ᐃᓄᐃᑦ ᓴᓇᕐᖑᐊᒐᖏᑦ:
ᖃᓄᐃᓕᕐᓂᖓ ᓄᑖᖅ
ᐃᓄᐃᑦ ᓴᓇᖑᐊᕐᑏ ᐆᑐᓇᖅ ᓴᐃᒪᓐ ᐱᐅᒑᑦᑐᐊᓗᒃᑐ
ᓱᓕ ᐃᓱᒪᒋᔭᐅᖑᐊᕐᑐᓂᑦ ᓴᖅᑭᑦᑎᖃᑦᑕᕐᐳ
ᓄᐃᑦ ᓴᓇᕐᖑᐊᒐᖏᑦ ᐆᒪᑎᑕᐅᑦᑎᐊᖅᑐᑦ ᐊᒻᒪᓗ ᐃᖏᕐᕋᑦᑎᐊᖅᑐᑦ.
ᐃᓄᐃᑦ ᓴᓇᕙᖕᓂᖏᑦ ᐊᒻᒪᓗ ᑕᑯᒃᓴᐅᑎᑎᓂᖏᑦ ᓴᓇᕐᖑᐊᒐᓂᒃ, ᖃᓄᑐᐃᑦᑐᑐᐃᓐᓇᕐᓂᒃ ᓴᓇᓯᒪᔪᓂᒃ, ᐊᓕᐊᓇᐃᓐᓂᖃᖅᑐᖅ ᐊᔪᕐᓇᕈᑎᖃᖅᐸᒃᖢᓂᓗ. ᑕᒪᓐᓇ ᐱᒋᐊᓕᓵᖅᑐᐃᓐᓇᐅᙱᑦᑐᖅ, ᐊᒻᒪᓗ ᑕᒪᐃᑎᒍᑦ ᐃᓱᒫᑎᒃᓴᐅᙱᓪᖢᓂ. ᑕᐃᒪᐃᙱᓐᓇᖅᑐᑐᐃᓐᓇᖅ ᑕᒪᑐᒧᖓ ᐊᑐᓪᓚᕆᒋᔭᐅᔪᒧᑦ ᑮᓇᐅᔭᓕᐅᕐᓂᕐᒧᑦ ᐅᑭᐅᖅᑕᖅᑐᒥ ᐃᓚᒋᔭᐅᓂᖓᓄᓪᓗ ᐃᓕᖅᑯᓯᒧᑦ.
ᐅᓪᓗᒥᐅᔪᖅ ᑐᑭᓯᓂᕆᔭᑦᑎᒍᑦ ᐃᓄᖕᓄᑦ ᓴᓇᙳᐊᕆᔭᐅᓱᖅᑐᓂᒃ ᐱᒋᐊᓚᐅᖅᓯᒪᔪᖅ ᐊᕐᕌᒍᓂ 50-ᓂᒃ ᐊᑐᓕᖅᑐᓂ. ᓂᕆᐅᖕᓇᙱᑦᑐᒃᑯᑦ ᖃᐅᔨᒪᔭᐅᓯᑳᓪᓚᖕᓂᖃᓚᐅᖅᑎᓪᓗᒋᑦ ᒪᓐᑐᕆᐊᓪᒥ ᑕᑯᔭᒃᓴᖃᖅᑎᑎᑎᓪᓗᒋᑦ ᑲᓇᑕᒥ ᓴᓇᕐᖑᐊᖅᑎᑦ ᑲᑐᔾᔨᔨᖏᑦ (Canadian Handicraft Guild) 1949-ᒥ. ᑕᒪᓐᓇ ᖁᕕᐊᓇᓚᐅᖅᑐᖅ ᐊᑕᐅᑦᑎᒃᑰᖃᑕᐅᑎᓪᓗᒍ ᑲᓇᑕᓕᒫᒥ ᓇᖕᒥᓂᖅ ᐃᓕᑕᖅᓯᕙᓪᓕᐊᓂᕐᒥᒃ ᖃᐅᔨᓕᖅᑎᓪᓗᒋᑦ. ᐊᑎᖓ ᔩᔅ ᕼᐅᔅᑕᓐ ᓴᐅᒥᒃ (James Houston) ᐊᒥᓱᓄᑦ ᖃᐅᔨᒪᔭᐅᒐᔭᖅᑐᖅ ᐊᒃᓱᕈᑎᖃᓚᐅᖅᑐᕐᓗ ᐃᓄᐃᑦ ᓴᓇᐅᒐᖏᓐᓂᒃ ᐃᓕᑕᕆᔭᐅᓂᖏᓐᓂᒃ, ᐊᖓᔪᖅᑕᐅᓂᖏᓐᓂᒃ ᐊᒻᒪᓗ ᐊᔭᐅᖅᑕᐅᓂᖏᓐᓂᒃ. ᓴᐅᒥᐅᑉ ᑭᙵᓂ ᐊᒃᓱᕈᕐᓂᕆᕙᓚᐅᖅᑕᖏᑦ ᓴᓇᖃᑎᖃᖅᖢᓂ ᓴᓇᐅᒐᖅᑎᓂ ᓲᕐᓗ ᐅᓱᐃᑦᑐᖅ ᐊᐃᐱᓕ ᐊᒻᒪᓗ ᕿᓐᓄᐊᕐᔪᐊᖅ ᐋᓯᕙᕐ ᐱᔪᓐᓇᖅᑎᑎᓚᐅᖅᑐᑦ ᑲᓇᑕᐅᑉ ᒐᕙᒪᒃᑯᖓᓂᒃ ᐊᔭᐅᒃᓯᓂᖓᓐᓂᒃ ᓴᓇᕐᖑᐊᕐᓂᕐᒥᒃ. ᑭᖑᒻᒧᑦ ᑕᑯᓗᒍ, ᐃᓄᐃᑦ ᓴᓇᕐᖑᐊᒐᖏᑕ ᓇᓗᙱᓕᖅᑕᐅᒍᑎᖓᓐᓂᒃ ᓯᓚᕐᔪᐊᓕᒫᒧᑦ ᐱᒋᐊᕐᓂᖃᓚᐅᖅᑕᖅ ᑕᒪᑐᒥᖓ ᐊᒃᓱᕈᖃᑦᑕᓚᐅᕐᓂᖓᓄᑦ.
ᑭᓯᐊᓂᓕ, ᐱᒋᐊᓕᓵᖅᑎᓪᓗᒋᑦ ᐊᖏᔫᔪᓂ ᓴᓇᕐᖑᐊᖅᑐᓕᕆᔨᐅᔪᑦ ᐊᔪᕐᓇᕐᓚᐅᔭᖅᐸᓚᐅᖅᑐᑦ ᐃᓕᑕᖅᓯᑎᑎᓂᕐᒥᒃ ᓴᓇᕐᖑᐊᒐᐃᑦ ᐱᐅᓴᕈᑕᐅᓂᖏᑕ ᐊᑐᕐᓂᖏᓐᓄᑦ. ᒐᕙᒪᒃᑯᑦ ᐊᒃᓱᕈᕐᓂᖅᓴᐅᕙᓚᐅᖅᑎᓪᓗᒋᑦ ᐋᖅᑮᓂᕐᒥᒃ /"ᓴᓇᕐᖑᐊᖅᑐᓕᕆᓂᕐᒥᒃ./" ᑕᐃᑦᓱᒪᓂᐅᓚᐅᖅᑐᖅ ᓲᖃᐃᒻᒪ, ᐊᒥᓲᙱᑦᑐᓂᒃ ᑭᓯᐊᓂ ᑮᓇᐅᔭᓕᐅᕐᕕᖃᓚᐅᕐᒪᑕ ᐃᓄᑭᓐᓂᖅᓴᐅᔪᓂ, ᐅᐸᒃᓴᕋᐃᓐᓇᙱᑦᑐᓂ ᐅᑭᐅᖅᑕᖅᑐᒥᐅᓂᒃ ᓄᓇᓕᖕᓂᒃ. ᓴᓇᕐᖑᐊᕐᕕᖃᖅᐸᑦ ᐃᖏᕐᕋᑐᐊᖅᐸᑦ ᐃᓱᒪᒋᔭᐅᑦᑕᓚᐅᖅᑐᖅ ᐄᖑᒐᓗᐊᖅ, ᓴᓇᓯᒪᔪᓂᒃ ᐊᓐᓄᕌᓂᒃ ᓯᓚᒥᓯᐅᑎᓂᑦ ᒪᐅᖓ ᓴᓇᕐᖑᐊᖓᓄᑦ ᒥᑭᑦᑐᓄᑦ ᐱᐅᓴᐅᑎᕋᓗᖕᓄᑦ ᑎᑎᕋᐅᔭᖅᓯᒪᔪᓄᓪᓗ, ᓄᕕᒃᓴᔭᕋᓗᖕᓄᑦ ᔭᕐᕋᐅᔭᓂᒡᓗ ᓴᓇᓯᒪᔪᑦ. ᑕᒪᒃᑯᓇᕐᖓᑦ ᑕᑯᕋᕐᓂᖅᑐᓂᒃ ᓄᐃᔪᖃᖅᓯᒪᔪᖅ ᐃᓅᑉ ᓴᓇᔨᒃᑲᐅᓂᖓᓂᕐᖕᒑᖅᑐᒥᒃ, ᓇᒥᑐᐃᓐᓇᖅ ᑐᑭᓯᔭᐅᔪᓐᓇᖅᑐᒥᒃ ᐃᓕᑕᕐᓇᖅᑐᒃᑯᑦ ᓱᓕᔪᒃᑯᓪᓗ. ᑕᐃᒪᓐᓇ ᐱᔾᔪᑎᖃᖅᑐᖅ ᐊᒥᓱᓂᒃ ᑲᑎᖅᓱᖅᓯᒪᔪᖃᓕᕐᒪᑦ ᐃᓄᐃᑦ ᓴᓇᔭᖏᓐᓂᒃ ᓇᖕᒥᓂᕆᔭᐅᔪᓂᒃ ᐊᒻᒪᓗ ᑭᒃᑯᓗᒃᑖᓄᑦ ᑕᑯᔭᖅᑐᕐᕕᐅᒍᓐᓇᖅᑐᓂ ᓯᓚᕐᔪᐊᓕᒫᒥ.
ᐸᖕᓂᕐᑑᒥ ᐊᑭᓐᓇᕐᒥᐅᑕᓕᐅᕐᑏ ᐅᖅᑯᖅᒥᐅᑦ ᓴᓇᕝᕕᖓᓂ: ᐃᓄᐃᑦ ᓴᖅᑭᑦᑎᕗᑦ ᐊᑐᓕᓵᕐᑐᕕᓂᕐᒥᓐ30 ᐊᕐᕌᒍ ᐊᑐᕐᖢᑎ ᐊᑐᕐᑐᑯᑖᕌᓗᖕᒥ ᐱᓕᕆᔾᔪᑎᒥᓐ
ᐅᑭᐅᖅᑕᖅᑐᒥ ᐊᓯᔾᔨᖅᐸᓪᓕᐊᓂᖏᑦ ᓱᓇᑐᐃᓐᓇᐃᑦ ᓱᑲᔪᒻᒪᕆᐊᓕᖅᑐᖅ ᐊᕐᕌᒎᔪᓂ 50-ᓂ. ᑕᒪᓐᓇ ᐊᓯᔾᔨᕐᓂᕐᒥᒃᑕᐅᖅ ᓴᓇᕐᖑᐊᒐᕆᔭᐅᓂᒃᑯᑦ ᒪᓕᒃᓴᖅᑕᐅᓯᒪᖕᒥᔪᖅ ᓴᓇᕐᖑᐊᖅᐸᖕᓂᖅ ᐊᒃᑐᖅᑕᐅᒋᓪᓗᓂ. ᓴᓇᕐᖑᐊᖅᐸᖕᓂᖅ ᑐᑭᖃᑦᑎᐊᕋᔭᖅᐸᑦ ᐃᑲᔪᖅᑕᐅᓂᖃᕋᔭᖅᐸᓪᓗ, ᓄᑖᒥᒃ /"ᐃᔨᒋᔭᖃᕆᐊᓕᒃ/" ᐅᔾᔨᕐᓇᖅᑐᒃᑯᑦ. ᑕᐃᑦᓱᒪᓂ ᐃᓄᐃᑦ ᐱᕝᕕᒃᓴᖃᑦᑎᐊᖅᑕᓚᐅᖅᑎᓪᓗᒋᑦ ᐃᓱᒪᑦᑎᐊᖅᓯᒪᔪᒃᑯᑦ ᑐᐊᕕᙱᑦᑐᒃᑯᑦ ᐊᒻᒪᓗ ᐅᐃᒪᔮᖅᑎᑕᐅᒐᑎᒃ ᓴᓇᕐᖑᐊᖅᐸᖕᓂᕐᒥᒃ. ᐅᓪᓗᒥᐅᔪᖅ ᓴᓇᕐᖑᐊᒐᕆᔭᐅᔪᑦ ᐃᓄᖕᓄᑦ ᒫᓐᓇᐅᔪᖅ ᓄᑖᖑᔪᒃᑯᑦ ᐊᒃᑐᖅᑕᐅᓯᒪᓕᕐᒪᑕᑦᑕᐅᖅ ᑮᓇᐅᔭᓕᐅᕆᐊᖃᕐᓂᕐᒥᒃ ᓱᓇᑐᐃᓐᓇᕐᓂᒡᓗ ᐊᔪᕐᓇᕈᑕᐅᕙᒃᑐᓂᒃ. ᑕᑯᒍᓐᓇᖅᑐᒍᑦ ᑕᐃᑦᓱᒪᓂ ᐃᓄᐃᑦ ᓴᓇᕐᖑᐊᕈᑎᔾᔪᒪᔾᔪᑎᒋᓚᐅᖅᑕᖓᓐᓂᒃ - ᑕᑯᔭᒃᓴᖃᖅᑎᑎᒍᒪᓂᕐᒥᒃ ᓱᓇᑐᐃᓐᓇᕐᓂᒃ ᓱᓕᔪᒃᑯᑦ ᐊᒻᒪᓗ ᒪᑐᐃᖓᑦᑎᐊᖅᑐᒃᑯᑦ ᓱᓇᑐᐃᓐᓇᕐᓂᒃ ᐅᓪᓗᒥᐅᓕᖅᑐᖅ ᐊᔾᔨᒋᙱᓯᒪᔭᖓᒍᑦ ᑕᑯᒃᓴᐅᓕᖅᑐᓂᒃ. ᐅᓪᓗᒥᐅᔪᖅ ᐱᒋᐊᕐᕕᖓᑦ ᐃᓄᐃᑦ ᓴᓇᙳᐊᕐᓂᖏᑕ ᐃᑎᓂᖃᖅᓯᒪᔪᖅ ᐃᓕᑕᖅᓯᓂᕐᒥᒃ ᑕᐃᑦᓱᒪᓂᐅᓚᐅᖅᑐᓂᒃ ᐊᒻᒪᓗ ᐅᓪᓗᒥᐅᔪᖅ ᖃᓄᐃᓕᕐᓂᕐᒥᒃ.
ᐅᓪᓗᒥᐅᔪᖅ ᑎᑎᕋᖅᑎᓪᓗᖓ ᑎᑎᖅᑲᒃᑯᕕᖓᓐᓂ Dorset Fine Arts, ᕿᒥᕐᕈᔪᓐᓇᖅᖢᖓ ᑐᕌᓐᑐᑉ ᐃᓄᒋᐊᒃᑐᑦ ᐃᒡᓗᕐᔪᐊᖏᓐᓂᒃ, 1960 ᐊᑐᓕᖅᑎᓪᓗᒍ ᐃᓱᒪᒐᔪᒃᑐᖓ ᖃᓄᖅ ᐊᓯᔾᔨᕐᔪᐊᖅᓯᒪᓂᖓᓐᓂᒃ ᓴᓇᕐᖑᐊᖅᑎᑦ ᓂᐅᕕᖅᑎᓪᓗ ᐃᓅᓯᖓᑦ ᐱᓯᒪᓕᕐᓂᖓᓂᒃ. ᐅᑭᐅᖅᑕᖅᑐᖅ ᑕᐃᑦᓱᒪᓂ ᐅᖓᓯᒃᑑᑦᑕᓚᐅᖅᑐᖅ, ᐅᐸᒃᓴᕋᐃᓐᓇᓂ, ᐊᒻᒪᓗ ᐃᓄᖕᒧᑦ ᖃᓪᓗᓈᑦ ᓄᓇᖓᑦ ᐋᓪᓚᔪᐊᕐᓇᖅᐸᓚᐅᖅᖢᓂ. ᐊᒥᓱᓂᒃ ᑎᑭᓴᕋᐃᓐᓇᙱᑕᐅᑎᓪᓗᒋᑦ ᐃᓄᐃᑦ ᓴᓇᕐᖑᐊᖅᑎᑦ ᐃᓅᔪᖕᓇᖅᐸᓚᐅᕐᒪᑕ ᐅᐃᒪᔮᖅᑎᑕᐅᒐᑎᒃ ᐊᒻᒪᓗ ᐊᒃᓱᕈᕈᑎᖃᖅᑎᑕᐅᓇᑎᒃ ᐅᖁᒪᐃᑦᑐᓂᒃ. ᓴᓇᕐᖓᐊᖅᑎᐅᔪᑦ ᐊᒻᒪᓗ ᓂᐅᕕᖅᑎᐅᔪᑦ ᐊᓕᐊᓇᐃᑉᐸᓚᐅᖅᑐᖅ ᖃᐅᔨᒪᑦᑎᐊᖃᑦᑕᐅᓂᓪᓗᑎᒃ ᓴᓇᖃᑎᒌᒍᓐᓇᕐᓂᖓᑦ. ᑭᖑᒧᑦ ᑕᒪᓐᓇ ᑐᑭᓯᓪᓗᒍ ᐃᓕᓐᓇᖅᑐᖅ. ᑕᒪᓐᓇᓕ ᐃᖅᑲᓇᐃᔭᖃᑎᒌᒍᓐᓇᕐᓂᖅ ᓄᑖᒧᑦ ᐱᔭᕇᕆᐊᓕᖃᖅᑐᓄᑦ ᐋᖅᑭᒃᑕᐅᓯᒪᓂᖃᓕᕐᒪᑦ.
ᑕᒪᒃᑯᐊᓕ ᐊᓯᔾᔨᕈᑕᐅᒋᐊᖃᓱᖅᑐᑦ ᓂᕆᐅᖕᓂᖃᕈᑕᐅᙱᑦᑐᑦ ᐃᓄᐃᑦ ᓴᓇᕐᖑᐊᖅᐸᖕᓂᖏᑕ ᓄᖅᑲᕋᔭᕐᓂᖓᓐᓂᒃ: ᐃᓱᒫᑎᒋᔭᐅᓱᖅᑐᑦ ᓈᓴᖅᑕᐅᓯᒪᓂᖏᑕ ᐳᖅᑐᓗᐊᕐᓂᖏᑦ ᓴᓇᓯᒪᔪᑦ ᐊᒻᒪᓗ ᓂᐅᕕᖅᑕᐅᑎᑎᓇᓱᐊᕐᓂᖅ ᐳᒃᑭᓗᐊᖅᓯᓐᓇᖅᑎᓪᓗᒍ. ᐅᓇᓕ ᐊᑐᓪᓚᕆᒃᑐᖅ, ᐃᓄᐃᑦ ᓴᓇᕐᖑᐊᒐᖏᑦ ᐆᒪᔪᑦ. ᖃᖓᑐᐃᓐᓇᒃᑯᑦ ᐊᕐᕌᒍᓂ ᓯᓚᕐᔪᐊᓕᒫᕐᒥᐅᑕᓂᒃ ᐊᔪᙱᓛᓂᒃ ᐱᑕᖃᓱᖅᑐᖅ, ᐊᒻᒪᓗ ᐅᓪᓗᒥᐅᔪᖅ ᑕᒪᓐᓇ ᐊᔾᔨᖓᑦᑕᐅᖅ. ᓄᑖᖑᔪᑦ ᓴᓇᕐᖑᐊᕐᓂᐅᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓴᖐᓐᓇᓚᖓᔪᖅ ᐱᑕᖃᑐᐊᖅᐸᑦ ᐃᓄᖕᓂᒃ ᐅᐱᒍᓱᖕᓂᖃᖅᑐᓂᒃ ᐃᓕᖅᑯᓯᕆᔭᒥᖕᓂᒃ ᐊᒻᒪᓗ ᓱᓕᔪᒃᑯᑦ ᑕᒪᓐᓇ ᑕᑯᒃᓴᐅᑎᑕᐅᒍᓐᓇᑐᐊᖅᐸᑦ. ᐊᓯᔾᔨᕋᓗᐊᖅᑎᓪᓗᒋᑦ ᐃᓕᖅᑯᓯᖏᑦ. ᓂᐱᖏᑦ, ᐃᓐᓇᑐᖃᕐᓂᑦ ᐊᔾᔨᒋᔭᐅᙱᑦᑑᒐᓗᐊᑦ, ᐅᐱᒋᔭᐅᒋᐊᖃᕐᒥᔪᑦ ᐃᒃᐱᒋᔭᐅᑦᑎᐊᕐᓂᖃᕐᓗᑎᒡᓗ.
ᐃᓄᐃᑦ ᓴᓇᕐᖑᐊᒐᖏᑦ, 100 ᐊᕐᕌᒍᑦ ᓇᑉᐸᖓᓂ ᐱᓐᓇᕆᔭᐅᓯᒪᑐᖃᖅᑐᑦ, ᐊᒃᓱᑦ ᐊᓯᔾᔨᖅᐸᓪᓕᐊᑦᑕᓚᖓᔪᑦ. ᓄᓇᕗᒥ ᓂᕈᐊᖅᑕᐅᓯᒪᔪᑦ ᑎᓕᔭᐅᓯᒪᔾᔪᑎᖃᖅᐳᑦ, ᐱᒋᐊᕐᓗᑎᒃ 1999-ᒥ ᐊᒻᒪᓗ ᑐᒡᓕᕆᓂᐊᖅᑕᖏᑕ ᓱᓕ ᑕᑉᐸᖏᓐᓂᒃᑲᓐᓂᖅ, ᐃᑲᔪᐃᓂᕐᒥᒃ ᐃᓄᐃᑦ ᐃᓕᖅᑯᓯᖏᑕ ᓴᖅᑮᔮᖅᑎᑕᐅᓂᖏᓐᓂᒃ. ᐊᒻᒪᓗᑦᑕᐅᖅ ᓄᑖᒥ ᓄᓇᕗᖑᓂᐊᖅᑐᒥ. ᑕᐃᒪᓐᓇᑎᑐᑦᑕᐅᖅ ᑎᓕᔭᐅᓯᒪᔾᔪᑎᖃᕆᕗᖅ ᐃᓄᖕᓄᑦ ᓴᓇᕐᖑᐊᖅᑎᐅᔪᓄᑦ ᓯᕗᓂᕐᒥᒃ ᓇᓗᓇᐃᔭᖅᑎᐅᑐᐃᓐᓇᕐᓂᕐᒥᐅᓇᑎᒃ, ᑭᓯᐊᓂᓕ ᐃᔨᒋᔨᐅᖃᑕᐅᓗᑎᒃ ᑕᑯᓯᒪᔫᖃᑕᐅᓗᑎᒃ ᐊᒻᒪᓗ ᐃᓚᐅᖃᑕᐅᓯᒪᓗᑎᒃ ᑕᒪᑐᒪᓂ ᖁᕕᐊᓇᖅᑐᒥ ᓄᑖᒥᒃ ᐊᑐᖅᑕᐅᓂᐊᖅᑐᒥᒃ ᐊᕐᕌᒍᖃᕕᖕᒥ.
