“ᒪᓕᒐᓕᕆᓂᒃᑯ ᐱᓕᕆᓂᖅ ᐊᑲᐅᓂᖅᓴᐅᖏᓐᓇᐅᔭᕐᒪᓐ ᑲᓂᒃᓴᕐᓂᕐᓴᐅᓪᓗᓂ ᐃᓄᖕᓂ ᐅᖓᓯᒃᑐᒥᐅᖕᒋᑦᑐᖅ.”
ᔭᒃ ᔅᑖᒡᔅ, ᐊᖓᔪᖅᑳᖅ ᒐᕙᒪᑐᖃᒃᑯᓐᓂ ᐋᔩᕐᑎᓄᑦ ᓄᓇᕗᑦ ᒪᓕᒐᓕᕆᓂᖓᓄᑦ
ᑭᒃᑯᑐᐃᓐᓇᕐᓄᑦ ᒐᕙᒪ
ᐊᒥᓱᓪᓗᑎᒃ ᐃᓄᐃᑦ ᐱᔨᑦᑎᖅᑐᓂ ᑭᒃᑯᓗᒃᑖᓄᑦ,
ᓴᙱᓂᕆᔭᐅᔪᓂᒃ ᐊᔪᙱᔾᔪᑕᐅᔪᓂᒡᓗ ᓅᓯᒪᔪᖃᕐᓂᖅ,
ᐃᓛᒃᑯᑦ ᓴᓇᖃᑎᖃᕐᓂᕐᒥᒃ ᓄᓇᕗᑖᕈᑎᐅᔪᒥᒃ ᐊᖏᕈᒻᒧᒃ —
ᑕᒪᒃᑯᐊ ᐃᓚᖏᑦ ᐱᔾᔪᑕᐅᔪᑦ ᓄᓇᕗᑦ ᒐᕙᒪᒋᓂᐊᕐᑕᖓ ᐊᔾᔨᒋᔭᐅᙱᑦᑐᒥᒃ ᒐᕙᒪᐅᓂᖓᓄᑦ
ᓄᑖᖅ ᒪᓕᒐᓕᐅᕐᕕᒃᓴᖅ ᐃᖃᓗᖕᓂ — ᒐᕙᒪ ᐃᓄᖕᓄᑦ, ᐃᓄᖕᓂ ᐊᐅᓚᑕᐅᓗᓂ.
ᖁᓛᓂ: ᑐᒃᑐ ᓂᕿᒃᓴᕐᓯᐅᕐᐳᑦ ᑲᓇᑕᐅᑉ ᓄᑖᖑᓛᖅ ᐃᒻᒥᒃᑰᕐᑐᖅ ᓄᓇ ᐊᕕᒃᓯᒪᓂᒃᑯ ᐊᖓᔪᖅᑳᖃᕐᕕᖓᓂ, ᐃᖃᓗᐃᑦ.
[ᒐᕙᒪ ᐊᒻᒪᓗ ᓄᓇᕗᑖᕐᓂᕐᒧᑦ ᐊᖏᖃᑎᒌᒍᑎᕕᓂᖅ]
[ᐊᖏᖃᑎᒌᖕᓂᒃᑯᑦ ᒐᕙᒪᓕᕆᓂᖅ, ᐊᒻᒪᓗ ᓂᕈᐊᕐᓂᖅ]
[ᓴᙱᓂᕆᔭᐅᔪᓂᒃ ᐊᔪᙱᓐᓂᕆᔭᐅᔪᓂᒡᓗ ᓄᒃᑎᕆᕙᓪᓕᐊᓂᖅ]
[ᐃᖏᕐᕋᓂᖅ ᓄᑖᒃᑯᑦ ᐊᖅᑯᑎᒃᑯᑦ]
ᓂᕐᕙᐃᒍᕕᑦ 28-ᓂᒃ ᓄᓇᓕᖕᓂᒃ, ᓯᐊᒻᒪᒡᓗᒋᑦ ᐅᖓᑖᓂ ᒪᕐᕉᒃ ᒥᓕᐊᓐᓄᑦ ᑭᓗᒦᑕᓄᑦ ᓯᒃᑭᒃᑕᓄᑦ ᓯᓚᕐᔪᐊᑉ ᖄᖓᓄᑦ ᓄᓇᖁᑎᖓᓄᑦ, ᓄᓇ ᑲᑉᐱᐊᓇᖅᑐᖃᖅᐸᒃᑎᓪᓗᒍ ᐊᒻᒪᓗ ᐃᓚᓗᒍ ᒐᕙᒪᒥᒃ ᑲᔪᓯᑎᑦᓯᒋᐊᖃᕐᓂᕐᒥᒃ, ᑕᐃᒪᓗ ᑲᑉᐱᐊᒋᔭᐅᓕᕋᔭᖅᑐᖅ ᑭᓇᑐᐃᓐᓇᕐᒧᑦ ᒐᕙᒪᓄᑦ ᐱᔨᑦᑎᖅᑎᐅᒍᒪᒐᔭᖅᑐᒧᑦ. ᑭᓯᐊᓂᓕ ᑕᐃᒪᓐᓇᑦᑎᐊᖅ ᓴᓇᔭᒃᓴᐅᔪᑦ ᐱᑕᖃᓕᖅᑐᑦ ᓄᓇᕗᒥᐅᓄᑦ ᑲᒪᒋᔭᐅᒋᐊᓕᖕᓂᒃ ᑎᑭᓕᖅᑎᓕᖅᑎᓪᓗᒍ ᐄᐳᕆ 1, 1999.
ᐃᓄᖕᓄᓪᓕ ᑭᓯᐊᓂ, ᖃᐅᔨᒪᔭᐅᑦᑎᐊᖅᑐᑦ ᐊᔪᙱᕈᓗᖕᓂᖏᓐᓄᑦ, ᓄᓇᕗᑦ ᑲᔪᓯᑎᑕᐅᓂᖓ ᐊᒻᒪᓗ ᒐᕙᒪᖓᑕ ᐊᐅᓚᑦᑎᕝᕕᐅᒐᔭᕈᑎᖓ ᐸᕐᓇᒃᑕᐅᑦᑎᐊᖅᓯᒪᓕᕐᒪᑎᒃ. ᐊᒻᒪᓗ ᐊᒫᖏᑦ ᐱᒋᐊᖅᓯᒪᒍᑎᖏᑦ ᓯᕗᓂᐊᒍᑦ ᐋᖅᑭᒃᓱᖅᑕᐅᓂᒃᑯᑦ ᐊᒃᓱᕈᕈᑕᐅᓂᒃᑯᑦ ᐃᖏᕐᕋᓕᖅᑎᑕᐅᓯᒪᔪᑦ ᓯᕗᓂᕐᒧᑦ ᐃᔨᒋᑦᑎᐊᕐᓂᕐᒧᑦ ᐃᓱᒪᓕᐅᑦᑎᐊᕈᑎᒧᓪᓗ.
ᒐᕙᒪᒋᔭᐅᔪᖅ ᓄᓇᕗᒥ ᑭᒃᑯᑐᐃᓐᓇᕐᓄᑦ ᒐᕙᒪᒋᔭᐅᔪᖅ, ᐃᒪᐃᙱᓪᖢᓂ ᖃᓄᐃᓐᓂᖓᓂᒃ ᒪᓕᒃᖢᓂ ᐃᓄᖁᑎᖃᕐᓂᖓᓂᒃ ᒐᕙᒪᐅᙱᑦᑐᖅ. ᐊᖏᖃᑎᒌᒐᓱᐊᖅᑎᑦ ᓱᓕᕆᐊᖃᓚᐅᖅᑐᑦ ᓄᓇᕗᑖᕐᓂᕐᒧᑦ ᐊᖏᖃᑎᒌᒍᑎᕕᓂᕐᒥᒃ ᓂᕈᐊᓚᐅᕐᒪᑕ ᐱᒋᐊᕐᓂᖓᓐᓂ ᑭᒃᑯᑐᐃᓐᓇᕐᓄᑦ ᒐᕙᒪᖃᕐᓂᕐᒥᒃ. ᐃᓱᒪᓕᐅᖅᑐᕕᓕᑦ ᐃᓱᒪᑦᑎᐊᖅᖢᑎᒃ ᓄᓇᕗᑖᕋᓱᐊᕈᑎᒃᓴᒥᒃ. ᑖᒪᔅ ᓱᓗᒃ, ᐊᖏᖃᑎᒌᒐᓱᐊᖅᑐᓂ ᐊᖓᔪᖅᑳᖑᖃᑕᐅᔪᖅ ᓯᕗᓕᖅᑎᐅᓪᓗᓂ, ᐃᖅᑲᐅᒪᓚᐅᖅᑐᖅ ᐃᓄᐃᑦ ᓯᕗᓪᓕᕐᒥᒃ ᐱᔪᒪᓚᐅᕋᓗᐊᕐᒪᑕ ᐃᓄᖕᓂᒃ ᒐᕙᒪᓕᕆᔨᐅᔪᓂᒃ. ᑭᓯᐊᓂᓕ ᐊᖏᖃᑎᒌᒐᓱᐊᖅᑎᐅᔪᓄᑦ ᐊᔭᐅᖅᑕᐅᓚᐅᖅᑐᑦ ᓴᒃᑯᐃᖁᓪᓗᒋᑦ “ᑕᒪᑐᒥᖓ ᓇᓗᓪᓗᑎᒃ ᐱᓇᓱᐊᖅᑕᖓᓐᓂᒃ, ᑕᒪᑐᒥᖓ ᐊᕕᓯᒪᓂᐅᒍᑎᒥᒃ, ᐱᔭᐅᒍᓐᓇᕋᔭᕐᓂᖓ ᐊᔪᕐᓇᕐᓂᖅᓴᐅᒐᔭᖅᑎᓪᓗᒍ ᐊᐳᑎᐅᑉ ᒪᕐᖑᒐᔭᙱᓐᓂᖓᓂᒃ ᐃᑯᒪᒥᑦ.” ᐃᑲᔪᖅᑕᐅᑎᓪᓗᒍ ᑭᒃᑯᑐᐃᓐᓇᕐᓄᑦ ᒐᕙᒪᖃᕐᓂᕐᒥᒃ, “ᑕᐃᒪᓐᓇ ᓱᓕ ᐱᔪᓐᓇᕋᔭᕋᑦᑕ.”
ᒐᕙᒪ ᐊᒻᒪᓗ ᓄᓇᕗᑖᕐᓂᕐᒧᑦ ᐊᖏᖃᑎᒌᒍᑎᕕᓂᖅ
ᓄᓇᕗᑦ ᓄᓇᖁᑎᖓ ᐃᒪᐃᓕᖓᔪᖅ ᐱᑕᖃᖅᖢᓂ ᐃᓗᓕᐊᓂ ᓄᓇᒥᒃ ᖃᓂᒋᔭᖓᓂ ᐊᑐᖅᑕᐅᕙᓚᐅᖅᑐᒥᒃ ᓯᕗᓪᓕᓄᑦ ᐊᒻᒪᓗ ᒫᓐᓇᐅᓂᖅᓴᒃᑯᑦ ᐊᑐᖅᑕᐅᕙᒃᓯᒪᔪᓂᒃ. ᑲᓇᖕᓇᖓᓂ ᕿᑭᖅᑕᐃᑦ ᖁᑦᓯᒃᑐᒥ ᐅᑭᐅᖅᑕᖅᑐᒥ ᐊᒻᒪᓗ ᕿᑭᖅᑕᖏᓐᓂ ᐅᖖᒑᕙ, ᕼᐊᑦᓴᓐ ᐲ, ᐊᒻᒪᓗ ᓯᕿᓂᕐᒥᐅᑦ ᐃᓚᒋᔭᐅᙱᑐᐊᖅᐸᑕ ᐊᕕᒃᑐᖅᓯᒪᔪᓂ ᐊᑭᖏᓐᓂ. ᐊᓯᖏᑎᑐᑦ ᒐᕙᒪᓕᕆᔨᐅᔪᑦ ᑎᒥᖏᑎᑐᑦ, ᓄᓇᕗᑦ ᒐᕙᒪᖓᑦ ᑲᒪᒋᔭᖃᓚᖓᔪᖅ ᐊᐅᓚᑕᐅᓂᖓᓂᒃ ᓄᑖᑉ ᓄᓇᕗᑖᕆᔭᐅᔪᑉ. ᒪᓕᒐᔭᖅᑐᖅ ᐱᒋᐊᖅᑕᐅᖁᔭᐅᔪᓂᒃ ᐅᖃᓕᒫᒐᓕᐊᖑᓚᐅᖅᑐᒥ Footprints 2, ᒪᒃᐱᕌᓕᐊᖑᓚᐅᖅᑐᖅ ᓄᓇᕗᑦ ᒐᕙᒪᒃᓴᓕᕆᔨᖏᓐᓄᑦ. ᑎᒥᖁᑎᒋᔭᐅᔪᑦ ᐱᒋᐊᖅᑎᑕᐅᓚᐅᖅᑐᑦ ᑲᓇᑕᐅᑉ ᒐᕙᒪᒃᑯᖏᑕ ᒪᓕᒐᖏᓐᓂᒃ ᒪᓕᒃᖢᑎᒃ ᐋᖅᑭᒃᓱᐃᔨᐅᖁᓪᓗᒋᑦ ᓄᓇᕗᑦ ᒐᕙᒪᒋᓇᔭᖅᑕᖓᓐᓂᒃ.
ᐱᓇᓱᒃᑕᐅᓚᖓᔪᑦ ᒐᕙᒪᓕᕆᓕᑦ ᐃᓚᖃᕋᔭᖅᑐᑦ, ᐊᒻᒪᓗ ᐊᔾᔨᒌᙱᑕᖃᕋᔭᖅᖢᑎᒃ ᑕᒪᕐᒥᒃ, ᑲᓇᑕᒃᑯᑦ ᐊᑐᖅᑕᐅᓯᒪᔪᑐᖃᒃᑯᑦ ᒐᕙᒪᓕᕆᓂᐅᑐᖃᖅᑐᓂᒃ. ᑲᓇᑕᓕᒫᒥᑎᑐᑦ, ᓄᓇᕗᒥᐅᑦ ᒐᕙᒪᖃᓚᖓᔪᑦ ᑭᒃᑯᑐᐃᓐᓇᕐᓄᑦ. ᐊᒻᒪᓗ ᐱᔪᓐᓇᐅᑎᖏᑦ ᑲᒪᒋᒋᐊᖃᖅᑕᖏᓪᓗ ᒪᓕᒋᐊᖃᓚᖓᔪᑦ ᐋᖅᑭᒃᑕᐅᓯᒪᓪᓗᑎᒃ ᑲᓇᑕᒥᐅᑦ ᓴᐳᑎᔭᐅᓯᒪᓂᖏᑦ ᐱᔪᓐᓇᐅᑎᖃᕈᓐᓇᕐᓂᖏᓐᓄᓪᓗ ᒪᓕᒐᖓᓂᒃ.
ᐊᔾᔨᒋᔭᐅᙱᑦᑐᒥᒃ ᐊᓯᖏᑎᑐᑦ ᐊᕕᒃᑐᖅᓯᒪᔪᓂ ᑲᓇᑕᒥ, ᓄᓇᕗᑦ ᑭᒃᑯᓕᒫᓄᑦ ᒐᕙᒪᖃᕋᔭᖅᑐᖅ. ᐊᒻᒪᓗ ᓄᓇᕗᑖᕐᓂᕐᒧᑦ ᐊᖏᖃᑎᒌᒍᑕᐅᔪᖅ ᐊᒃᑐᐊᓂᖃᓚᖓᔪᖅ ᐱᒻᒪᕆᐅᔪᓂᒃ. ᓲᕐᓗ ᐅᓇ ᐆᒃᑑᑎᒋᓗᒍ, ᓄᓇᕗᒧᑦ ᐊᖏᖃᑎᒌᒍᑎᕕᓂᖅ ᓇᓗᓇᐃᖅᓯᓯᒪᔪᖅ ᖃᑦᓯᐅᓂᖏᓐᓂᒃ ᐃᓄᐃᑦ ᐃᖅᑲᓇᐃᔭᖅᑎᑦ ᐱᔨᑦᑎᖅᑐᑦ ᒪᓕᒋᐊᖃᕐᓂᖏᓐᓂᒃ ᐃᓄᐃᑦ ᖃᑦᓯᐅᓂᖏᓐᓂᒃ ᓄᓇᕗᒥ. ᑕᒪᓐᓇ ᐋᖅᑭᒃᑕᐅᓯᒪᔪᖅ ᓇᑉᐸᖏᓐᓂᒃ ᐄᐳᕈ 1, 1999-ᒧᑦ, ᐊᒻᒪᓗ ᓱᒃᑲᐃᑦᑐᒥᒃ 85 ᐳᓇᓐᑎᒧᑦ. ᑕᒪᓐᓇ ᒪᓕᒐᔭᖅᑐᖅ ᐃᓄᐃᑦ ᐊᒥᓲᓂᖅᓴᐅᓂᖏᓐᓂᒃ ᓄᓇᕗᒥᐅᑕᓂ.
ᐊᒻᒪᓗᑦᑕᐅᖅ ᐊᔾᔨᒋᔭᐅᙱᒻᒥᔪᖅ ᐊᓯᖏᓐᓂᑦ ᐱᒋᐊᖅᑎᑕᐅᒍᑕᐅᓯᒪᔪᖅ ᓄᓇᕗᑦ ᐊᖏᖃᑎᒌᒍᑎᕕᓂᕐᒥᒃ ᓇᖕᒥᓂᖅ ᐃᓱᒪᓕᐅᕈᓐᓇᕐᓂᕐᒥᒃ ᑲᓇᑕᐅᑉ ᒐᕙᒪᖓᓐᓄᑦ ᐊᐅᓚᑕᐅᒍᓐᓇᑐᖃᐅᓚᐅᖅᑐᓂᒃ. ᐊᓯᖏᓐᓂ ᑲᓇᑕᐅᑉ ᓄᓇᖁᑎᖏᑕ ᐊᕕᒃᑐᖅᓯᒪᓂᖏᓐᓂ. ᑕᐃᒪᓐᓇ ᐱᔾᔪᑎᒋᓪᓗᒍ, ᐃᓄᐃᑦ ᑎᒃᑯᐊᖅᑕᐅᓯᒪᔪᑦ ᐊᒻᒪᓗ ᓄᓇᕗᒧᑦ ᐱᔨᑦᑎᖅᑎᐅᔪᑦ ᐃᒃᓯᕙᖃᑕᐅᓚᖓᔪᑦ ᐊᐅᓚᑦᑎᔨᐅᓪᓗᑎᒃ ᑎᒥᖁᑎᒋᔭᐅᔪᓂ. ᒪᑯᓂᖓ ᑎᒥᐅᔪᓂ ᓄᓇᕗᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂ, ᓄᓇᕗᒥ ᐸᕐᓇᐃᔩᑦ, ᐊᒃᑐᐃᓂᖃᖃᑦᑕᕐᓂᐅᔪᓄᑦ ᖃᐅᔨᓴᖅᑎᒃᑯᑦ ᑲᑎᒪᔨᖏᓐᓂ, ᓄᓇᕗᒥ ᐃᒪᓕᕆᔨᑦ ᑲᑎᒪᔨᕐᔪᐊᖏᓐᓂ ᐊᒻᒪᓗ ᓄᓇᕗᒥ ᓄᓇᐃᑦ ᖄᖏᓐᓄᑦ ᐃᓱᒪᖅᓱᕈᓐᓇᐅᑎᑖᕐᐸᓪᓕᐊᓕᑦ ᑲᑎᒪᔨᖏᓐᓂ.
ᐱᓴᖅᑐᓂᖃᖅᑎᓪᓗᒋᑦ ᓄᓇᕗᒥ ᓲᕐᓗ ᐊᓐᑎᐅᕆᐅᑉ ᒪᓕᒐᓕᐅᕐᕕᖓᓂ, ᓄᓇᕗᑦ ᒐᕙᒪᖓᑦ ᐊᕕᒃᑐᖅᓯᒪᔪᓂ ᒐᕙᒪᐅᓇᔭᖅᑐᖅ ᐊᔾᔨᒋᔭᐅᙱᓐᓂᖃᖅᑐᒥᒃ.
ᐊᖏᖃᑎᒌᖕᓂᒃᑯᑦ ᒐᕙᒪᓕᕆᓂᖅ, ᐊᒻᒪᓗ ᓂᕈᐊᕐᓂᖅ
ᓄᓇᕗᑦ ᒐᕙᒪᓕᕆᓂᖏᑦ ᐊᐅᓚᑕᐅᔾᔮᙱᑦᑐᑦ ᐃᓛᒃᑰᖅᑐᓂᒃ ᒐᕙᒪᓕᕆᔨᖃᕐᓂᒃᑯᑦ ᐊᕕᒃᑐᖅᓯᒪᔪᓂ. ᑭᓯᐊᓂᓕ, ᒪᓕᒐᓕᐅᕐᕕᒃ ᓄᑖᒥ ᐊᐅᓚᑕᐅᓚᖓᔪᖅ ᐊᖏᖃᑎᒌᖕᓂᒃᑯᑦ. ᓄᓇᖃᖅᑳᖅᑐᑦ ᐃᓱᒪᓕᐅᕈᑎᒋᕙᓚᐅᖅᑕᖓᑎᑐᑦ ᐊᔾᔨᖓᓂᒃ ᒪᓕᒃᖢᓂ, ᒪᓕᒐᓕᐅᕐᕕᖕᒥ ᐃᓱᒪᓕᐅᖅᑕᐅᔪᑦ ᐋᖅᑭᒃᑕᐅᓇᔭᖅᑐᑦ ᒪᓕᒡᓗᑎᒃ ᐊᒥᓲᓂᖅᓴᐅᔪᑦ ᒪᓕᒐᓕᐅᕐᕕᖕᒥ ᐃᓱᒪᒋᔭᖏᓐᓂᒃ. ᐃᓛᒃᑯᑦ ᒐᕙᒪᖃᕐᓂᖅ ᓄᓇᕗᒥ ᐊᑐᖅᑕᐅᕙᒃᑐᖅ ᑭᓯᐊᓂ ᓂᕈᐊᖅᑕᐅᖁᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑕ ᓂᕈᐊᒐᒃᓴᕆᔭᖏᓐᓂᒃ.
ᓄᓇᕗᑦ ᐸᕐᓇᐃᔨᓄ ᑲᒥᓯᓇᐅᖃᑕᐅᔪᖅ ᒦᑲ ᕿᓚᐸᒃ ᑕᑯᖁᔾᔨᕗᑦ ᓴᐃᒪᑎᒃᓴᒧᓐ ᑕᖅᓴᒃᓴᐅᑎᑕᐅᒐᓱᒃᑐᓂ ᓄᓇᕗᒻᒧ. ᑕᒪᓐᓇ ᓵᓚᒃᓴᕋᓱᖕᓂ ᑭᒃᑯᓕᒫᓄ ᒪᑐᐃᖖᒑᕐᑎᑕᐅᓚᐅᕐᐳᖅ ᑲᓇᑕᒥᐅᑕᕐᓄ, ᑭᓯᐊᓂᓕ ᐊᖓᔪᖅᑳᖅ ᓴᐃᒪᑎᓄᑦ ᐅᖃᖅᑕᖓ ᐱᒻᒪᕆᐅᓛᖑᕗᖅ
ᐱᓇᓱᐊᕈᓯᐅᓚᐅᖅᑐᒥ ᖄᖏᖅᑐᒥ, ᓄᓇᕗᒥᐅᑦ ᓂᕈᐊᓚᐅᖅᑐᑦ ᓯᕗᓪᓖᑦᑐᒥᒃ 19-ᓂᒃ ᐃᓂᓕᖕᓂᒃ ᒪᓕᒐᓕᐅᖅᑎᓂ ᑲᑎᒪᔨᒃᓴᐅᔪᓂᒃ. (ᐊᑐᕐᑕᐅᔪᒪᔪᒥᓐ ᒪᓕᒐᓕᐅᕐᑎᖃᕈᒪᓂᖅ ᓇᓕᒧᒌᒃᓗᑎᒃ ᐊᕐᓇᓪᓗ ᐊᖑᑎᓪᓗ ᓂᕈᐊᕐᓂᒃᑯ ᓴᖅᑭᑕᐅᓂᑯ ᓵᓚᐅᓚᐅᕐᐳᖅ 1997-ᒥ ᓄᓇᕗᓕᒫᒥ ᓂᕈᐊᕐᓂᒃᑯᑦ) ᐃᓚᒋᔭᐅᔪᑦ ᒪᓕᒐᓕᐅᖅᑎᓂ ᑭᒃᑯᓗᒃᑖᓄᑦ ᖃᐅᔨᔭᐅᒋᐊᖃᙱᑦᑐᒃᑯᑦ ᓂᕈᐊᖅᓯᓇᔭᖅᑐᑦ ᐅᖃᖅᑎᒥᒃ, ᐊᐅᓚᑦᑎᔨᐅᓇᔭᖅᑐᒥᒃ ᑲᑎᒪᕕᖕᒥᒃ. ᓂᕈᐊᖃᑦᑕᕐᒥᔪᑦ ᑭᒃᑯᓗᒃᑖᓄᑦ ᑕᑯᔭᐅᒋᐊᖃᙱᑦᑐᒃᑯᑦ ᐊᖓᔪᖅᑳᕐᔪᐊᕐᒥᒃ, ᐊᒻᒪᓗ ᐊᐅᓚᑎᔨᓂᒃ. ᒪᓕᒐᓕᐅᖅᑎᑦ ᑲᑎᒪᖃᑦᑕᕐᓂᖏᑦ ᒪᑐᐄᖓᖃᑦᑕᕐᓂᐊᕐᑐᑦ ᑭᒃᑯᑐᐃᓐᓇᕐᓄ.
ᓄᓇᕗᑦ ᒐᕙᒪᖓᑦ ᐊᕕᒃᑐᖅᓯᒪᔪᖅ ᖁᓕᓄᑦ, ᓯᕗᓕᐅᖅᑕᐅᓪᓗᓂ ᒥᓂᔅᑕᒧᑦ, ᒪᓕᒐᓕᐅᖅᑎᑦ ᒥᓂᔅᑕᐃᑦ ᑲᒪᒋᔭᕆᐊᖃᖅᑕᖏᓐᓂᒃ ᐱᑕᖃᙱᑦᑐᑦ ᐊᐃᕙᔨᐅᓇᔭᖅᑐᑦ. ᓂᕈᐊᕐᓇᖅ ᐊᕐᕌᒍᑦ ᑕᓪᓕᒪᑦ ᖄᖏᕌᖓᑕ ᐱᓇᔭᖅᑐᑦ ᓂᕈᐊᖅᑐᖃᕐᓗᓂ ᓂᕈᐊᒐᒃᓴᐅᔪᓂᒃ. ᑲᓇᑕᐅᑉ ᒐᕙᒪᒃᑯᖓᒍᑦ, ᐊᑕᐅᓯᕐᒥᒃ ᑲᑎᒪᔨᖃᕋᔭᖅᑐᑦ, ᐊᒻᒪᓗ ᐊᑕᐅᓯᕐᒥᒃ ᑲᓇᑕᒥ ᒪᓕᒐᓕᐅᖅᑕᐅᔪᓂ ᖃᐅᔨᓴᖅᑎᒥᒃ.
ᓄᓇᑦᓯᐊᑉ ᒐᕙᒪᖓᑦ ᖃᓪᓗᓈᑎᑐᑦ ᐃᖅᑲᓇᐃᔭᕋᔭᖅᑎᓪᓗᒋᑦ, ᓄᓇᕗᑦ ᒐᕙᒪᖓᑦ ᐊᑐᕋᔭᖅᑐᖅ ᐃᓄᒃᑎᑐᒻᒥᒃ. ᐊᓯᖏᑦᑕᐅᖅ ᐃᓕᑕᕆᔭᐅᓯᒪᔪᑦ ᐅᖃᐅᓰᑦ ᐃᓚᖃᕋᔭᖅᑐᑦ ᖃᓪᓗᓈᑎᑐᑦ ᐊᒻᒪᓗ ᐅᐃᕖᖅᑎᑐᑦ. ᐊᒻᒪᓗᑦᑕᐅᖅ, ᓄᓇᕗᑦ ᓇᖕᒥᓂᖅ ᓴᐃᒻᒪᑎᖃᕋᔭᖅᑐᖅ ᓇᖕᒥᓂᕐᓗ ᓇᓗᓇᐃᒃᑯᑕᖃᕐᓗᓂ. ᐊᒻᒪᓗᑦᑕᐅᖅ ᐊᓯᖏᓐᓂᒃ ᓇᓗᓇᐃᒃᑯᑕᓂᒃ ᐃᓛᒃᑯᑦ ᒐᕙᒪᐅᓂᖓᓂᒃ ᐊᕕᒃᑐᖅᓯᒪᓂᐅᓂᖓᓐᓂᒡᓗ ᐃᓕᑕᕆᔭᐅᒍᑎᓂᒃ.
ᓴᙱᓂᕆᔭᐅᔪᓂᒃ ᐊᔪᙱᓐᓂᕆᔭᐅᔪᓂᒡᓗ ᓄᒃᑎᕆᕙᓪᓕᐊᓂᖅ
ᒪᓕᒡᓗᓂ ᐊᔾᔨᖃᕐᓗᓂ ᐊᔾᔨᒌᙱᑦᑐᓂᒃ ᐊᕕᒃᑐᖅᓯᒪᔪᓂᒃ, ᓄᓇᕗᑦ ᒐᕙᒪᖓᑦ ᓴᙱᓂᕆᔭᐅᔪᓂᒃ ᐱᔪᓐᓇᐅᑎᓂᒡᓗ ᓄᒃᑎᕆᕙᓪᓕᐊᓂᖃᖅᓯᒪᓇᔭᖅᑐᖅ. ᐱᑕᖃᕆᐊᖃᖅᑐᑦ ᐊᖓᔪᖅᑳᒃᑯᕕᖕᒥ 700ᖏᓐᓃᐸᓗᒃ ᐃᖅᑲᓇᐃᔮᒃᓴᐃᑦ ᐊᕕᒃᑕᐅᓯᒪᓗᑎᒃ ᒪᑯᓄᖓ ᐃᖃᓗᖕᓄᑦ, ᐊᖓᔪᖅᑳᒃᑯᕕᐅᔪᖅ ᓄᓇᕗᒥ, ᐊᒻᒪᓗ ᖁᓕᓄᑦ ᓄᓇᓕᐅᔪᓄᑦ. ᐅᑯᐊᖑᔪᑦ - ᐃᒡᓗᓕᒃ, ᖃᖏᖅᖠᓂᖅ, ᐃᖃᓗᒃᑑᑦᑎᐊᖅ, ᑭᙵᐃᑦ, ᐊᕐᕕᐊᑦ, ᐅᖅᓱᖅᑑᖅ, ᖁᕐᓗᖅᑑᖅ, ᐸᖕᓂᖅᑑᖅ, ᖃᒪᓂ'ᑐᐊᖅ, ᐊᒻᒪᓗ ᒥᑦᑎᒪᑕᓕᒃ. ᒐᕙᒪᐃᑦ ᓱᓕᕆᒋᐊᖃᖅᑕᖏᑦ, ᐃᓚᒋᔭᐅᓪᓗᓂ ᐊᖓᔪᖅᑳᒃᑯᕕᒃ ᐊᒻᒪᓗ ᒐᕙᒪᖃᑎᒌᑦ ᐃᖅᑲᓇᐃᔭᖃᑎᒌᖕᓂᖏᑦ, ᑮᓇᐅᔭᓕᕆᔨᒃᑯᑦ ᐊᐅᓚᑦᑎᔨᒃᑯᓪᓗ, ᐃᖅᑲᓇᐃᔭᖅᑐᓕᕆᔨᒃᑯᑦ, ᐊᒻᒪᓗ ᐃᖅᑲᖅᑐᐃᕝᕕᓕᕆᔨᒃᑯᑦ. ᑖᒃᑯᐊᓕ ᐃᓂᖃᕋᔭᖅᑐᑦ ᐃᖃᓗᖕᓂ, ᐊᒻᒪᓗ ᒥᓂᔅᑕᓕᕆᔨᐅᔪᑦ, ᐸᕐᓇᐃᔨᑦ ᐊᑐᐊᒐᓕᐅᖅᑎᓪᓗ ᑮᓇᐅᔭᓕᕆᔨᓪᓗ, ᐊᒻᒪᓗ ᐃᖅᑲᓇᐃᔭᖅᑐᓕᕆᔨᐅᓂᕐᓂᒃ ᓄᓇᕗᑦ ᒐᕙᒪᖓᑕ ᐊᓯᖏᓐᓂ ᐊᕕᒃᑐᖅᓯᒪᓂᖏᓐᓂ.
ᐊᑕᐅᓯᖅ ᓯᕗᓂᕐᒧᑦ ᑐᕌᖅᑕᐅᔪᖅ ᐱᒃᓴᖅᑐᓂᕐᒥᒃ ᓄᒃᑎᕆᓕᖅᑎᓪᓗᒋᑦ ᓄᓇᕗᒧᑦ ᓄᒃᑏᓂᖅ ᐱᖓᓱᖏᓐᓄᑦ ᐊᕕᒃᑐᖅᓯᒪᓂᖏᓐᓄᑦ ᐃᓱᒪᓕᐅᕈᓐᓇᕐᓂᕐᒥᒃ ᐊᐅᓚᑦᑎᒍᓐᓇᕐᓂᕐᒥᒃ. ᐊᒻᒪᓗ ᐃᖅᑲᓇᐃᔮᒃᓴᐅᔪᓂᒃ ᓅᑎᕆᓗᑎᒃ ᐊᒥᓱᓄᑦ ᓄᓇᓕᖕᓄᑦ. ᐊᕕᒃᑐᖅᓯᒪᔪᓂ ᒐᕙᒪᓕᕆᕝᕕᑦ ᒪᑯᓇᓈᓐᓇᔭᖅᑐᑦ ᐃᒡᓗᓕᖕᒥ (ᕿᑭᖅᑖᓘᑉ ᐊᕕᒃᑐᖅᓯᒪᕕᖓᓐᓂ), ᑲᖏᖅᖠᓂᕐᒥ (ᑭᕙᓪᓕᐅᑉ ᐊᕕᒃᑐᖅᓯᒪᕕᖓᓐᓂ), ᐊᒻᒪᓗ ᐃᖃᓗᒃᑑᑦᑎᐊᕐᒥ (ᕿᑎᕐᒥᐅᑦ ᐊᕕᒃᑐᖅᓯᒪᕕᖓᓐᓂ). ᐱᒃᓴᖅᑐᓂᕆᔭᐅᔪᑦ ᓅᑕᐅᓐᓂᖓᑦ ᐃᑲᔪᐃᓇᔭᖅᑐ ᐊᒥᓲᓗᐊᖅᑐᑦ ᐃᓄᐃᑦ ᓅᑕᐅᒋᐊᖃᙱᓐᓂᖏᓐᓂᒃ ᐊᑕᐅᓯᕐᒧᑦ ᓄᓇᓕᖕᒧᑦ.
ᓄᓇᕗᑦ ᒐᕙᒪᖓᑦ ᐃᓂᖓᓕᓕᖅᐸᑦ, ᑮᓇᐅᔭᖅᑖᖅᐸᒃᑕᖏᑕ ᑕᒪᒃᑭᑲᓴᖏᑦ ᐊᐅᓚᔾᔪᑎᖏᑦ ᐱᔭᐅᓇᔭᖅᑐᑦ ᑲᓇᑕᐅᑉ ᒐᕙᒪᖏᓐᓂᑦ. ᑮᓇᐅᔭᖅᑖᕈᑕᐅᓲᑦ ᐊᖏᖃᑎᒌᒍᑕᐅᓯᒪᓪᓗᑎᒃ ᑕᓪᓕᒪᓄᑦ ᐊᕌᒍᓄᑦ 95 ᐳᓴᓐᑎᖓᓄᑦ ᐊᑐᖅᑕᐅᕙᒃᑐᓂ ᐱᔭᐅᓇᖓᔪᑦ ᓄᓇᕗᑦ ᒐᕙᒪᒃᑯᖓᓐᓄᑦ. ᐊᓯᖏᓪᓕ ᐱᔭᐅᑦᑕᕋᔭᖅᑐᑦ ᑖᒃᔅᓕᕆᓂᒃᑯᑦ ᐊᒻᒪᓗ ᓂᐅᕕᖅᑕᐅᕙᖕᓂᖏᑦ ᓂᐅᕕᐊᒃᓴᓂᒃ ᐊᒻᒪᓗ ᐱᔨᑦᑎᖅᐸᒍᑎᓂᒃ. ᐊᕐᕌᒍᒧᑦ ᑮᓇᐅᔭᒃᓴᖏᑦ 1999-2000-ᒧᑦ ᒐᕙᒪᐃᑦ ᑮᓇᐅᔭᒃᓴᕆᓇᔭᖅᑕᖏᑦ ᐋᖅᑭᒃᑕᐅᓯᒪᔪᑦ $620 ᒥᓕᐊᓐᓄᑦ. $580 ᒥᓕᐊᓐ ᓴᓂᕐᕙᖅᑕᐅᓯᒪᔪᑦ ᐱᕙᓪᓕᐊᑎᑕᐅᔪᑦ ᐱᔨᑦᑎᕈᑕᐅᔪᓪᓗ ᐊᑭᓕᖅᑕᐅᒍᓐᓇᖁᓪᓗᒋᑦ. ᐊᒥᐊᒃᑯᖓ ᒐᕙᒪᓄᑦ ᖃᓄᖅ ᐃᓱᒪᒋᔭᐅᔪᓄᑦ ᐊᑐᖅᑕᐅᕙᒐᔭᖅᑎᓪᓗᒋᑦ. ᑲᓇᑕᐅᑉ ᒐᕙᒪᒃᑯᖓᓂᕐᖕᒑᖅᑐᑦ ᑐᓂᕐᕈᓯᐅᔪᖅ ᒪᓕᒃᑕᐅᔪᒃᓴᓂᒃ ᐋᖅᑭᒃᓯᒪᒍᑎᖃᕋᓂ.
ᐃᖏᕐᕋᓂᖅ ᓄᑖᒃᑯᑦ ᐊᖅᑯᑎᒃᑯᑦ
ᐃᓄᐃᑦ ᐱᔾᔪᓯᖓᑦ ᐊᑐᖅᑕᑐᖃᖓᑦ ᒪᓕᒃᖢᒍ, ᓄᓇᕗᑦ ᒐᕙᒪᖓᑦ ᐱᒋᐊᓕᕋᔭᖅᑐᖅ ᓄᑖᒧᑦ ᐊᖅᑯᑎᒃᑯᑦ ᐊᑐᖅᑕᐅᓯᒪᖏᑦᑐᒃᑯᑦ. ᒐᕙᒪᐅᔪᖅ ᐊᑐᓕᖅᑎᑕᐅᓂᖓ ᐱᓚᖓᔪᖅ ᐱᖓᓱᓂᑦ ᓯᑕᒪᓂᒡᓘᓐᓕᑦ ᐊᕐᕌᒍᒃᑯᑦ, ᐱᒋᐊᕐᓂᖃᕐᓗᓂ ᒐᕙᒪᖁᑎᐅᓇᔭᖅᑐᒥᒃ 200-ᓂᒃ ᐊᖓᔪᖅᑳᒃᑯᕕᖕᒥ ᒐᕙᒪᓕᕆᔨᖃᕐᓗᑎᒃ ᐄᑉᕈ 1, 1999-ᒥ. ᓄᓇᑦᓯᐊᑉ ᒐᕙᒪᒃᑯᖓᓐᓄᑦ ᐃᖅᑲᓇᐃᔭᖅᑎᐅᔪᑦ 1,700-ᖑᔪᑦ ᓄᑕᐅᓇᔭᖅᑎᓪᓗᒋᑦ ᓄᓇᕗᑦ ᒐᕙᒪᖓᓄᑦ, ᑲᑎᓪᓗᒋᑦ 1,900-ᖑᔪᑦ ᓄᓇᕗᒥ ᐃᖅᑲᓇᐃᔭᕋᔭᖅᑐᑦ ᐱᔨᑦᑎᖅᑎᑦ. ᑭᒃᑯᓗᒃᑖᓄᑦ ᐱᔨᑦᑎᖅᑐᑦ ᐃᖅᑲᓇᐃᔭᓕᕋᔭᖅᑐᑦ ᓄᓇᕗᑦ ᐃᖏᕐᕋᓕᖅᑎᑕᐅᑎᓪᓗᒍ.
ᑕᒡᕙᓂ ᐄᐳᕈ 1, 1999-ᒥ, ᑕᐅᑐᖑᐊᖅᑕᐅᔪᑦ ᓯᕗᓪᓕᕐᐅᔪᒥ ᐋᖅᑭᒃᓱᖅᑕᐅᓚᐅᖅᑐᑦ ᐸᐃᑉᐸᒃᑯᑦ 1976-ᒥ ᐱᓪᓗᐊᕕᕐᖑᕈᒫᖅᑐᑦ. ᓄᓇᕗᒥᐅᑕᓄᑦ, ᓇᖕᒥᓂᖅ ᒐᕙᒪᖃᓕᕐᓂᖓᑦ ᐊᒥᓱᓂᒃ ᐊᕐᕌᒍᓄᑦ ᐸᕐᓇᒃᑕᐅᓯᒪᔪᒥᒃ, ᓯᓚᑐᓂᖏᑦ ᐊᑐᖅᑕᐅᓪᓗᑎᒃ, ᐊᒻᒪᓗ ᐊᓯᔾᔨᖅᐸᓪᓕᐊᔪᒧᑦ ᐊᓯᔾᔨᖃᑕᐅᒍᓐᓇᕐᓂᖏᑦ ᒪᓕᒃᑕᓗᑎᒃ ᓄᐃᑎᑎᔪᑦ.
