“ᓄᓇᖃᖅᑳᖅᑐᑦ ᓄᓇᕐᔪᐊᓕᒫᒻᒥ ᓇᓂᑐᐃᓐᓇᖅ . . . ᖃᐅᔨᔪᒪᓚᐅᕐᐳᑦ ᖃᓄᐋᓗᒃ ᒐᕙᒪᑐᖃᒃᑯᑦ ᐱᕝᕕᒋᔪᓐᓇᓚᐅᕆᐊᒃᓴᑦᑎᓐᓂᑦ ᓄᓇᒥᓐ ᐊᓯᕗᑦ ᓄᓇᖃᖅᑳᖅᑐᑦ ᑕᐃᒪᓐᓇ ᐱᔪᓐᓇᕐᐸᖏᑎᓪᓗᒋᑦ ᐊᔩᖃᑎᒌᖕᓂᒃᑯᑦ.”
—ᐹᓪ ᖁᐊᓴ, ᐊᖓᔪᖄᖑᓪᓗᓂ ᐊᔩᖃᑕᐅᓂᑯ ᐃᓄᖕᓄ ᓄᓇᑖᕋᓱᖕᓂᕐᒧᓐ
ᓄᓇᕐᔪᐊᖅ
ᑕᐅᑐᓯᕗᖅ
ᐅᑭᐅᕐᑕᖅᑐᕐᒥᓐ
ᖃᖃᑎᒌᒃᖢᓂ ᐊᑖᓂ ᓇᐸᖅᑑᑉ ᓄᓇᐃᓐᓇᕐᒥ ᐸᓂᖅᑐᒥ ᓯᐅᕋᐃᓐᓇᕐᒥ Central Australia-ᒥ ᖃᓄᖅ ᐊᔾᔨᒋᔭᐅᙱᑦᑐᒥᒃ ᑲᒪᓇᖅᑑᔭᖅᑐᖅ ᐅᖃᖃᑎᖃᖅᑎᓪᓗᑕ ᓲᖅ ᐃᓄᐃᑦ ᓄᓇᕗᑖᕋᓱᖕᓂᕐᒥᒃ ᐊᒃᓱᕈᓚᐅᕐᓂᖏᓐᓂᒃ. ᐊᒻᒪᓗ ᖃᓄᖅ ᐊᔪᕐᓇᕈᑎᖃᖅᐸᓚᐅᕐᓂᖏᑦ. ᑭᓯᐊᓂᓕ, ᑐᑭᓯᔭᑦᑎᐊᖑᓚᐅᖅᑐᖅ ᐅᑯᓄᖓ ᐃᓐᓇᑐᖃᕆᔭᐅᔪᓄᑦ ᐃᒃᓯᕙᖃᑕᐅᔪᓄᑦ Pitjantjatjara-ᖑᓂᕋᖅᑕᐅᔪᓄᑦ. ᓯᕗᓂᕆᔭᒥᓂᒃ ᐃᒃᓯᕙᔪᑦ ᑰᕕᓂᐅᑉ ᓇᑎᖓᓂ ᐸᓂᖅᓯᒪᓕᖅᑐᒥ. ᑖᒃᑯᐊ ᓄᓇᖃᖅᑳᖅᑐᑦ ᐃᒡᓚᖃᑕᐅᓚᐅᖅᑐᑦ ᑐᓴᕋᒥᒃ ᐅᑭᐅᖅᑕᖅᑐᒥᐅᓂᑦ ᖃᐅᔨᒪᒐᒥᒃ ᐊᔪᕐᓇᕈᑕᐅᕙᓚᐅᖅᑐᓂᒃ ᐃᓕᑕᖅᓯᒐᒥᒃ ᐊᑐᖅᓯᒪᒐᒥᔾᔪᒃᑕᐅᖅ. ᐊᒻᒪᓗᑦᑕᐅᖅ ᓇᖕᒥᓂᖅ ᐅᖃᐅᓯᖃᖅᖢᑎᒃ.
ᑕᒪᓐᓇ ᑭᒃᑯᓗᒃᑖᓄᑦ ᖃᐅᔨᒪᔭᐅᙱᑦᑐᖅ ᓄᓇᖃᖅᑳᖅᑐᑦ ᓯᓚᕐᔪᐊᓕᒫᓄᑦ ᑐᑭᓯᖃᑦᑕᖃᑎᒌᒃᐸᖕᓂᖏᑦ. ᐊᔪᕐᓇᖅᑐᓕᕆᔭᐅᔪᑦ ᐅᕝᕙᓘᓐᓕᑦ ᐊᑐᓗᐊᕋᓱᒋᔭᐅᙱᑦᑐᑦ ᐊᖏᕐᕋᒥᖕᓂ, ᐃᓛᓐᓂᒃᑯᑦ ᑐᑭᓯᓇᕐᓂᖅᓴᐅᓱᖅᑐᑦ ᐊᓯᒥᖕᓄᑦ ᐅᖓᓯᖕᓂᖅᓴᐅᔪᓂ ᓯᓚᕐᔪᐊᕐᒥ. ᐊᑯᑭᑦᑐᕐᒥᐅᑦ ᐊᒻᒪᓗ ᓵᒥᑦ ᑲᑎᒪᑦᑕᓚᐅᕐᓂᖏᑦ Copenhagen-ᒥ ᓄᓇᕗᒥᐅᓂᒃ ᑲᑎᒪᖃᑎᖃᖅᖢᑎᒃ ᐊᒻᒪᓗ ᐃᓄᕕᐊᓗᐃᑦ, ᐃᖅᑭᓖᑦ, ᐃᖅᑭᓕᖓᔪᓪᓗ 1973-ᒥ ᐃᓱᒪᒋᔭᐅᔪᑦ ᐱᒋᐊᕐᕕᐅᓇᓱᒋᔭᐅᓪᓗᑎᒃ ᓯᓚᕐᔪᐊᓕᒫᒥ ᐱᕙᓪᓕᐊᑎᑕᐅᓂᖓᑦ. ᑕᐃᒪᓐᓇ ᐅᓪᓗᑕᒫᑦ ᑲᑎᒪᖃᑦᑕᓕᖅᑐᑦ, ᓇᒥᑐᐃᓐᓇᖅ ᓯᓚᕐᔪᐊᓗᒃᑖᒥ.
ᓄᓇᕗᑦ ᓯᕗᓪᓕᕐᒥᒃ ᐋᖅᑭᒃᓱᐃᓯᒪᒍᑕᐅᔪᖅ ᐱᔭᐅᔭᕆᐊᖃᖅᑐᓂᒃ ᒪᓕᒃᖢᑎᒃ ᓇᒦᓐᓂᖓᓂᒃ ᓄᓇᐅᑉ, ᐋᖅᑭᒃᓱᖅᑕᐅᓪᓗᓂ, ᓯᕗᓕᖅᑕᐅᓪᓗᓂ, ᐊᒻᒪᓗ ᐱᔪᓐᓇᖅᓯᑎᑕᐅᓪᓗᓂ ᐃᓄᖕᓄᑦ ᑕᒫᓂᕐᒥᐅᑕᓄᑦ. ᑭᓯᐊᓂᑦᑕᐅᖅ, ᐊᓯᖏᓐᓄᑦ ᐃᓕᑕᕆᔭᐅᓯᒪᓂᖃᖅᑐᖅ ᑐᑭᖃᖅᑎᑕᐅᓪᓗᓂᓗ.
ᑕᐃᑦᓱᒪᓂ ᑎᑭᓕᓵᖅᑐᖅ ᓄᓇᕗᒧᑦ ᐊᑎᓕᒃ Leif Eriksen-ᒥᒃ ᐃᓱᒪᓚᐅᖅᓯᒪᑎᓪᓗᒍ “ᓱᓇᒨᓪᓘᓐᓕᑦ ᐱᐅᓂᖃᙱᒻᒪᑦ ᐊᑐᕋᓂ” ᐊᕐᕌᒍᐃᑦ 1000-ᖑᔪᑦ ᑕᐃᑦᓱᒪᓂ ᖄᙱᓯᖅᒪᓕᖅᑐᓂ, ᐅᓂᒃᑳᑐᖃᐅᔪᓂ ᑎᑎᕋᖅᓯᒪᔪᓕᑦᑐᖅ ᑕᐃᒪᓐᓇ ᐅᖃᓚᐅᕐᓂᖓᒎᖅ. ᖃᓪᓗᓈᑦ ᑕᕆᐅᑉ ᐊᑭᐊᓂᕐᖕᒑᖅᑐᑦ ᐊᒻᒪᓗ ᑲᓇᑕᐅᑉ ᐱᖓᖕᓇᖓᓂᑦ ᖃᓄᑐᐃᓐᓇᖅ ᑕᒻᒪᖅᖢᑎᒃ ᖃᐅᔨᓯᒪᓂᖃᖅᓯᒪᖕᒪᑕ. ᐅᓇᓘᓐᓕᑦ Eriksen ᐊᒻᒪᓗ ᑭᖑᕚᖏᑦ ᐃᓕᓚᐅᖅᑐᑦ ᓄᓇᕗᑦ ᐊᒻᒪᓗ ᐊᑯᑭᑦᑑᑉ ᑲᓇᖕᓇᖓ ᓱᓇᑐᐃᓐᓇᖃᖅᖢᓂ ᐊᒃᓱᐃᓐᓂᕐᓂᒃ ᐊᑭᑐᓪᓗᑎᒃ ᓂᐅᕕᖅᑕᐅᒍᓐᓇᖅᑐᓂ ᖃᓪᓗᓈ ᓄᓇᖓᓐᓂ.
ᓄᓇᕗᑦ ᑲᓇᑕᒥ
ᖃᖓᐅᓂᖅᓴᕐᓕ ᑲᓇᑕᒥᐅᑦ ᐃᓱᒪᒋᔭᖃᖅᓯᒪᔪᑦ ᐅᑭᐅᖅᑕᖅᑐᒥᒃ ᐊᔪᖅᓴᖅᑑᓇᓱᒋᓪᓗᒋᑦ ᖃᓪᓗᓈᓂᕐᖕᒑᖅᑐᓂᒃ ᐃᓱᒪᒋᔭᐅᔪᓂᒃ ᐊᒻᒪᓗ ᓱᓕᕆᔾᔪᑎᖏᓐᓂᒃ ᐱᑕᖃᕆᐊᖃᕋᓱᒋᔭᐅᓪᓗᑎᒃ. ᑕᒪᓐᓇᑦᑕᐅᕐᓕ ᑕᒻᒫᔭᖅᓯᒪᓚᐅᕐᒥᔪᖅ. ᐃᓄᐃᑦ ᖁᕕᐊᓱᒃᑲᓗᐊᖅᖢᑎᒃ ᐊᑐᕈᓐᓇᖅᑕᒥᖕᓂᒃ ᓴᓇᕐᕈᑎᓂᒃ, ᑭᓯᐊᓂᓕ ᓇᖕᒥᓂᖅ ᐃᓱᒪᒋᔭᒥᖕᓂᒃ ᑐᕌᕈᒪᔭᒥᖕᓂᒡᓗ ᐃᓕᖅᑯᓯᕆᔭᒥᖕᓂᒡᓗ ᐊᑐᖕᒑᕈᒪᓂᖃᓚᐅᕐᒪᑕ. ᖃᓪᓗᓈᑦ ᐊᒡᕕᐊᕐᓇᕐᓂᖅᓴᐅᓪᓗᑎᒃ ᐃᒪᐃᑦᑑᔭᓚᐅᕐᒪᑕ ᐊᔪᕐᓇᕈᑎᓕᐅᖕᒑᖅᖢᑎᒃ ᐃᑲᔪᖅᐸᒃᑲᓗᐊᖅᖢᑎᒃ ᐃᓚᖓᒍᑦ. ᐊᒻᒪᓗ ᑐᑭᓯᓂᖃᓗᐊᙱᓪᖢᑎᒃ ᓱᓇᓂᒃ ᐅᑭᐅᖅᑕᖅᑐᒥᐅᑦ ᐊᑐᕆᐊᖃᖅᑕᖏᓐᓂᒃ ᐅᕝᕙᓘᓐᓕᑦ ᖃᓄᑎᒋᑦ ᐊᑦᑕᕆᔭᐅᓂᖓᑦ ᓄᓇᐅᑉ ᐊᒻᒪᓗ ᑕᕆᐅᑉ ᐃᓄᖕᓄᑦ.
ᓄᓇᕗᑦ ᐃᓚᒋᔭᑐᐃᓐᓇᐅᙱᑦᑐᖅ ᑲᓇᑕᒥ ᓇᖕᒥᓂᖃᓕᖅᑐᖅ ᓴᐃᒻᒪᑎᒥᒃ ᐊᒻᒪᓗ ᓚᐃᓴᓐᓯᖃᕈᓐᓇᕐᓂᕐᒥᒃ ᓄᓇᒃᑰᔫᒃᑯᑦ. ᐊᔾᔨᒋᔭᐅᙱᒻᒪᕆᒃᑐᖅ ᓇᓂᑐᐃᓐᓇᖅ. ᐃᓱᒪᔾᔪᓯᐅᔪᑦ ᐊᑐᑦᑕᐅᒃᑲᓐᓂᕈᓐᓇᖅᑐᑦ ᖃᓄᖅ ᐃᓱᒪᒋᔭᐅᑦᑕᕐᓂᖏᑦ ᐊᒻᒪᓗ ᓄᓇᐅᑉ ᓂᐅᕕᖅᑕᐅᒍᓐᓇᕐᓂᖓᓂᒃ ᓇᓕᒧᖃᙱᑦᑐᖅ. ᐊᔾᔨᒋᔭᐅᙱᑦᑐᒥᒃ ᐅᖃᐅᓯᓕᒃ, ᐊᒻᒪᓗ ᐅᓂᒃᑲᐅᓯᖃᖅᖢᑎᒃ ᖃᓄᖅ ᓱᓇᑐᐃᓐᓇᐃᑦ ᐃᓕᖅᑯᓯᖃᕆᐊᖃᕐᒪᖕᒑᑕ ᐊᒻᒪᓗ ᑕᒪᓐᓇ ᓇᒥᓗᒃᑖᖅ ᑲᓇᑕᒥ ᓇᓗᔭᐅᔪᖅ. ᒐᕙᒪᖃᖅᑐᖅ ᐊᔾᔨᕐᓚᐅᔭᓕᖕᒥᒃ ᐊᕕᒃᑐᖅᓯᒪᔪᓂ ᐊᒻᒪᓗ ᓄᓇᑦᓯᐊᖑᔪᓂ, ᑭᓯᐊᓂᓕ ᑐᒡᓕᖓᓂᒃ “ᒪᓕᒐᕐᔪᐊᓕᒃ” ᐃᒪᓐᓇ ᐊᖏᖃᑎᒌᒍᑎᑐᖃᒃᑯᑦ ᓄᓇᕗᑖᕐᓂᕐᒧᑦ. ᐃᓕᑕᕆᔭᐅᓯᒪᓪᓗᑎᒃ ᐊᖏᖃᑎᒌᒍᑕᐅᓚᐅᖅᑐᑦ ᐃᓄᖕᓄᓪᓗ ᑲᓇᑕᒧᓪᓗ ᐃᓛᒃᑯᖅᑐᒃᑯᑦ.
ᓄᓇᓕᖕᓂ ᐅᓇᑕᕐᑐᒃᓴᙳᐊᑦ, ᐅᓇᑕᕐᑐᒃᓴᑦ ᐱᓕᕆᔨᖏ, ᐃᓕᓐᓂᐊᕐᑎᑕᐅᕙᒃᐳᑦ ᐱᖏᖕᓇᕐᑐᓕᕆᓂᕐᒥ.
ᐃᓄᐃᑦ ᐊᔭᐅᖅᓯᓯᒪᔪᑦ ᓴᙱᔪᒥᒃ ᒐᕙᒪᒋᔭᐅᔪᒥᒃ ᓴᓇᕕᒡᔪᐊᖁᑎᖃᐅᖅᑐᒥᒃ ᓵᒋᐊᖅᑎᑎᓪᓗᑎᒃ ᓄᑖᒥᒃ ᑐᕌᒐᖃᕆᐊᖃᓕᕐᓂᖓᓂᒃ. ᐊᑐᖅᑎᓪᓗᒋᑦ 1980-ᐅᔪᑦ, ᐊᖓᔪᖅᑳᕆᔭᐅᔪᑦ ᐊᒻᒪᓗ ᑎᓕᔭᐅᓯᒪᔪᑦ ᑲᑎᒪᕕᒡᔪᐊᖃᑦᑕᖅᑎᓪᓗᒋᑦ ᒪᓕᒐᕐᔪᐊᓕᕆᓪᓗᑎᒃ ᖃᐅᔨᒪᒃᑲᓐᓂᕈᒪᑦᑕᓚᐅᖅᑐᑦ ᓄᓇᕗᒥᑦ ᖃᓄᐃᓐᓂᖓᓂᒃ ᐊᒻᒪᓗ ᑐᒃᓯᕋᖅᐸᒃᖢᑎᒃ ᓇᓗᓇᐃᕈᑎᓂᒃ. ᓄᓇᕗᑦ ᓯᕗᒻᒧᒃᓯᒪᔪᖅ ᐅᐃᒪᔮᓗᐊᕋᓂ ᓂᐱᑭᓪᖢᓂᓗ. ᐊᒻᒪᓗ ᐊᓯᖏᓐᓄᑦ ᓄᓇᖃᖅᑳᖅᑐᒥᐅᓄᑦ ᐊᑭᕋᖅᑐᖅᑕᐅᓯᒪᓪᓗᑎᒃ ᐊᔾᔨᒋᙱᑕᖓᓐᓂᒃ ᒪᓕᒐᓕᕆᓂᕐᒥᒃ ᐊᑐᐊᕆᔭᖃᖅᑐᓂᒃ.
ᑕᒪᓐᓇ ᕿᓚᒥᒃᑯᑦ ᐊᓯᔾᔨᓚᖓᔪᖅ. ᐃᖏᕐᕋᓯᑐᐊᖅᐸᑦ ᓄᓇᕗᑦ ᐃᓕᓐᓂᐊᖅᑕᐅᓇᔭᖅᑐᖅ, ᐳᓛᖅᑕᐅᓗᓂᓗ, ᐊᒻᒪᓗ ᐅᐱᒋᔭᐅᓗᓂ ᐊᒥᓱᓄᑦ ᓄᓇᖃᖅᑳᖅᑐᒥᐅᓄᑦ ᑲᓇᑕᓕᒫᒥ. ᑕᒪᕐᒥᓕᒫᑦ ᓄᓇᖃᖅᑳᖅᑐᒥᐅᑦ ᐊᑕᐅᓯᕐᒥᒃ ᐱᔪᒪᓂᖃᖅᑐᑦ. ᐊᐃᕙᐅᑎᔪᓐᓇᖅᑐᑦ ᐃᓱᒪᓕᐅᕈᑎᐅᔪᓂᒃ ᐊᒻᒪᓗ ᓇᓗᓇᐃᒃᑯᑕᓂᒃ ᐱᔾᔪᑎᖃᕐᓗᑎᒃ, ᑭᓯᐊᓂᓕ ᓇᖕᒥᓂᖅ ᒐᕙᒪᖃᕐᓂᒃᑯᑦ ᐊᐅᓚᓐᓂᖃᕈᒪᔪᑦ ᐊᒻᒪᓗ ᓄᓇᖁᑎᒋᔭᒥᖕᓂᒃ ᓇᖕᒥᓂᖅ ᐊᐅᓚᑦᑎᓗᑎᒃ. ᐅᓇᓕ ᐊᔾᔨᒋᙱᓐᓂᕆᔭᐅᔪᖅ ᓄᓇᕗᒥ ᐊᖏᓛᖑᓂᖓ ᐊᓯᖏᓐᓂᑦ ᓄᓇᖃᖅᑳᖅᑐᓂᑦ ᐊᕕᒃᑐᖅᓯᒪᓂᕆᔭᐅᔪᓂ ᑲᓇᑕᒥ.
ᓄᓇᕗᑦ ᓯᓚᕐᔪᐊᓕᒫᒥ
ᓄᓇᕗᑦ ᐃᓄᑐᐃᓐᓇᕐᓗ ᐃᓱᒪᒋᔭᑐᐃᓐᓇᐅᙱᓕᕐᒪᑦ. ᐅᕝᕙᓘᓐᓃᑦ ᐊᑐᖅᑐᑐᐊᖑᙱᓪᖢᓂ ᑲᓇᑕᒥ. ᐊᑐᓪᓚᕆᒃᑐᖅ ᓯᓚᕐᔪᐊᓕᒫᒥ.
ᓄᓇᓕᖃᑎᒌᓄᑦ ᓯᓚᕐᔪᐊᓗᒃᑖᕐᒥ, ᐃᓱᒋᔭᐅᔪᖅ ᑲᒪᒋᔭᐅᑦᑕᓚᐅᕐᓂᖅ ᓱᕈᓯᖅᑎᑐᑦ ᐊᖓᔪᖅᑳᖃᖅᑐᑎᑐᑦ ᐊᒻᒪᓗ ᖃᓪᓗᓈᑦ ᐃᓱᒪᑕᐅᑦᑕᕐᓂᖏᓐᓄᑦ. ᑐᑭᓕᒃ ᐅᑭᐅᖅᑕᖅᑐᖅ ᓇᖕᒥᓂᕆᔭᐅᓕᕐᓂᐊᕐᓂᖓᓂᒃ ᐅᑭᐅᖅᑕᖅᑐᒥᐅᓄᑦ. ᑕᒪᓐᓇ ᑲᑉᐱᐊᓇᙱᑦᑐᖅ ᓇᖕᒥᓂᖅ ᐃᓄᐃᑦ ᐊᕕᒃᑐᖅᓯᒪᔪᒥ ᐊᐅᓚᑦᑎᓕᕈᓐᓇᕐᓂᖏᓐᓂᒃ ᓱᓕᕆᐊᒥᖕᓂᒃ ᐊᔪᕐᓇᖅᑐᖃᖅᐸᖕᓂᖏᓐᓂᒡᓗ. ᑐᑭᓯᓐᓇᖅᑐᖅ ᖃᓪᓗᓈᖅ ᐱᕈᓕᑕᐃᓐᓇᕐᓂᖏᓐᓂᒃ ᑐᑭᓯᓂᕐᒥᒍᑦ.
ᓄᓇᕗᑦ ᑐᑭᖃᕐᒥᔪᖅ ᒐᕙᒪᒋᔪᒪᔭᒥᒃ ᓂᕆᐊᕈᓐᓇᕐᓂᕐᒥᒃ ᐊᒻᒪᓗ ᑭᒃᑯᓗᒃᑖᔪᑦ ᐱᔪᓐᓇᐅᑎᐅᔪᑦ ᓇᖕᒥᓂᕆᔭᐅᖕᒪᑕ ᑭᑐᓗᒃᑖᓄᑦ. ᐊᒻᒪᓗ ᐅᑕᖅᑭᔭᐅᒋᐊᖃᕋᓂ ᓂᐅᕕᖅᑕᐅᓇᓱᒋᐊᒃᓴᖅ ᒥᓕᐊᓐᓂᒃ ᐃᓄᖃᓕᑕᐃᓐᓇᕈᓂ ᓄᓇᖁᑎᒋᔭᒥᓂ. ᐅᕝᕙᓘᓐᓕᑦ ᐅᖅᓱᐊᓗᖕᓂᐊᖅᑐᖃᓕᕈᑎᒃ ᐊᖑᓇᓱᒡᕕᒋᓱᖅᑕᒥᓂ ᐊᒻᒪᓗ ᑮᓇᐅᔭᖁᑎᒃᓴᐅᔪᓂᒃ ᐱᑕᖃᓕᕈᑎᒃ ᓄᓇᒋᔭᒥᓂᑦ ᐊᐅᓪᓚᖅᑎᑕᐅᓱᖅᑐᓂᒃ.
ᐊᒥᓱᓂᒃ ᐱᑕᓕᒃ ᑕᑯᔭᐅᔪᓐᓇᕈᑎᓂᒃ ᓄᓇᕗᑦ ᐅᐱᒋᔭᐅᓂᖓᓂᒃ ᐊᓯᒋᔭᑦᑎᓐᓂ. ᐊᑕᐅᓯᕐᒥ ᑲᑎᒪᕕᒡᔪᐊᕐᓂᕆᔭᒥ 1994-ᒥ Canberra, Australia-ᒥ ᓯᓚᕐᔪᐊᓕᒫᒥ ᖃᐅᔨᒪᔨᕐᔪᐊᓂᒃ ᒪᓕᒐᕐᔪᐊᓕᕆᑎᓪᓗᒋᑦ, ᐃᓚᒋᔭᖏᑦ ᑎᑎᕋᖅᑐᑦ ᖃᐅᔨᒃᑲᓐᓂᕈᒪᓚᐅᖅᑐᑦ ᓄᓇᕗᒥ ᒐᕙᒪᓕᕆᓂᖓᓐᓂᒃ. ᐋᕕᕆᒃᑲᐅᑉ (South Africa) ᓄᑖᕐᒥᒃ ᒪᓕᒐᕐᔪᐊᖓᓂᒃ ᑎᑎᕋᓕᖅᑎᓪᓗᒋᑦ ᐊᒻᒪᓗ ᐊᑐᖅᖢᑎᒃ ᐅᖃᓕᒫᒐᓕᐊᖑᓯᒪᔪᓂᒃ ᐅᖃᐅᓯᕆᔭᐅᔪᓂᒡᓗ ᐅᖃᕆᐊᖅᑐᖅᑎᑕᐅᔪᒧᑦ. ᐊᒻᒪᑦᑕᐅᖅ ᑲᑎᒪᓂᕆᔭᐅᔪᒥ Brisbane, Australia-ᒥ 1996-ᒥ ᐃᖅᑲᖅᑐᐃᔨᐅᔪᖅ New Zealand-ᒥ ᐃᖅᑲᓇᐃᔮᖃᖅᑐᒥᒃ ᓄᑖᕐᒥᒃ ᐊᐅᓚᓐᓂᕆᔭᐅᒍᑕᐅᓇᔭᖅᑐᒥᒃ ᑕᐃᑯᖓ ᓄᓇᖁᑎᒋᔭᒥᓄᑦ ᐊᓕᐊᓇᐃᒋᔭᖃᓚᐅᖅᑐᖅ ᐃᓄᐃᑦ ᓯᕗᒻᒧᒃᓯᒪᓂᖏᓐᓂᒃ. ᓄᓇᖃᖅᑳᖁᑎᒥᖕᓂᒃ (Maori) ᓯᕗᒻᒧᒍᑕᐅᓇᔭᕐᓂᐅᔪᓂᒃ ᐃᓱᒪᓚᐅᖅᑐᑦ ᐃᓄᐃᑦ ᐊᑐᖅᓯᒪᔭᖏᓐᓂᒃ ᐊᔾᔨᖃᕈᑎᒃ. ᐊᓯᖏᑦᑕᐅᖅ ᑲᑎᒪᖃᑕᐅᔪᑦ ᓂᕆᐅᙱᓪᖢᑎᒃ ᖁᐊᖅᓵᓚᐅᕐᒪᑕ ᐅᖃᕋᒪ ᑕᐃᒪᓐᓇᑦᑕᐅᖅ ᐋᖅᑭᒍᑕᐅᒍᓐᓇᕋᔭᕐᓂᖓᓂᒃ Australia-ᒥ ᓄᓇᖁᑎᖏᑕ ᐊᕕᒃᑐᖅᓯᒪᓂᖓᓐᓂ Queensland-ᒥ. ᑭᖑᓂᐊᒍᑦ ᐊᕐᕌᒎᔪᒥ ᓱᓕ ᑖᑦᓱᒪᓂ ᐳᖅᑐᓂᖅᐸᐅᓪᓗᓂ ᐃᖅᑲᖅᑐᐃᔨᓕᕆᔨᐅᔪᑦ ᐋᖅᑭᒃᓱᐃᓚᐅᖅᑐᑦ ᓄᓇᖁᑎᒋᔭᐅᔪᒥ ᓄᓇᖃᖅᑳᖅᑐᑦ ᓇᖕᒥᓂᖁᑎᒋᔪᓐᓇᖅᑕᖏᓐᓂᒃ ᓄᓇᖃᓕᕈᓐᓇᕐᓂᖏᓐᓂᒃ. ᒫᓐᓇᐅᔪᕐᓕ, ᒐᕙᒪᒋᔭᐅᔪᖅ, ᓄᓇᖃᖅᑳᖅᑐᐃᑦ, ᐊᒻᒪᓗ ᐊᕙᑎᓕᕆᔨᐅᔪᑦ ᕿᒥᕐᕈᓕᖅᑐᑦ ᓄᓇᕗᑦ ᐊᔾᔨᓕᐅᖅᑕᐅᒍᓐᓇᕐᓂᖓᓂᒃ. ᒍᒥᐅᑎᑭᖑᓗᓂᖑ-ᒥ ᒪᓕᒐᓕᐅᕐᕕᖓᑦ ᐱᒋᐊᖅᑎᑎᖁᔨᓚᐅᖅᑐᑦ ᓄᓇᕗᑦ ᐃᓕᓐᓂᐊᖅᑕᐅᖁᓪᓗᒍ ᓄᓇᖃᖅᑳᖅᑐᖏᓐᓄᑦ (Torres Strait Islanders), ᐳᐃᔨᓂᒃ ᐱᓇᓱᒃᑎᐅᔪᓄᑦ ᐃᓕᖅᑯᓯᑐᖃᕐᒥᖕᓂᒃ ᓱᓕ ᐊᑐᖅᑐᓄᑦ ᕿᑭᖅᑕᕆᔭᒥᖕᓂ ᐊᒻᒪᓗ ᓇᖕᒥᓂᖅ ᒐᕙᒪᖁᑎᖃᕈᒪᔪᓄᑦ ᐊᒻᒪᓗ ᑕᕆᐅᒧᑦ ᐱᔪᓐᓇᐅᑎᖃᕈᒪᔪᓄᑦ. ᐊᒻᒪᓗᑦᑕᐅᖅ, ᐅᓇ ᐅᑭᐅᖅᑕᖅᑐᒥ ᐊᑐᐊᒐᓕᐊᖑᔪᖅ ᐅᑯᓄᖓ ᐋᖅᑭᒃᑕᐅᓯᒪᔪᖅ ᓯᓚᕐᔪᐊᓕᒫᒥ ᐃᓄᐃᑦ ᐱᔾᔪᑎᒋᓪᓗᒋᑦ ᑲᑎᒪᕕᒡᔪᐊᖓᓐᓂᑦ—ᑐᖖᑲᓂᖅ ᓄᓇᕗᒥ ᐃᓕᑕᐅᓯᒪᔪᓂᒃ, ᐃᓄᕕᐊᓗᖕᓂᑦ, ᐊᒻᒪᓗ ᑯᐃᐱᐊᒃ ᑕᕐᕋᖓᓂᑦ—ᐊᑐᖅᑕᐅᒐᔪᒃᑐᖅ ᐃᓕᑕᕆᔭᐅᓂᖃᑦᑎᐊᖅᖢᓂ ᓯᓚᑦᑐᖅᓴᕐᕕᖕᓂ ᖃᐅᔨᓴᕐᕕᖏᓐᓂ ᐊᒻᒪᓗ ᓄᓇᖃᖅᑳᖅᑐᓄᑦ ᑎᒥᖁᑎᒋᔭᐅᔪᓂ ᖃᓪᓗᓈᑦ ᓄᓇᖓᑦᑕ ᒥᒃᓵᓐᓕᑦᑐᓄᑦ.
ᐅᖅᑰᔪᐊᓗᖕᒥ ᒪᓴᓕᐊᓗᖕᒥ ᖃᓂᒋᔭᖓᓂ Gulf of Carpentaria-ᒥ ᐅᕙᓕᑦᑐᒥ Australia ᑲᓇᖕᓇᖓᓂ, ᓄᓇᖃᖅᑖᖅᑐᑦ ᐃᓕᖅᑯᓯᑐᖃᕐᒥᖏᓂᒃ ᒪᓕᒃᖢᑎᒃ ᓴᓇᒍᑎᖃᐅᓕᖅᑐᑦ ᓄᓇᕗᒥ ᐃᓱᒪᒋᔭᐅᓯᒪᔪᓂᒃ ᐊᑐᖅᖢᑎᒃ. ᐃᓱᒪᒋᔭᐅᔪᑦ ᐊᑐᖅᑕᐅᒐᔪᒃᑐᓪᓗ ᐃᒪᓐᓇ ᓱᓕᕆᔾᔪᑕᐅᓪᓗᑎᒃ ᒪᑯᓄᖓ ᐊᐅᓚᑦᑎᖃᑕᐅᓂᕐᒥᒃ ᐃᖃᓗᒃᓯᐅᖅᑐᓕᕆᓂᕐᒥᒃ, ᐆᒪᔪᕐᓂᐊᖅᑐᓕᕆᓂᕐᒥᒃ, ᐊᒻᒪᓗ ᐊᕙᑎᓕᕆᓂᕐᒥᒃ. ᐃᓕᓐᓂᐊᖅᑎᑎᒍᓐᓇᕋᔭᖁᓪᓗᒋᑦ ᒐᕙᒪᒋᔭᒥᖕᓂᒃ ᖃᓄᖅ ᐸᐸᑦᓯᒍᓐᓇᕋᔭᕐᒪᖕᒑᑕ ᓴᓇᕕᒡᔭᐅᕕᐅᔪᓂᑦ ᐊᒻᒪᓗ ᐱᕙᓪᓕᐊᑎᑕᐅᔪᓂᒃ ᐊᖏᔪᓂᑦ. ᓯᓚᕐᔪᕐᒥ ᓇᑉᐸᓪᓚᕆᓇᔭᖅᑕᖓᑕ ᐅᖓᓯᖕᓂᖓᑕ ᐊᑭᐊᓂ, ᐃᖅᑭᓖᑦ ᓄᓇᖃᖅᑳᖅᑐᖁᑎᒋᔭᐅᔪᑦ Amazon-ᒥ ᐅᔾᔨᕆᔭᖃᖅᐸᓪᓕᐊᓕᖅᑐᑦ ᖃᓄᖅ ᐃᓄᐃᑦ ᐊᒻᒪᓗ ᒐᕙᒪᐃᑦ ᓄᓇᕗᑖᕈᑎᒃᑯᑦ ᐊᖏᕈᑎᒋᔭᐅᔪᒃᑯᑦ ᐊᒻᒪᓗ ᐱᕐᖑᖅᑎᑕᐅᓂᖓᑎᒍᑦ, ᓴᓇᖃᑎᒌᒃᓯᒪᓂᖓᓂᒃ ᓯᕗᒻᒧᒃᑕᐅᒐᓱᐊᖅᑐᓂᒃ. ᒪᑯᐊ ᐊᔪᕐᓇᕈᑕᐅᓱᖅᑐᑦ ᐃᓅᓯᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ, ᐊᒻᒪᓗ ᐊᐅᓚᑦᑎᖃᑎᒌᒍᓐᓇᕐᓂᕐᒧᑦ ᐊᑐᖅᑕᐅᒃᑲᓐᓂᕈᓐᓇᖅᑐᓂᒃ ᐃᖅᑲᓇᐃᔭᖃᑎᒌᒍᔾᔭᐅᓪᓗᑎᒃ ᓯᕗᒻᒧᒃᑎᑕᐅᓯᒪᓕᕐᒪᑕ. ᑕᒪᓐᓇᓗ ᐃᓕᕝᕕᐅᓯᒪᓕᖅᖢᓂ ᖃᓄᑎᒋ ᐊᑲᐅᔪᒃᑯᑦ ᐃᖏᕐᕋᒍᓐᓇᕋᔭᖁᑎᖃᕐᓂᖓ.
ᑕᒪᓐᓇ ᑎᑎᕋᖅᑕᐅᓂᖓᓂ, ᓄᓇᖃᖅᑳᖅᑐᑦ ᐊᒻᒪᓗ ᖃᐅᔨᒪᔩᑦ ᐊᔾᔨᒌᙱᑦᑐᑦ ᑲᑎᒪᓚᐅᖅᑐᖅ ᓄᓇᒋᔭᒥ ᒥᑭᑦᑑᔪᒥ ᐱᖓᖕᓇᖓᓂ Darwin-ᒥ Northern Australia-ᒥ ᓯᕗᓂᕐᒧᑦ ᒪᓕᒐᕐᔪᐊᓕᕆᓂᕐᒥᒃ ᐸᕐᓇᐃᓂᐊᖅᖢᑎᒃ. ᕿᒥᕐᕈᔪᐃᑦ ᓄᓇᓕᒫᒥᓄᑦ ᐊᒻᒪᓗ ᐊᕕᒃᑐᖅᓯᒪᔪᖁᑎᒥᓄᑦ ᐊᓯᔾᔨᕈᑎᐅᓇᔭᖅᑐᓂᒃ. ᐊᒻᒪᓗ ᓇᓗᓇᐃᔭᕈᑎᖏᑕ ᐃᓚᒋᔭᖃᖅᑐᑦ ᓄᓇᕗᓕᕆᔪᓂᒃ ᐅᖃᓕᒫᒐᒃᓴᓂᒃ ᐊᒻᒪᓗ ᐊᓯᖏᑦᑕᐅᖅ ᓄᓇᕗᒥᒃ ᐱᔾᔪᑎᓕᖕᓂᒃ. ᑕᐃᑲᓂ 1992-ᖑᓚᐅᖅᑎᓪᓗᒍ, ᔮᓐ ᐊᒪᕈᐊᓕᒃ ᐳᓚᕋᓚᐅᖅᑐᖅ Darwin, Australia-ᒧᑦ, ᐅᖃᕆᐊᖅᑐᖅᑎᑕᐅᓪᓗᓂ ᓄᓇᕗᒥᒃ ᐱᔾᔪᑎᖃᖅᖢᓂ, ᐊᒥᓱᑦ ᑖᒃᑯᐊ ᑕᐃᑲᓈᓚᐅᕐᒪᑕ ᑲᑎᒪᔪᓂ.
ᑭᓯᐊᓂᓕ, ᐃᑲᔪᕈᒪᔪᑦ ᑖᒃᑯᐊᑐᐊᖑᙱᒻᒪᑕ ᓄᓇᕗᒥᒃ ᑐᓴᖅᑎᑎᒍᑎᖃᕈᒪᔪᑦ. ᐃᓚᖏᑦ ᐊᒥᐊᓕᒃᑲᒥᐅᑦ ᓇᓗᔪᑦ ᐅᖃᓕᒫᒐᓕᐅᓚᐅᕐᒪᑕ ᐅᖃᖅᓯᒪᔪᒥᒃ ᓄᓇᕗᒎᖅ ᑯᐃᓐᒧᑦ ᐅᐃᖓᓄᓪᓗ—ᐊᑎᖏᒃ ᑎᑎᕋᖅᓯᒪᓪᓗᑎᒃ ᖄᖓᓂ ᐅᖃᓕᒫᒐᐅᑉ ᐊᖏᖃᑎᒌᒍᑎᕕᓂᐅᑉ ᐊᒻᒪᓗ ᑭᕐᖓᕐᒥᐅᑦ ᓴᓇᕐᖑᐊᖅᑎ ᕿᓐᓄᐊᕐᔪᐊᖅ ᐋᓯᕙᐅᑉ ᓴᓇᕐᖑᐊᒐᖏᑦ—ᑎᑎᕋᖅᓯᒪᖕᒪᑕᒎᖅ ᓄᓇᖁᑎᒋᔭᐅᔪᑦ ᐊᕕᒃᑕᐅᖁᓪᓗᒋᑦ ᐊᒻᒪᓗ ᓱᓇᑐᐃᓐᓇᖁᑎᖏᑦ ᑎᒡᓕᒃᑕᐅᖁᓪᓗᒋᑦ. ᑕᒪᒃᑯᐊ ᐅᖃᓕᒫᒐᓕᐊᖑᓯᒪᔪᑦ ᑮᓇᐅᔭᓕᐅᕈᑕᐅᖕᒪᑕ!
ᑕᐃᒃᑯᐊᓪᓘᓐᓕᑦ ᐊᖓᔪᖅᑳᕆᔭᐅᓚᐅᖅᑐᑦ ᓯᕗᓕᖅᑎᐅᓪᓗᑎᒃ ᐃᖅᑲᖅᑐᐃᔨᐅᓪᓗᓂ ᐊᑕᐅᓯᖅ Australia-ᒥ, ᐊᐃᑉᐸᖓᓗ ᐊᕕᒃᑐᖅᓯᒪᔪᒥ ᑲᓇᖕᓇᖓᓂ ᐊᖓᔪᖅᑳᕆᔭᐅᔪᓪᓗᓂ, ᖃᐅᔨᒪᓂᖅᓴᐅᔪᒃᓴᐅᒐᓗᐊᒃ ᓄᓇᕗᒥᒃ ᐊᑲᐅᒃᓴᙱᓯᒪᔪᒃ ᐅᓗᕆᐊᒋᓪᓗᓂᔾᔪᒃ. ᐊᒻᒪᓗ ᑕᐃᒪᓐᓇ ᑐᓴᖅᑎᑎᓱᖅᖢᑎᒃ ᐅᖃᕆᐊᖅᑐᖅᑎᑕᐅᒐᐃᒐᒥᒃ ᑐᓴᕈᑎᒃᓴᓕᕆᒐᖓᒥᒡᓗ. ᐃᓱᒪᒋᔭᖃᕈᒪᙱᒧᑦ ᓇᓕᔪᒋᐊᒃᓴᖏᓐᓂᒃ ᓄᓇᖃᖅᑳᖅᑐᒥᐅᑦ (Aborigines) ᐊᒻᒪᓗ Torres Strait Islanders-ᒥᐅᑦ ᖃᓪᓗᓈᓄᑦ ᐅᕝᕙᓘᓐᓃᑦ ᐃᒪᓐᓇᖃᐃ ᐃᓂᖃᖁᔨᓇᑎᒃ ᓄᓇᖁᑎᒋᔭᒥᖕᓂᒃ ᐅᐱᒋᔭᐅᒍᑕᐅᓂᖃᕋᔭᖅᑐᓂᒃ. ᓂᕆᐅᖕᓂᖃᖅᑕᓕ ᐃᓄᐃᑦ ᐊᒻᒪᓗ ᒐᕙᒪᒋᔪᒪᔭᒥᒃ ᓂᕈᐊᕈᓐᓇᕐᓂᖅ ᓇᒥᑐᐃᓐᓇᓕᒫᖅ ᓂᕐᖓᒍᑕᐅᑦᑕᕋᔭᕐᓂᖓᓐᓂᒃ ᓯᓚᕐᔪᐊᕐᒥᐅᑕᓗᒃᑖᒥ.
ᑭᓯᐊᓂᓕ, ᑖᒃᑯᐊ ᐃᓕᒍᑎᑐᐃᓐᓇᐅᙱᑦᑐᑦ ᓄᓇᕗᓕᕆᓂᒃᑯᑦ, ᓇᖕᒥᓂᕆᔭᐅᔪᓂᒡᓕ ᓄᓇᖃᖅᑳᖅᑐᒥᐅᑦ ᐱᕙᓪᓕᐊᒍᓐᓇᕐᓂᖏᑦ ᐊᑐᖅᑐᑦ. ᐱᓗᐊᖅᑐᒥᒃ ᐱᒃᓴᖅᑐᓂᖃᙱᑦᑐᓄᑦ ᑎᑭᑕᐅᓴᕋᐃᙱᑦᑐᓄᑦ ᐃᓕᒍᑕᐅᔪᖅ ᐊᔾᔨᓕᐅᖅᑕᐅᒍᓐᓇᖅᖢᓂ—ᓄᓇᖃᖅᑳᖅᑐᑦ ᓇᖕᒥᓂᖅ ᐊᐅᓚᓐᓂᖃᓕᕈᓐᓇᕐᓂᖓᑦ—ᑖᓐᓇ ᐱᐅᓂᖅᐸᐅᔪᖅ. ᐃᓄᐃᑦ ᑕᐱᕇᒃᓴᒃᑯᓐᓂ ᓯᕗᓕᖅᑎᐅᖃᑕᐅᓚᐅᖅᑐᖅ ᕉᔅᒥᐊᕆ ᑯᑉᑖᓇ ᐅᖃᐅᓯᖃᓚᐅᖅᑐᖅ ᓴᓇᓯᒪᓂᕆᔭᓐᓂᒃ ᐱᔾᔪᑎᖃᖅᖢᓂ ᓄᓇᖃᖅᑳᖅᑐᓄᑦ ᑕᐃᑲᓂ Alice Springs-ᒥ ᕿᑎᖓᓂ Australia-ᒥ. ᑲᑎᒪᔪᓄᑦ ᖃᐃᖁᔭᐅᑦᑕᕈᑎᒋᓚᐅᖅᑕᕋ. ᐅᖃᓕᒫᖅᓯᒪᓪᓗᑎᒃ ᐃᓚᖏᑦ ᑎᑎᕋᖅᓯᒪᔭᓐᓄᑦ ᓄᓇᕗᓕᕆᔪᒥᒃ. ᑭᓯᐊᓂᓕ ᓄᓇᕗᑦ ᐃᓕᑕᕆᔭᐅᓂᖃᕈᓐᓇᕐᒪᑦ ᓂᕆᐅᖕᓂᕐᒥᒃ. ᐊᑕᐅᓯᖅ ᐅᖃᖅᑐᖅ ᐃᖅᑲᐅᒪᔭᕋ “ᐊᑏ ᓄᑳᖅ!”, ᑲᕐᖑᓱᒃᑐᒧᑦ ᑲᑎᒪᑎᓪᓗᒋᑦ. “ᑖᒃᑯᐊ ᐃᓄᐃᑦ ᐱᔭᕇᖅᓯᒪᓕᖅᑕᖓᑦ!”
ᑕᒪᓐᓇ ᐊᑐᕐᓂᖅᐸᖑᔪᖅ ᑐᓴᖅᑕᐅᔪᒃᓴᓂ ᓇᒥᑐᐃᓐᓇᖅ ᐃᓄᖕᓄᑦ ᓵᓚᒋᔭᐅᓯᒪᔪᓂ: ᐃᓄᐃᑦ ᓴᓇᓯᒪᔪᑦ ᓄᓇᕗᒥᒃ. ᐊᓯᖏᑦᑕᐅᖅ ᓴᙱᓂᖃᓕᕐᓗᑎᒃ ᓴᐱᙱᓪᓗᑎᒃ ᐱᔫᓐᓇᕐᒥᔪᑦᑕᐅᖅ.
