ ᐋᖅᑭᒃᓱᕐᓂᐊᕐᑕᖓᑦ ᐃᓄᐃᑦ ᓂᕈᐊᕆᔭᖓᑦᑎᒍᑦ.
ᐃᓄᐃᑦ ᑲᑎᖃᑎᒌᓯᒪᕗᑦ ᓄᓇᕐᔪᐊᒥ ᐃᓄᐃᑦ ᑲᑎᒪᓂᖏᑦᑎᒍᑦ, ᑕᐱᕇᒃᓴᑯᑎᒍᑦ, ᐊᒻᒪᓗ ᐊᕐᓇᐃᑦ ᑲᑐᔾᔨᖃᑎᒌᖏᑦᑎᒍ, ᐸᐅᒃᑑᑎᑦ. ᐊᕕᒃᑐᕐᓯᒪᓂᒃᑯ ᐊᒻᒪᓗ ᓄᓇᓕᖕᓄ ᑐᕌᖓᔪᓂ ᑲᑐᔾᔨᖃᑎᒌᖕᓂᕐᑕᖃᐅᕐᐳᖅ ᐊᔾᔨᒌᖏᕈᓘᔭᕐᑐᓂᑦ, ᐱᖃᓯᐅᑎᓪᓗᒍ ᑯᐊᐸᒃᑯᑦ ᐊᒻᒪ ᒐᕙᒪᒃᑯ. ᑕᕝᕘᓇ ᐱᓕᕆᖃᑎᒌᖕᓂᒃᑯ ᐃᒻᒪ ᐃᓕᓴᕇᖃᒃᑕᐅᑎᓂᒃᑯ, ᐃᓄᐃᑦ ᑲᓇᑕᒥᐅᑕᑦ ᐋᔩᕐᓂᒃᑯ ᑎᓴᒪᓂ ᓄᓇᑖᕋᓲᑎᓂ ᐱᓯᒪᓕᕐᐳᑦ. ᑖᓐᓇᓕ ᓄᑖᖑᓛᖅ ᐃᒻᒥᒃᑰᕐᑐᖅ ᐊᕕᒃᓯᒪᓂᒃᑯ, ᓄᓇᕗᑦ ᐊᖏᕈᑎᖓ ᐊᖏᓛᒻᒪᕆᐅᕗᖅ ᑕᐃᒪᐃᑦᑐᓂᑦ ᓄᓇᕐᔪᐊᓕᒫᒥᓐ.
ᐃᓄᐃᑦ ᓵᓚᖃᓕᓚᐅᕐᓯᒪᕗᑦ 1976ᒥ ᓄᓇᑖᕋᓲᑎᐅᒐᓗᐊᕐᒥ ᓴᖅᑭᑦᑎᖕᒑᕐᖢᑎᒃ ᓄᑖᖑᕆᐊᕐᓯᒪᔪᒥ ᓄᓇᑖᕋᓲᑎᒥ ᓴᖅᑭᔮᕐᑎᑦᑎᓂᕐᓴᒥᓐ ᐃᓄᐃᑦ ᐃᓕᖁᓯᖏᓐᓂ. ᑕᒪᓐᓇ ᑕᐅᑐᒃᖢᒍ ᐊᔾᔨᒌᖏᓗᐊᓚᐅᕐᓯᒪᖕᒪᑕ ᐱᓕᕆᔪᐃᑦ ᑕᐃᒪᓕ ᑕᒪᓐᓇ ᓵᓚᒋᔭᐅᑐᐃᓐᓇᓕᓚᐅᕐᓯᒪᕗᖅ. ᓄᓇᑖᕋᓱᖕᓂᕐᒧᓐ ᐊᒻᒪᓗ ᓄᑖᒥ ᐃᒻᒥᒃᑰᕐᑐᒥ ᓄᓇᒥ ᓴᖅᑭᑦᑎᓇᓱᖕᓂᐅᔪᖅ ᓴᖅᑭᑦᑎᓕᓚᐅᕐᐳᖅ ᒐᕙᒪᓕᕆᓂᐅᔪᒥᓐ, ᑮᓇᐅᔭᕐᑐᔪᓕᕆᓂᕐᒥᓐ ᐊᒻᒪ ᐃᖅᑲᖅᑐᐃᕕᓕᕆᓂᕐᒥᓐ.
ᐃᓄᐃᑦ ᐱᓕᕆᔾᔪᑎᖓ ᓵᓚᒃᓴᓕᓚᐅᕐᐳᖅ ᑭᖑᓂᐊᒍᑦ, ᑭᓯᐊᓂᓕ, ᐋᔩᖃᑎᒌᑯᑖᖕᓂᕐᑕᖃᕐᖢᓂ ᑲᑎᒪᕕᖕᓂ ᐊᒻᒪ ᓯᓚᑖᓂᑦ. ᐃᓄᐃᑦ ᐋᔩᕐᑎᖏ ᐃᓅᖃᑎᒥ ᐃᓱᒪᒋᔭᖃᑦᑎᐊᖏᓐᓇᓚᐅᕐᐳᑦ, ᓂᕈᐊᕐᓂᕐᓴᐅᓪᓗᑎ ᑐᑭᓯᐅᒪᓂᕐᒥᓐ ᒪᑯᓇᖓ ᐱᐅᖂᔨᔾᔪᑎᓂ ᐊᒻᒪ ᑭᐅᒻᒪᕆᑦᑎᐊᕈᓐᓇᕐᓂᕐᒥᓐ. ᑕᒪᐅᓇ, ᐊᔩᖃᑎᒌᖕᓂᖅ ᐱᓕᕆᖃᑎᒌᖕᓂᕐᒥ ᓴᖅᑭᑦᑎᓚᐅᕐᐳᖅ ᐋᖅᑭᒃᓱᐃᕙᓪᓕᐊᓂᒃᑯ ᐱᓗᐊᕐᑐᒥ ᐊᕙᑎᓕᕆᓂᕐᒥ ᐊᐅᓚᑦᑎᓂᕐᒥ.
ᐊᒥᓱᕈᓘᔭᐅᕙᒃᑲᓗᐊᕐᑎᓪᓗᒋ ᐱᓕᕆᖃᑎᒌ ᐊᓯᖑᕐᐸᓕᐊᓂᖏ ᐃᓄᐃᑦ ᓄᓇᖏᓐᓂ, ᐱᓕᕆᖃᑎᒌ ᓯᕗᓕᐅᕐᑏ ᐊᒻᒪᓗ ᐱᓕᕆᐊᒥ ᐱᓇᓱᒻᒪᕆᒃᑐᑦ ᐊᑐᐃᓐᓇᓚᐅᕐᐳᑦ ᐃᓕᖁᓯᒥᓐ ᐱᔾᔪᑕᐅᒐᓱᒃᑐᒥᓪᓗ ᐊᕐᕌᒍ ᐊᒥᓱᑦ ᐊᑐᕋᓗᐊᕐᑎᓪᓗᒋ. ᒐᕙᒪᒃᑯᓪᓕ, ᒐᕙᒪᑐᖃᒃᑯ ᐊᒻᒪ ᓄᓇᑦᓯᐊᕐᒥ, ᑭᐅᖃᑦᑕᓚᐅᕆᕗᑦ ᑕᐃᒪᓐᓇᑦᑕᐃᓐᓇᖅ ᐃᓄᐃᑦ ᐱᓕᕆᔾᔪᓯᖏᑦᑎᑐᑦ.
ᐊᒥᓱᑦ ᐃᓄᐃᑦ ᖃᐅᔨᒪᕗᑦ ᐊᑲᐅᖏᓕᐅᕈᑎᓂᑦ ᐊᐴᑎᓂᐊᕐᓂᖏᓐᓂ ᓄᓇᕗᒻᒥ — ᐱᖃᓯᐅᑎᓪᓗᒍ ᐱᕙᓪᓕᐊᓂᖅ ᐱᑕᖃᓗᐊᖏᓐᓂᖓ, ᓂᐅᕕᖅᕕᓪᓚᕇᑦ ᐅᖓᓯᖕᓂᖏ, ᓯᓚ ᐊᑲᐅᖏᓚᐅᑲᒃᐸᖕᓂᖓᓂᑦ, ᐊᒻᒪᓗ ᐸᕐᓇᒃᓯᒪᓗᐊᖏᑦᑐᓂᑦ ᓄᓇᖃᕐᑐᓂᑦ.
ᑕᒪᒃᑯᓄᖓᓕ ᓇᓗᖁᑎᒡᒍᔪᓄ, ᐊᐱᕆᔪᓐᓇᕐᐳᒍᑦ, “ᖃᔅᓯᓪᓕᑭᐊᖅ ᐃᓄᐃᑦ ᖃᐅᔨᒪᓚᐅᕐᐸᑦ ᐊᕐᕌᒍ 50 ᐊᓂᒍᕐᓯᒪᓕᕐᐸ, ᑲᓇᑕᒥᐅᑕᑦ ᐃᓄᐃᑦ ᓇᖕᒥᓂᖃᕐᓂᐊᕐᓂᖏᓐᓂ ᐊᐅᓚᑦᑎᔨᐅᓂᐊᕐᓂᖏᓐᓂ ᑮᓇᐅᔭᕐᑐᔪᕐᔪᐊᕌᓗᖕᓂ ᑯᐊᐳᕇᓴᓂᑦ, ᐊᒻᒪ ᐅᓇ ᐃᓚᓕᐅᑎᓪᓗᒍ ᐅᓄᕐᓂᕐᓴᑦ ᓄᓇᖃᕐᑐᑦ ᐃᓚᐅᓇᔭᕐᓂᖏᓐᓂᑦ ᓄᓇᖏᓐᓂ, ᐊᕕᒃᑐᕐᓯᒪᓂᖁᓪᓗ ᒐᕙᒪᓕᕆᓂᕐᒧᓐ?” ᑭᓇᑐᐃᓐᓇᖅ ᑕᐃᒪᓐᓇ ᓂᕆᐅᒃᑐᒃᓴᐅᓚᐅᖏᓚᖅ ᐊᓯᖑᕐᑐᒃᓴᒥᓐ, ᑭᓯᐊᓂᓕ ᐃᓄᐃᑦ ᖃᐅᔨᒪᖕᒪᑕ ᐆᒪᒋᐊᖃᕐᓂᕐᒥᓐ ᐊᒻᒪᓗ ᐃᓅᓯᕐᒥᖕᓂ ᐊᐅᓚᑦᑎᒋᐊᖃᕐᓂᕐᒥ ᐊᒻᒪ ᓄᓇᓂᑦ. ᓇᓂᓯᓚᐅᕐᐳᑦ ᓯᕗᓕᐅᕐᑎᓂ ᑕᒪᑐᒥᖓ ᓴᖅᑭᑦᑎᔪᓐᓇᕐᑐᓂᑦ. ᑕᐃᒃᑯᐊ ᐊᓯᖏ ᐱᔭᕆᐊᖃᕐᑕᒥᖕᓂ ᐊᑐᕈᑎ, ᐃᓚᒃᑲᓐᓂᐊᕐᔪᒡᓗᒍᓘᓐᓕ, ᐃᓄᐃᑦ ᓄᓇᕗᒻᒥ ᑲᔪᓯᑎᑦᑎᑦᑎᐊᕈᓐᓇᕐᑐᑦ.
