“ᑕᒑᖅ ᑰᓕ, ᐊᖓᔪᖅᑳ ᐃᓄᐃᑦ ᑕᐱᕇᒃᓴᑦᑯᓐᓄ, ᐅᖃᖃᐅᑎᒋᔪᖅ ᓅᑖᖅ ᓄᓇ ᐃᒻᒥᑰᕐᓂᐊᓕᕐᑐᖅ ᐊᑎᖃᕋᔭᕐᓂᖓᓂᑦ ‘ᓄᓇᕗᑦ.’”
—ᐃᓄᐃᑦ ᑕᐱᕇᒃᓴᑦᑯ ᒪᓕᒐᓕᕆᔨᖓ ᐲᑕ ᑲᒥᖕ, ᐃᖅᑲᐅᒪᕗᖅ ᔫᓂ 1974-ᒥ, ᑕᓗᕐᔪᐊᑉ ᐃᓕᓐᓂᐊᕐᕕᖓᑕ ᒪᔪᕋᐅᑎᖏᓐᓂᑦ, ᐃᓄᐃᑦ ᓄᓇᑖᕋᓱᖕᓂᕆᔭᖓ ᑕᒪᐃᑎᒍᑦ ᑕᐅᑐᒃᑕᐅᓂᐅᔪᖅ ᒥᑭᒡᓕᒋᐊᕐᑐᖅ ᓴᖅᑭᑦᑎᓂᕐᒧᓐ ᐃᒻᒥᒃᑰᓕᖓᔪᒥ ᑕᐃᔭᐅᔪᒃᓴᒥᓐ “ᓄᓇᕗᑦ”
ᐅᖃᓪᓚᐅᓯᕗᑦ, ᐅᕙᒍᑦ
ᐊᖓᔪᖅᑳᕆᔭᑦ ᐃᑲᔪᖅᑎᖃᕐᓗᑎᒃ
ᐃᓕᓐᓂᐊᕐᕕᖕᓂᑦ ᒐᕙᒪᒃᑯᓐᓂᒡᓗ
ᐱᓪᓗᐊᑕᒻᒪᕆᐅᓂᐊᖅᐳᑦ ᐅᐱᒍᓱᖕᓂᖃᕐᓂᕐᒥᒃ
ᐅᖃᐅᓯᕐᒥᖕᓂᒃ ᐊᒻᒪᓗ ᐊᑐᕈᓱᒍᒥᒍᓱᒃᑎᑦᑎᓗᑎᒃ
ᑭᖑᕚᕆᓂᐊᖅᑕᑦᓂᓐᓄᑦ
[ᐃᓄᐃᑦ ᐅᖃᐅᓯᖓᑦᑕ ᐋᖅᑭᐅᒪᓂᖓ]
[ᐊᔾᔨᒌᓕᖅᑎᑦᑎᓂᖅ]
[ᐃᓄᐃᑦ ᐅᖃᐅᓯᖓᑦᑕ ᐱᑕᖃᐃᓐᓇᕐᓂᒃᓴᖓ]
[ᐊᖏᕐᕋᒥ ᐃᓄᒃᑎᑐᑦ ᐅᖃᓪᓚᖃᑦᑕᕈᒪᓂᖅ]
[ᐃᓕᓐᓂᐊᕐᓂᓕᕆᓂᖅ]
[ᒐᕙᒪᒃᑯᑦ]
[ᐅᖃᐅᓯᕐᓗ ᐃᓕᖅᑯᓯᕐᓗ ᓯᕗᓂᑦᑎᓐᓂ]
ᓇᑕᒥᐅᓄᑦ ᐃᓕᖅᑯᓯᐅᓂᕋᖅᑕᐅᔪᖃᕈᓐᓇᖅᐸ? ᐃᓄᖕᓄᑦ ᐃᓕᖅᑯᓯᐅᓂᕋᖅᑕᐅᔪᖃᕈᓐᓇᖅᐸ? “ᐃᓅᓯᖅ” ᐃᓄᖕᓄᑦ ᐊᑐᖅᑕᐅᓚᐅᓲᖑᕗᖅ ᐃᓅᑉ ᐱᐅᓯᖓᓂᒃ ᐅᖃᐅᓯᖃᖅᖢᑎᒃ. ᑖᓐᓇ ᑐᙵᓂᖃᕐᒪᑦ ᐅᖃᐅᓯᕐᒥᒃ “ᐃᓄᒃ”ᒥᒃ. ᑭᓇᐅᓂᕋᓗ ᐅᖃᓪᓚᒍᓯᕋᓗ ᐊᒃᑐᐊᖃᑦᑕᐅᑎᓂᖃᖅᐹᒃ? ᐅᓂᒃᑲᐅᓯᕆᓚᐅᕐᓚᕗᑦ.
ᐊᕐᕌᒍᒐᓴᐅᓕᖅᐳᑦ ᑯᑉᓗ ᑎᑎᕋᓚᐅᖅᑎᓪᓗ ᐃᖅᑲᓇᐃᔭᖅᑎᙳᕋᓱᖕᓂᕐᒧᑦ ᐃᓄᐃᑦ ᑎᒥᖁᑎᖓᑦᑕ ᐃᓚᖓᓄᑦ ᐋᑐᕚᒥ ᐊᒻᒪᓗ ᐃᖕᒥᓂᒃ ᐅᖃᐅᓯᕆᓯᒪᔪᒥᒃ ᓇᒃᓯᐅᔾᔨᖃᓯᐅᔾᔨᓪᓗᓂ. ᕿᒥᕐᕈᒃᑲᓐᓂᓕᕋᒥᐅᒃ ᐃᓱᒪᓕᓚᐅᖅᐳᖅ, “ᐅᓇᓕ ᐃᓄᖕᓄᑦ ᑎᒥᖁᑎᒋᔭᖅ. ᑖᔅᓱᒥᖓ ᑎᑎᕋᖅᓯᒪᔪᒥᒃ ᐅᖃᓕᒫᖅᑐᖅ ᐃᓄᓪᓚᕆᐅᒍᓂ ᖃᓄᖅ ᐃᓱᒪᒋᓕᕌᔭᖅᐹᖓᑭᐊᖅ.”
ᐃᓄᒃᑎᑑᖓᓕᖅᑎᖦᖢᓂᐅᒡᓗ... ᑭᓯᐊᓂ ᑖᓐᓇ ᑎᑎᕋᖅᑲᐅᔭᓂ ᐅᖃᓕᒫᒃᑲᓐᓂᕋᒥᐅᒃ ᐃᖕᒥᓂᒃ ᐱᐅᑎᑦᑐᐊᓘᔮᖅᖢᓂ ᐊᓯᒥᓂᒃ ᐃᖅᑲᒍᓱᖕᓂᖃᖅᑰᔨᙳᑦᑎᐊᖅᖢᓂᓗ, ᐃᓄᕈᓗᑐᐃᓐᓇᐅᖅᑰᔨᑎᓯᒪᑦᑎᐊᖅᖢᓂᓗ. ᑖᓐᓇ ᖁᔭᓈᖅᖢᓂᐅᒃ ᐃᓄᒃᑎᒐᖅ ᑎᑎᕋᓕᖅᖢᓂ. ᑖᓐᓇ ᖃᓄᐃᖅᑰᔨᙳᑦᑎᐊᖅᖢᓂ ᖃᓪᓗᓈᑑᓕᖅᑎᓚᐅᖅᑳᕋᓂᒃ. ᖃᓪᓗᓈᑑᓕᖅᑎᓯᒪᔭᖓ ᖃᓱᖓᖅᑰᔨᓪᓗᓂ, ᑐᕌᖓᓂᖃᑦᑎᐊᖅᑰᔨᙳᖦᖢᓂᓗ, ᐃᖕᒥᓂᒡᓗ ᓱᓇᐅᒃᓴᖅᑰᔨᓇᓂ.
ᐊᒡᓛᑦ, ᖃᐅᔨᓴᖅᑕᐅᖃᑦᑕᖅᓯᒪᔪᑎᒍᑦ ᖃᐅᔨᒪᓇᖅᓯᓯᒪᕗᖅ ᒪᕐᕉᖕᓂᒃ ᐅᖃᐅᓰᖕᓂᒃ ᐊᑐᕈᓐᓇᑦᑎᐊᖅᑐᑦ ᐅᔾᔨᕐᓇᖃᑦᑕᕐᒪᑕ ᐊᓯᐊᓂᒃ ᐅᖃᐅᓯᕐᒥᒃ ᐊᑐᓕᕌᖓᒥᒃ ᖃᓄᐃᓕᐅᕈᓯᕐᒥᒃ (ᐃᓛᒃ ᐃᓕᖅᑯᓯᕐᒥᓂᒃ) ᐊᓯᔾᔨᖅᓯᓲᖑᓄᑦ. ᑕᕝᕘᓇ ᓇᓗᓇᐃᖅᑕᐅᓯᒪᕗᖅ ᑖᒃᑯᐊᒃ ᐊᒃᑐᐊᖃᑦᑕᐅᑎᓂᖃᖅᐴᒃ.
ᑯᑉᓗᒧᑦ, ᐅᖃᐅᓯᕐᓗ ᐃᓕᖅᑯᓯᕐᓗ ᖃᑎᙵᓂᑯᒧᑦ ᓂᒥᖃᑦᑕᐅᑎᓯᒪᖅᑰᔨᕘᒃ ᑭᓇᐅᖅᑰᔨᓂᕆᔭᒥᓂᒃ ᐃᖕᒥᓄᑦ ᐊᓯᒥᓄᓪᓗ. ᐃᓐᓇᕐᓄᓪᓕ ᐃᓚᖓᒍᑦ ᑕᐅᑐᒃᑕᐅᖕᒪᑦ ᓄᑕᕋᑯᓗᒃᑎᑐᑦ ᖃᓪᓗᓈᑦ ᐊᔪᙳᓐᓂᕆᔭᖏᑕ ᐃᓚᖓᓂᒃ ᐱᓯᒪᑦᑎᒐᓗᐊᖅᖢᓂ ᑭᓯᐊᓂ ᐃᓐᓇᕐᓄᑦ ᓵᓪᓗᓂᐅᔭᕆᐊᖃᖃᑦᑕᖅᑐᖅ ᐃᓄᒃᓯᐅᑎᓪᓚᕆᖕᓂᒃ ᑐᑭᓯᔪᒪᔭᖃᓕᕌᖓᒥ.
ᐃᖅᑲᓇᐃᔭᖃᑎᒥᓪᓕ ᓄᓇᕗᑦ ᓯᓚᑦᑐᖅᓴᕐᕕᐊᓂ ᐃᓱᒪᒋᔭᐅᖁᓇᕋᓗᐊᖅᐳᖅ ᓇᓕᒧᒋᔭᐅᑐᐃᓐᓇᕐᕆᐊᒃᓴᖅ ᐃᖅᑲᓇᐃᔮᕐᒥᒍᑦ ᐊᔪᙳᓐᓂᕆᔭᖏᑦ ᐅᖓᖅᑰᔾᔨᓯᒪᓪᓗᑎᒃ ᐃᓕᓴᐃᔨᐅᓂᕐᒥᒃ ᑐᓵᔨᒃᓴᓄᑦ/ᑐᑭᓕᐅᕆᔨᒃᓴᓄᑦ. ᐃᓕᓐᓂᐊᖅᑎᑕᒥᓄᓪᓕ ᐊᔾᔪᒥᒋᔭᕆᔭᐅᕙᒃᐳᖅ ᐃᓕᖅᑯᓰᖕᓂᒃ ᒪᕐᕉᖕᓂᒃ ᐊᑐᖅᑎᑦᑎᕙᒃᖢᓂ. ᐃᖕᒥᓄᓪᓕ... ᖃᐅᔨᒪᒐᒥ ᐃᓐᓇᕆᔭᒥᑐᑦ ᐃᓄᓪᓚᕆᐅᑎᒋᔪᓐᓇᙳᑦᑕᕆᐊᒃᓴᖅ, ᑭᓯᐊᓂᓕ ᖃᓄᐃᒃᓴᙳᑦᑐᖅ ᑕᐃᒪᐃᙳᒃᑲᓗᐊᕈᓂ. ᖃᐅᔨᒪᓪᓗᓂᓗ ᖃᓪᓗᓈᙳᓚᐅᖅᓯᒪᔾᔮᙳᓐᓂᕐᒥᓂᒃ.
ᐃᓄᐃᑦ ᐅᖃᐅᓯᖓᑦ ᐊᓯᔾᔨᖅᐹᓪᓕᖅᓯᒪᕗᖅ ᑖᒃᑯᓇᓂ ᐊᕐᕌᖑᓂ ᕼᐊᓐᓇᓚᐅᓕᖅᑐᓂ, ᑭᓯᐊᓂᓗ ᐃᓚᖓᒍᑦ ᓱᕐᕋᒃᓯᒪᓗᐊᕌᓗᙳᒃᑭᓪᓗᓂ. ᓱᕐᕋᒃᓯᒪᓗᐊᙳᑦᑐᖅ ᐊᑐᖅᑕᐅᑦᑎᐊᖅᐸᒃᖢᓂ. ᑯᑉᓗ ᐅᖃᖃᑎᖃᒡᒐᓗᐊᕌᓗᒃᐸᙳᑦᑐᖅ ᐊᑯᑭᑦᑐᕐᒥᐅᓂᒃ. ᐊᓚᔅᑳᒧᓪᓗ ᑲᑕᐃᔭᐅᓇᔭᕈᓂ ᐅᖓᓯᖕᓂᖅᓴᐅᒐᓗᐊᖅᑎᓪᓗᒍ ᐅᖃᐅᓯᖓᑦ ᓱᖏᐅᑎᔾᔫᒥᒍᓂᐅᒃ ᐅᖃᖃᑎᒋᔪᓐᓇᖅᓯᓇᔭᕐᒥᔭᖏᑦ.
ᐃᓄᐃᓪᓕ ᐃᓕᖅᑯᓯᖓᑦᑕ ᐊᓯᔾᔨᖅᐹᓪᓕᖅᓯᒪᓂᖓ ᓴᖅᑭᔮᕐᓂᖅᓴᐅᕗᖅ ᐅᖃᐅᓯᖓᑦᑕ ᐊᓯᔾᔨᖅᐹᓪᓕᖅᓯᒪᓂᐅᖓᓂᑦ. ᑕᒪᓐᓇᓕ ᐊᓯᔾᔨᖅᐹᓪᓕᖅᓯᒪᓂᖅ ᖄᖏᓐᓇᑯᐊᒎᖓᕗᖅ. ᑯᑉᓗ ᐊᖓᔪᖅᑳᕆᓚᐅᖅᑕᒥ ᐃᓅᓯᕆᓚᐅᖅᑖᓂᒃ ᐊᑐᙳᓚᖅ, ᑭᓯᐊᓂᓕ ᐃᓅᓯᕐᒥᒍᑦ, ᐱᒻᒪᕆᐅᔪᖁᑎᒋᔭᒥᒍᓪᓗ, ᐊᕙᑎᒋᔭᕐᒥᓂᒡᓗ ᐅᐱᒋᔭᕋᕐᓂᕆᔭᕐᒥᒍᑦ ᐊᖓᔪᖅᑳᖕᓂ ᖃᓂᒋᓂᖅᓴᕆᕙᐃᑦ ᐃᓕᓴᐃᔨᐅᖃᑎᒋᔭᒥᓂᐅᖓᓂᑦ ᖃᓪᓗᓈᐅᖓᖑᔪᓂᑦ.
ᐃᓄᐃᑦ ᐅᖃᐅᓯᖓᑦᑕ ᐋᖅᑭᐅᒪᓂᖓ
ᖃᓪᓗᓈᑎᑐᑦ ᐅᖃᐅᓯᓪᓗ ᖃᓪᓗᓈᑎᑑᖓᐸᓗᒃᑐᑎᑐᑦ ᐅᖃᖅᑕᐅᔪᑦ ᓴᐸᖓᓕᕆᔪᑎᑐᑦ ᐋᖅᑭᐅᒪᓂᖃᖅᐳᑦ ᑭᖑᓕᕇᒃᓱᖅᓯᒪᑎᑦᑎᐊᖅᖢᑎᒃ. ᓲᕐᓗ ᓴᐸᖓᑯᓗᒃ ᐃᓛᒃᑯᑦ ᐅᖃᐅᓯᓪᓗᓂ ᑖᒃᑯᐊᓗ ᓄᕕᐅᕋᖅᑕᐅᓪᓗᑎᒃ ᑐᑭᖃᖅᑐᒥᒃ ᐅᖃᕆᐊᕌᖓᒥᒃ.
Je suis content d’être ici.
Yo estoy contento de estar aquí.
I am happy to be here.
ᐊᐃ ᐋᒻ ᕼᐋᐱ ᑐ ᐲ ᕼᐃᐅ.
ᐅᕙᖓ ᖁᕕᐊᓱᒃ ᐃᓐᓇᒪ ᒫᓂ.
ᑭᓯᐊᓂᓕ ᐃᓄᐃᑦ ᐅᖃᐅᓯᖓᑦᑕ ᐋᖅᑭᐅᒪᓂᖓ ᓲᕐᓗ ᓄᑕᖅᑲᑦ ᓴᓇᔭᒃᓴᖁᑎᒋᑎᑑᖓᔪᑦ Lego™ ᓂᕋᖅᑕᐅᔪᑎᑦ ᑖᒃᑯᐊ ᐃᖕᒥᓄᑦ ᐃᕕᖅᑕᒃᓴᐅᑦᑎᐊᖅᖢᑎᒃ ᑐᑭᓯᓇᖅᓯᑎᓯᒪᔪᒥᒃ ᐊᖅᑭᓯᒋᐊᕌᖓᒥᒃ. ᖁᕕᐊᓱᒃᑐᖓ ᑕᒫᓕᓐᓇᒪ.
ᐅᓇᓕᑭᐊᖅ: ᐃᖃᓗᖕᒥᐅᑕᐅᓂᕋᖅᐸᓕᕐᓂᑰᓇᔭᕋᓱᒋᓚᐅᖅᓯᒪᙳᖦᖤᕋᓗᐊᖅᐳᖓ. ᐊᑕᐅᓯᐊᓘᒐᓗᐊᕋᒥ ᑐᑭᖃᓕᖅᑎᓯᒪᑦᑎᐊᕆᓪᓗᓂ.
ᑖᒃᑯᐊ ᐃᓄᒃᑎᑐᑦ ᐅᖃᖅᓯᒪᔪᑦ ᑐᑭᓯᓇᓯᑎᑕᒃᓴᐅᔪᓐᓇᖅᑐᑦ ᐅᖃᐅᓯᓕᕆᓂᒃᑯᑦ ᕿᒥᕐᕈᓪᓗᒋᑦ ᐋᖅᑭᐅᒪᒥᖃᖅᑐᑦ ᖃᓪᓗᓈᑦ ᐅᖃᐅᓯᖓᓐᓂᒃ ᐋᖅᑭᐅᒪᑦᑎᐊᖅᓯᒪᓂᖃᕐᓂᖅᓴᒻᒪᕆᐅᔪᒥᒃ. ᐅᔾᔨᕈᓱᖃᑦᑕᖅᑐᒍᑦ ᐃᓄᐃᑦ ᐃᓕᓐᓂᐊᖅᑐᑦ ᐊᓕᐊᓇᐃᒋᔭᖃᖃᑦᑕᖅᑐᑦ ᐅᖃᐅᓯᕐᒥ ᐋᖅᑭᐅᒪᓂᖓᓂᒃ ᐃᓕᓐᓂᐊᕆᐊᒃᓴᖅ. ᖁᕕᐊᒋᔭᖃᓲᖑᖕᒪᑕ ᕿᒥᕐᕈᔭᕆᐊᒃᓴᖅ ᐅᖃᐅᓯᕐᒥᖕᓂᒃ ᐋᖅᑭᓯᓇᓂᖃᑦᑎᐊᖅᑐᖅᓯᐊᕆᐊᒃᓴᖅ ᓯᕗᓂᐊᒍᑦ ᐃᓱᒪᒋᓪᓚᕆᖕᓇᒍ ᐅᖃᓪᓚᖃᑦᑕᑐᐃᓐᓇᓚᐅᖅᑕᕋᓗᐊᕐᒥᖕᓂᒃ. ᐅᖃᐅᓯᐅᑉ ᐋᖅᑭᐅᒪᓂᖓ ᐅᖃᖅᑕᐅᔪᒥᒃ ᓇᓚᐅᑦᑖᖅᑕᐃᓯᒪᓪᓚᑦᑖᑐᐃᓐᓇᙳᓚᖅ ᑭᓯᐊᓂᓕ ᐃᓚᖓᒍᑦ ᐱᔭᕆᑐᓂᖃᖅᐸᒃᐳᖅ.
ᐃᓄᐃᑦ ᐅᖃᐅᓯᖓᑦᑎᒍᑦ ᖃᓄᐃᓐᓂᕋᕐᓂᖅ ᓇᓗᓇᐃᖅᓯᓯᒪᑦᑎᐊᖃᑦᑕᖅᐳᖅ ᑭᓇ ᖃᓄᐃᓕᐅᕆᖕᒪᖕᒑᑦ, ᖃᔅᓯᐅᖕᒪᖕᒑᑕ ᖃᓄᐃᓕᐅᕆᔪᑦ ᑭᓇᒧᓪᓘᓐᓕᑦ ᑭᓱᒧᓪᓘᓐᓕᑦ ᖃᓄᐃᓕᐅᕆᖕᒪᖕᒑᑦ ᐊᒻᒪᓗ ᑖᒃᑯᐊ ᐅᖃᐅᓯᐅᑉ ᐅᐃᒍᐊ ᐊᑐᖅᑕᐅᔪᖅ ᐊᓯᔾᔨᖅᐸᒃᖢᓂ ᐃᓚᓕᐅᑎᔭᒧᑦ ᐃᕕᖅᑎᑎᑦᑐᓇᑦᑎᐊᖁᓪᓗᒍ. ᐅᓇ ᐆᒃᑑᑎᒋᓪᓗᒍ “ᒪᓕᒃ.”
ᒪᓕᒃᑐᖓ ᑖᔅᓱᒪᓂ ᓇᓗᓇᐃᖅᓯᓯᒪᔪᖅ ᑭᓇ ᒪᓕᖕᒪᖕᒑᑦ ᖃᓄᐃᓕᕆᔪᕐᓗ ᐃᓄᑑᓂᖓᓂᒃ
ᒪᓕᒃᑲᔅᓯᒃ ᑖᔅᓱᒪᓂ ᓇᓗᓇᐃᖅᓯᓯᒪᔪᖅ ᑭᓇ ᒪᓕᖕᒪᖕᒑᑦ ᐃᓄᑑᓂᖓᓂᒡᓗ ᑭᓇᓗ ᒪᓕᒃᑕᐅᖕᒪᖕᒑ ᒪᓕᒃᑕᐅᔫᒡᓗ ᖃᔅᓯᐅᖕᒪᖕᒑᑎᒃ.
ᑖᓐᓇᑦᑕᐃᓐᓇᖅ ᑐᑭᖃᕈᓐᓇᕆᕗᖅ ᒪᓕᒃᑑᒃ ᖃᔅᓯᐅᓂᖏᓐᓂᒃ ᐅᖃᓪᓚᒡᕕᐅᓂᖏᓐᓂᒡᓗ. ᑖᒃᑯᖕᓇᓂ ᐅᖃᖅᑕᐅᔫᑉ ᐃᓚᖓ ᑭᓯᐊᓂ ᑐᓴᓚᐅᕐᓗᑎᒍᑦ ᖃᐅᓇᖅᓯᓇᔭᖅᑐᖅ ᓇᓕᐊᒃ ᐊᑐᖅᑕᐅᒐᓗᐊᕐᒪᖕᒑᑦ.
ᒪᓕᒃᑭᑦ ᑖᔅᓱᒪᓂᓕ ᓇᓗᓇᐃᖅᓯᓯᒪᕗᖅ ᑎᓕᓯᓯᒪᓂᕐᒥᒃ ᑭᓇᓗ ᑎᓕᔭᐅᖕᒪᖕᒑᑦ ᑎᓕᔭᐅᔪᕐᓗ ᐃᓄᑑᓂᖓᓂᒃ ᒪᓕᒋᐊᖃᖅᑕᖏᓪᓗ ᐊᒥᓲᓂᖏᓐᓂᒃ.
ᒪᓕᒃᑯᑦᑎᒃᑯᒃ ᑖᔅᓱᒪᓂ ᓇᓗᓇᐃᖅᓯᓯᒪᕗᖅ ᒪᓕᒃᑐᓪᓗ ᒪᓕᒃᑕᐅᓂᐊᖅᑐᓪᓗ ᐊᒥᓲᓂᖏᓐᓂᒃ. ᐃᓱᒪᒋᔭᕆᐊᖃᖅᑕᕗᑦ ᐊᒥᓲᓂᕋᐃᓂᖅ ᐊᑐᓕᖃᑦᑕᕋᑦᑎᒍᑦ ᒪᕐᕈᐃᓐᓇᐅᔪᓐᓕᑐᐊᕌᖓᑕ.
ᒪᓕᖕᒪᖕᒑᒃᑯᑦ ᑖᔅᓱᒪᓂ ᓇᓗᓇᐃᖅᓯᓯᒪᔪᖅ ᑭᓇ ᒪᓕᖕᒪᖕᒑᑦ ᑭᓇᓗ ᒪᓕᒃᑕᐅᖕᒪᖕᒑᑦ ᑖᓐᓇᓗ ᐅᖃᓪᓚᒃᑐᖅ ᓇᓗᓇᐃᖅᓯᒋᓪᓗᓂ ᓇᓗᓕᐅᖅᑲᓂᕐᒥᓂᒃ.
ᐃᒪᓱᒋᓪᓕᒍᓕ ᐅᓇ ᐅᖃᐅᓯᒃᑯᑦ ᐊᔪᕐᓇᙳᓐᓇᖅᓴᐅᕗᖅ “ᐅᐃ”, ᐅᕙᓂ ᐅᖃᐅᓯᕐᒥ “ᐅᐃᕕᓂᖅ” ᓇᓗᓇᐃᖅᓯᓯᒪᕗᖅ ᑖᓐᓇ ᐅᖃᐅᓯᐅᔪᖅ ᐅᐃᒋᔭᐅᔪᓐᓕᕐᓂᖓᓂᒃ. (ᒥᑭ ᑐᑭᓯᕚᓪᓕᒃᑲᓐᓂᕋᓱᒃᖢᓂ ᐃᓕᓴᐃᖃᑎᒋᔭᒥᓄᑦ ᐊᐱᕆᓚᐅᖅᓯᒪᖕᒪᑦ, “ᑖᓐᓇ ᐊᖑᑦ ᑐᖁᖓᓕᕆᐊᖃᖅᐸ ᐅᐃᕕᓂᐅᓂᕋᖅᑕᐅᓂᐊᕈᓂ?” ᑖᓐᓇ ᑭᐅᔪᖅ ᐃᓱᒪᒃᓴᖅᓯᐅᕌᕐᔪᓚᐅᖅᖢᓂ ᑭᐅᖦᖤᖅᐳᖅ, “ᐱᑦᑎᐊᙳᓐᓂᑰᒍᓂᖃᐃ ᐄ.”)
ᑖᔅᓱᒪᓂᓕ “ᐅᐃᒃᓴᖅ” ᓇᓗᓇᐃᖅᓯᓯᒪᕗᖅ ᑖᓐᓇ ᓱᓕ ᐅᐃᒋᔭᐅᓕᙳᑦᑐᖅ, ᐅᖃᐅᓯ ᒪᓕᒃᖢᒍ ᑐᑭᓯᓇᓯᓯᒪᕗᖅ “ᐅᐃᒃᓴᕕᓂᖅ” ᐅᐃᑖᕆᔭᐅᙳᓐᓂᑰᓂᖓᓂᒃ. ᐊᒡᓛᑦ, ᑖᓐᓇ ᐃᓄᐃᑦ ᐅᖃᐅᓯᖓᑦ ᐅᖃᐅᑕᐅᔪᓐᓇᖅᐳᖅ ᐅᖃᐅᓯᖃᕐᓂᐊᕐᓗᓂ ᓇᓗᓇᐃᖅᓯᓯᒪᑦᑎᐊᕈᓐᓇᕐᓂᖅᓴᐅᓂᖓᓂᒃ ᕿᒥᕐᕈᑎᑦᑎᑦᑎᐊᖅᓯᒪᓂᖅᑕᓴᐅᓂᖓᓂᒃ ᐅᖃᐅᓯᕆᔭᐅᔪᒥᒃ ᖃᓪᓗᓈᑦ ᐅᖃᐅᓯᖓᓐᓂᐅᖓᓂᑦ, ᖃᓪᓗᓈᑎᑑᖓᓂᒃ ᑎᑎᕋᖅᓯᒪᔪᖃᐅᖅᑐᓪᓚᒻᒪᕆᐊᓘᒐᓗᐊᖅᑎᓪᓗᒍ. ᑖᓐᓇ ᐅᖃᐅᓯᓕᕆᔨ ᑯᐃᐸᒃᒥᐅᑕᖅ ᓗᐃ ᔮᒃ ᑐᕇ ᕿᒥᕐᕈᓪᓗᓂ ᐅᖃᐅᓯᖅ ᐊᑐᖅᑕᐅᔪᓂᒃ ᐃᓄᖕᓄᑦ ᓄᓇᕕᖕᒥᐅᓄᑦ ᐱᒋᔭᐅᖏᓐᓇᙳᑦᑐᑦ ᑕᐃᒎᓯᖅᑕᕆᔭᖏᓐᓂᒃ, ᖃᐅᔨᓕᓚᐅᖅᐳᖅ ᑖᒃᑯᐊ 6ᐳᓴᑐᐃᓐᓇᖏᑦ ᐅᕝᕙᓘᓐᓕᑦ ᕼᐊᓐᓇᓚᒃᐅᐸᑕ 6ᖏᓐᓇᐃᑦ ᖃᓪᓗᓈᑦ ᐅᖃᐅᓯᖓᓐᓂᖕᒑᖓᕗᑦ. ᑖᒃᑯᐊᓕ 76ᐳᓴᑦ ᐅᕝᕙᓘᓐᓕᑦ ᕼᐊᓐᓇᓚᐅᒃᐸᑕ 76ᖏᑦ ᑕᐃᒎᓯᖅᑕᓕᐅᖅᑕᐅᓯᒪᕗᑦ ᑖᔅᓱᒪ ᑕᐅᑦᑕᐊ ᐊᑑᑖᓘᓐᓕᑦ ᐊᑐᖅᖢᒍ, ᑖᒃᑯᐊᓕ 12ᐳᓴᖏᑦ ᐅᖃᐅᓯᑐᖃᖅ ᐊᑐᖅᑕᐅᖃᑦᑕᖅᐸᒌᖅᑐᖅ ᑖᔅᓱᒧᖓ ᑕᑯᔭᐅᓕᑕᐃᓐᓇᖅᑐᒧᑦ ᐊᑐᖅᑕᐅᓕᖕᒑᖅᖢᓂ. ᑖᒃᑯᓇᓂ ᑕᐅᑦᑐᐊᓄᓪᓗ ᐊᑑᑖᓄᓪᓗ ᑕᐃᒎᓯᖅᑕᓕᐅᖅᑕᐅᔪᑦ ᓇᑉᐸᓪᓗᐊᕇᓚᐅᖅᐴᒃ — ᐃᓱᒪᒃᓴᖅᓯᐅᕆᔾᔪᑕᐅᑦᑎᐊᖅᐸᖕᓂᖏᓐᓂᒃ ᑕᐃᒎᓯᖅᑕᖅᑖᕆᑎᑕᑦ ᓇᓗᓇᕈᓐᓃᖅᓯᒪᕗᖅ. ᐅᑯᐊᒃ ᐆᒃᑑᑎᒋᓪᓗᒋᒃ “ᖃᕋᓴᐅᔭᖅ,” ᑖᓐᓇᒎᖅ ᐅᖃᐅᓯᐅᔪᖅ ᖃᕋᓴᖅᑎᑑᖓᕗᖅ ᖃᕋᓴᒻᒪᕇᖓᓂ, ᐅᓇᓕ “ᖁᓕᒥᒎᓕᒃ” ᑕᐅᑐᖅᑰᓕᖅᑎᑦᑎᓐᓇᖅᐳᖅ ᑖᓐᓇ ᐅᖃᐅᓯᐅᔪᖅ ᖁᓕᒥᒍᑦ ᐃᖏᕐᕋᔪᖁᑎᖃᕐᓂᖓᓂᒃ.
ᐊᔾᔨᒌᓕᖅᑎᑦᑎᓂᖅ
ᐃᓄᐃᑦ ᐅᖃᐅᓯᖓᑦ ᑲᔪᓰᓐᓇᕈᓐᓇᖅᑎᑕᐅᓂᖃᖅᓯᒪᕗᖅ ᑐᓴᐅᒪᑎᑦᑎᕙᖕᓂᒃᑯᐃᓐᓴᖅ ᐅᖃᐅᔾᔨᕙᒃᖢᑎᒃ ᑭᓯᐊᓂᓕ ᑎᑎᕋᖅᐸᒍᓯᖓᑦ ᓄᑖᐸᓘᕗᖅ ᓱᓕ.
ᐅᖃᐅᓯᖃᖃᑎᒌᒃᑐᑦ ᑲᑎᖅᓱᙳᐊᕋᔭᕈᑦᑎᒍᑦ 7ᐸᓘᓂᕋᕈᓐᓇᖅᐸᕗᑦ ᓄᓇᕗᒻᒥ ᑭᓯᐊᓂ ᐅᖃᐅᓯᕐᒥᒃ ᐊᑕᐅᓯᕐᒥᒃ ᐊᑐᕋᒥᒃ ᑐᑭᓯᐊᖃᑦᑕᐅᑎᔪᓐᓇᖅᐸᒃᐳᑦ. ᐅᐊᓕᓂᕐᒥ ᕿᑎᕐᒥᐅᓂ ᐅᖃᐅᓯᖅᑎᒃ “ᐃᓄᐃᓐᓇᖅᑐᓐ”ᖑᓂᕋᖅᐸᐃᖅ ᐃᓅᔨᖓᔪᑎᑐᑦ/ᖃᓪᓗᓈᑦ ᑎᑎᖅᑲᖁᑎᖏᓐᓂᒃ ᐊᑐᖅᖢᑎᒃ ᑎᑎᕋᖅᐸᒃᐳᑦ. ᓄᓇᕗᑦ ᓯᓚᑖᓂ ᐃᓄᐃᑦ ᑕᐃᒫᒃ ᑎᑎᕋᖅᐸᒃᑭᕗᑦ ᓛᐸᑐᐊᕆᒥ, ᐅᐊᓕᓂᕐᒥᐅᓂ, ᐊᓛᔅᑲᒥ ᐊᑯᑭᑦᑐᕐᒥᐅᓂᓗ. ᐊᑯᑭᑦᑐᕐᒥᐅᑦ 200 ᐊᕐᕌᒍᑦ ᐅᖓᑖᓄᑦ ᐅᖃᐅᓯᕐᒥᖕᓂᒃ ᑎᑎᕋᖅᐸᒃᓯᒪᓂᑰᓕᖅᐳᑦ.
ᓄᓇᕗᒻᒥᐅᓪᓕ ᐃᓚᖓᓐᓂ ᑎᑎᕋᐅᓯᕐᒥᒃ ᖃᓂᐅᔮᖅᐸᐃᓚᔭᐅᖃᑦᑕᖅᑐᒥᒃ ᐊᑐᖅᖢᑎᒃ ᑎᑎᕋᖅᐸᒃᐳᑦ. ᑖᓐᓇ ᑎᑎᕋᐅᓯᖅ ᐊᑐᖅᑕᐅᒋᐊᙵᓚᐅᖅᓯᒪᕗᖅ ᐊᔪᕆᖅᓱᐃᔨᔪᖅ ᔭᐃᒥᓯ ᐃᐊᕙᓐᔅᒧᑦ ᐊᓪᓚᓄᑦ/ᐅᓇᓕᕐᓄᑦ ᑯᕇᖑᓂᕋᖅᑕᐅᔪᓄᑦ ᑎᑎᕋᐅᓯᖁᑎᓕᐊᖑᓪᓗᓂ. ᐊᕐᕌᒍᑦ ᕼᐊᓐᓇᓚᖏᓐᓂᐅᓕᖅᐳᖅ ᑖᓐᓇ ᑎᑎᕋᐅᓯᓕᐊᖑᓂᑯ ᐃᓄᖕᓄᑦ ᐊᑐᖅᑕᐅᔪᓐᓇᖅᓯᑎᑕᐅᓚᐅᖅᑎᓪᓗᒍ ᑖᒃᑯᖕᓄᖓ ᐊᔪᕆᖅᓱᐃᔩᖕᓄᒃ ᔮᓐ ᕼᐅᐊᑕᓐ ᐊᒻᒪᓗ ᐃ.ᐊ. ᕗᐊᑦᑭᓐᔅᒧᓪᓗ. (ᐃᐊᑦᒪᓐ ᐱᐊᒃ) ᐅᖃᒻᒪᐅᓪᓕ ᑕᒪᐅᙵᐅᑎᓂᑯᒋᓯᒪᕚ. ᐃᓄᒻᒪᕆᓕᕆᔨᒃᑯᑦ 1970ᑦ ᐊᑐᖅᑎᓪᓗᒋᑦ ᐋᖅᑭᒃᓯᓕᓚᐅᖅᓯᒪᕗᑦ ᑎᑎᕋᐅᓰᖕᓂᒃ ᐊᑐᖅᑕᐅᖃᑦᑕᖅᑐᒃᓵᖕᓂᒃ ᑕᒪᐃᓐᓄᑦ, ᑖᒃᑯᐊᒡᓗ ᖃᓂᐅᔮᖅᐸᐃᑎᑐᑦ ᖃᓕᐅᔮᖅᐸᐃᑎᑐᓪᓗ ᑕᐃᔭᐅᖃᑦᑕᓕᓚᐅᖅᖢᑎᒃ. ᑕᐃᒪᙵᑦ ᐊᑐᖅᑕᐅᑎᑕᐅᓕᓚᐅᖅᑎᓪᓗᒋᒃ ᓈᒻᒪᑎᐊᖅᑐᒻᒪᕆᐊᓐᓅᙳᓐᓂᖓ ᓇᓗᓇᕈᓐᓕᖅᓯᒪᒐᓗᐊᖅᐳᖅ ᑭᓯᐊᓂᓗᑦᑕᐅᖅ ᓇᓗᓇᙳᒃᑭᕗᖅ ᐅᖃᖅᑕᕙᒃᑐᓄᑦ ᑎᑎᕋᕈᑎᒋᔭᐅᑦᑎᐊᒐᒃᓴᐅᓂᖏᓐᓂᒃ, ᐃᓕᑕᒃᓴᐅᓂᖏᓐᓂᒡᓗ, ᐊᒻᒪᓗ ᐋᖅᑭᐅᒪᓂᖏᒃ ᑐᑭᖃᖅᖢᑎᒃ. ᑲᓇᖕᓇᖅᖠᕐᒥ ᖃᓂᐅᔮᖅᐸᐃᑎᑐᑦ ᑎᑎᕋᖅᐸᓕᖅᐸᒋᕐᓂᑯᓂ ᐊᑐᖅᑕᐅᔭᕆᐊᒃᓴᖅ ᖃᓄᐃᒋᔭᐅᙳᒃᑲᓗᐊᖅᑎᓪᓗᒍ ᐅᐊᓕᓂᕐᒥᐅᓄᑦᒃ ᑐᙵᓱᒃᑎᑕᐅᓗᐊᖅᓯᒪᙳᓚᖅ ᑎᑎᕋᐅᓯᑐᖃᕆᓕᖅᓯᒪᔭᕐᒥᒃ ᐊᑐᕈᒥᒍᓱᖕᒑᖅᐸᒃᑲᒥᒃ ᖃᓪᓗᓈᑦ ᑎᑎᖅᑲᖁᑎᖏᓐᓂᒃ ᐊᑐᖅᖢᑎᒃ.
ᐅᖃᐅᓯᐅᑉ ᐊᔾᔨᒌᓕᖅᑎᖅᑕᐅᓂᖓᓗ ᑎᑎᕋᐅᓯᐅᑉ ᐊᔾᔨᒌᓕᖅᑎᖅᑕᐅᓂᖓᓗ ᑖᓐᓇᑦᑕᐃᓐᓇᐅᙳᓚᖅ. ᐅᖃᐅᓯᕐᒥᒃ ᐊᔾᔨᒌᓕᖅᑎᕆᓇᓱᖕᓂᖅ ᐊᑭᕋᖅᑐᖅᑕᐅᔭᓇᕐᓂᖅᓴᐅᕗᖅ. ᐃᓄᐃᑦ ᐅᖃᐅᓯᖓᓐᓂᒃ ᐱᒻᒪᕆᐅᒍᓲᑎᓖᑦ ᐅᖃᐅᓯᖅᑕᕆᔭᕐᒥᖕᓂᒃ ᐃᒃᐱᒋᔭᖃᕐᔪᐊᓲᖑᕗᑦ. (ᑖᓐᓇ ᐅᔾᔨᕐᓇᖅᑐᒻᒪᕆᐅᖃᑦᑕᖅᐳᖅ ᓯᓚᑦᑐᖅᓴᕐᕕᖕᒥ ᐃᓄᐃᑦ ᐅᖃᐅᓯᖓᓐᓂᒃ ᐃᓕᓐᓂᐊᖅᑎᓪᓗᒋᑦ, ᐃᓕᓐᓂᐊᖅᑎᑦ ᐃᓚᖏᑦ ᐸᓴᒍᓱᒃᓴᕋᐃᖃᑦᑕᕐᒪᑕ ᐊᑲᖅᓴᙳᓴᕋᐃᑉᐸᒃᖢᑎᒡᓗ ᐅᖃᐅᓯᖅᓴᖅᑎᒃ ᐊᓯᔾᔨᖅᑕᐅᓇᓱᒐᓱᒋᓕᕌᖓᒥᔾᔪᒃ.) ᐃᓄᒃᑎᑐᑦ ᐅᖃᓪᓚᒃᐸᒃᑐᓕᒫᕌᓗᐃᑦ ᐊᔾᔨᒌᒥᒃ ᐅᖃᓪᓚᖃᑦᑕᓕᖅᑎᓐᓇᓱᒡᓗᒋᐅᔭᕆᐊᖃᙳᑕᐃᓐᓄᒋᔭᕗᑦ. ᐊᔾᔨᒌᓕᖅᑎᕆᔭᕆᐊᖃᙳᓐᓂᕋᐃᓂᕐᒥᒃ ᐱᔾᔪᑎᒋᔭᕗᑦ ᐊᕐᕌᒍᒐᓴᖕᓂᒃ 30ᐸᓘᓕᖅᑐᓂᒃ ᐃᓄᐃᑦ ᐅᖃᐅᓯᕐᒥᖕᓂᒃ ᖃᐅᔨᒪᑦᑎᐊᖅᑐᑦ ᐅᖃᖃᑎᖃᒡᒐᖅᐸᙳᒻᒪᑕ ᑲᑎᖃᑎᖃᕌᖓᒥᒃ ᑲᑎᒪᓂᖅᑎᒍᓪᓘᓐᓕᑦ ᐅᕝᕙᓘᓐᓕᑦ ᖁᕕᐊᓱᓗᖕᓂᕐᒧᑦ ᖃᑎᖃᑎᖃᕈᑎᖃᕌᖓᒥᒃ. ᐅᖃᐅᓯᖅᑕᕆᔭᒥᖕᓂᒃ ᐊᓯᔾᔨᖅᓯᐊᕐᔪᒃᐸᒃᐳᑦ ᐊᔾᔨᒌᐸᓗᒃᑐᒥᒃ ᑲᑎᙵᔪᑦ ᐅᖃᓪᓚᒍᓯᖃᖁᓪᓗᒋᑦ. ᐊᔾᔨᒌᓕᖅᑎᑦᑎᐅᕋᐃᓂᖅ ᐅᕝᕙᓘᓐᓕᑦ ᐊᑕᐅᓯᕐᒥᒃ ᑕᐃᒎᓯᖅᑕᖃᖅᑎᑦᑎᔭᕆᐊᒃᓴᖅ ᐱᑕᖃᕐᓂᖅᓴᐅᔭᕆᐊᖃᖅᐸᒃᐳᖅ ᒪᑯᓂᖓ ᖃᓪᓗᓈᑎᑐᒻᒪᕆᐊᓗᒃ ᐅᖃᖅᓯᒪᔪᓄᑦ, ᑭᓯᐊᓂᓗ ᑕᒪᓐᓇ ᐃᒃᐱᒍᓱᒍᑎᒋᔭᐅᕐᔪᐊᙳᓐᓂᖅᓴᐅᕙᒃᐳᖅ.
ᐅᖃᐅᓯᓪᓕ ᐱᑕᖃᐃᓐᓇᕐᓂᒃᓴᖓ ᐱᒻᒪᕆᐊᓂᖅᓴᒻᒪᕆᐅᕗᖅ ᐊᔾᔨᒋᓕᖅᑎᑦᑎᖅᑲᖦᖤᕆᐊᒃᓴᒥᐅᖓᓂᑦ.
ᐃᓄᐃᑦ ᐅᖃᐅᓯᖓᑦᑕ ᐱᑕᖃᐃᓐᓇᕐᓂᒃᓴᖓ
ᑖᓐᓇ 1ᕼᐊᓐᓇᓚᒥᒃ ᐊᕐᕌᒍᓂᒃ ᐊᓂᒍᐃᓕᖅᑐᖅ ᐃᑲᔪᐊᓐᓄᑰᓗᒃᓯᓯᒪᙳᓚᖅ ᓄᓇᕐᔪᐊᕐᒥᐅᑦ ᖃᔅᓰᓐᓵᐅᓂᖅᓴᓄᑦ ᐅᖃᐅᓯᖃᖅᑐᖁᑎᒋᔭᖏᓐᓄᑦ, ᐱᓗᐊᖅᑐᒥᒃ ᒥᐊᓕᒐᐃᓪᓗ ᑲᓇᑕᒥᐅᑕᐃᓪᓗ ᓄᓇᖃᖅᑳᖅᑐᖁᑎᖏᑕ ᐅᖃᐅᓯᖁᑎᖏᓐᓄᑦ ᐊᒡᓛᑦ ᐃᓕᖅᑯᓯᖁᑎᖏᓐᓄᑦ. ᑕᐃᔅᓱᒪᓂᐊᕐᔫᓕᖅᐳᖅ ᐅᖃᖅᑐᖃᓚᐅᖅᑎᓪᓗᒍ ᑲᓇᑕᒥᒎᖅ ᑯᕇᑦ (ᐊᓪᓚ/ᐅᓇᓖᑦ) ᐃᓄᐃᓪᓗ ᐅᖃᐅᓯᖏᒃ ᐱᑕᖃᐃᓐᓇᖅᑐᑑᓂᐊᕋᓱᒋᔭᐅᓪᓗᑎᒃ ᐊᕐᕌᒍᓄᑦ ᕼᐊᓐᓇᓚᒃᑲᓐᓂᕐᓄᑦ. ᑕᒪᓐᓇ ᑕᐃᒫᒃ ᐃᓱᒪᒋᔭᖃᕐᕕᐅᓂᖅ ᐅᒃᐱᕆᔭᐅᑐᐃᓐᓇᕐᓗᓂᐅᓪᓗᐊᙳᓚᖅ.
31 ᐊᕐᕋᒍ ᓈᓛᐅᑎᒃᑯ ᐅᖃᕐᑎᐅᓂᑯ ᔫᓇ ᑭᓕ ᓄᖅᑲᓚᐅᕐᓯᒪᕗᖅ ᓰᐲᓰᑯ ᓈᓛᐅᑎᓕᕆᓂᖏᓐᓂ 1997ᒥ. ᐃᓄᒃᑎᑐᑦ ᐅᖃᐅᓯᖃᕐᑐᑦ ᓈᓛᐅᓯᕆᓂᖅ ᐊᑐᕐᓂᖃᖅᐳᖅ ᐃᓄᐃᑦ ᐅᖃᐅᓯᖓᓂ ᓴᖅᑭᔮᖅᑎᑦᑏᓐᓇᕐᓂᕐᒥ
ᐅᓪᓗᒥᐅᓕᖅᑐᖅ ᓄᑕᖅᑲᑦ ᖃᓰᓐᓇᑯᓗᐃᑦ ᓄᓇᕗᑦ ᐅᐊᓕᓂᐊᓂ ᐅᖃᕈᓐᓇᖅᐳᑦ ᐅᕝᕙᓘᓐᓕᑦ ᑐᑭᓯᐊᕗᑦ ᐅᖃᐅᓯᕐᖓᐅᑎᒋᓇᔭᖅᑕᕋᓗᐊᕐᒥᖕᓂᒃ ᐃᓄᐃᑦ ᐅᖃᐅᓯᖓᓐᓂᒃ. ᐃᓄᐃᑦ ᐅᖃᐅᓯᖓᑦ ᐱᑕᖃᐃᓐᓇᕐᓂᐊᖅᐸᑦ ᓄᑕᖅᑲᑦ ᐱᒻᒪᕆᕕᒡᔪᐊᕌᓘᕗᑦ. ᓄᓇᓕᖕᓄᐊᕈᕕᑦ ᓄᑕᖅᑲᑦ ᐱᙳᐊᖑᔭᖅᑎᓪᓗᒋᑦ ᓈᓚᒃᑭᑦ. ᓱᖁᑕᐅᓗᐊᑰᔨᙳᓐᓂᖅᓴᐅᕗᖅ ᐃᓐᓇᐃᑦ ᐃᓄᒃᑎᑐᑦ ᐅᖃᓪᓚᖃᑦᑕᐅᑎᔪᑦ ᓂᐅᕕᕐᕕᖕᒥᓯᐅᖅᑎᓪᓗᒋᑦ ᐅᕝᕙᓘᓐᓕᑦ ᐅᒡᓚᖃᑦᑕᐅᑎᓯᒪᓪᓗᑎᒃ ᐃᓄᒃᑎᑐᑦ ᐅᖃᓪᓗᕆᒃᓴᖃᑦᑕᐅᑎᒃᐸᑕ. ᓇᓕᐊᖕᓂᒡᓕ ᐊᑐᖅᖢᑎᒃ ᓄᑕᖅᑲᑦ ᐅᖃᓪᓚᑲᑕᒃᐸᑦ? ᐅᖃᐅᓯᐅᑉ ᐱᑕᖃᕈᓐᓕᖅᐸᓪᓕᐊᓕᕐᓂᖓᓂᒃ ᓴᖅᑮᔮᖅᑳᕋᔭᖅᐳᖅ ᓄᑕᖅᑲᑦ ᐱᙳᐊᑐᐃᓐᓇᖅᖢᑎᒃ ᖃᓪᓗᓇᐅᔭᖅᐸᒃᐸᑕ. ᐱᑕᖃᕈᓐᓕᖅᐸᓪᓕᐊᓂᐅᑉ ᓇᓗᓇᐃᖅᑕᐅᓯᒪᓂᖓᓂ ᑐᒡᓕᕆᔭᐅᕗᖅ ᐊᖓᔪᖅᑳᕆᔭᑦ ᐃᓄᒃᑎᑐᑦ ᐅᖃᓪᓚᒃᑎᓪᓗᒋᑦ ᓄᑕᖅᑲᒥᓄᑦ ᖃᓪᓗᓈᑐᑦ ᑭᐅᔭᐅᖃᑦᑕᓕᕈᑎᒃ. ᐱᖓᔪᒋᔭᖓᑦ ᐊᖏᕐᕋᒥ ᕿᑐᕐᖓᕇᑦ ᖃᓪᓗᓇᐅᔭᖃᑦᑕᐅᑎᓪᓗᑎᒃ ᓂᖏᐅᒃᑯᖏᑦ ᐃᑦᑐᒃᑯᖏᑦ ᐃᓄᒃᑎᑐᑦ ᐃᖕᒥᖕᓄᑦ ᐃᓄᒃᑎᑐᑦ ᐅᖃᓚᖃᑦᑕᖅᑐᑐᐊᖑᒃᐸᑕ.
ᐅᖃᐅᓯᓕᕆᔨ ᐅᖃᐅᓯᖁᑎᖃᖅᐳᑦ ᐅᖃᐅᓯᖅ ᐊᑐᖅᑕᐅᔪᓐᓕᖅᐸᓪᓕᐊᓕᖅᑐᖅ ᓴᖅᑭᑎᑕᐅᒃᑲᓐᓂᕋᓱᓕᖅᑎᓪᓗᒍ ᑕᐃᔭᐅᕙᒃᖢᓂ “ᐱᑕᖃᕈᓐᓕᓕᖅᑑᒐᓗᐊᖅ ᓴᖅᑭᑎᑕᐅᒃᑲᓐᓂᕋᓱᒃᑐᖅ.” ᓄᓇᓖᑦ ᐃᖃᓗᒃᑑᑦᑎᐊᕐᒥᓗ, ᖁᕐᓗᖅᑐᒥᓗ, ᐅᒥᖕᒪᒃᑑᕐᒥᓗ, ᕿᖓᐅᖕᒥᓗ ᐅᖃᐅᓯᕆᔭᒃᓴᐅᕗᑦ ᐱᑕᖃᕈᓐᓕᓕᖅᑐᒥᒃ ᓴᖅᑭᑎᑦᑎᒃᑲᓐᓂᕋᓱᖕᓂᕋᕐᓗᒋᑦ. ᑕᐅᕙᓂ ᐃᓕᓐᓂᐊᖅᑎᑦᑎᔨᑦ ᑐᐊᕕᐊᕆᔭᕆᐊᖃᖅᑰᔨᓪᓗᑎᒃ ᐱᓕᕆᓕᕐᒪᑕ ᐅᖃᐅᓯᖅᑎᒃ ᐱᑕᖃᐃᓐᓇᖅᑎᓐᓇᓱᒃᖢᓂᔾᔪᒃ ᓄᑕᖅᑲᓄᓪᓗ ᑐᓐᓂᖅᑯᑎᒋᓴᒃᖢᓂᔾᔪᒃ ᑭᖑᕙᓗᐊᓚᐅᙳᓐᓂᕐᒥᖕᓂᒃ.
ᑕᐃᒃᑯᐊ ᐃᓕᓐᓂᐊᖅᑎᑦᑎᔨᑦ ᑕᒪᑐᒥᖓ ᓈᒻᒪᑦᑎᐊᙳᓐᓂᐅᔪᒥᒃ ᐋᖅᑭᒃᓯᔪᓐᓇᖅᑰᖅᐸᑦ? ᐅᕝᕙᓘᓐᓕᑦ ᑎᒥᐅᔪᑦ ᓲᕐᓗ ᒐᕙᒪᐅᔪᑦ ᐅᕝᕙᓘᓐᓕᑦ ᐃᓕᓐᓂᐊᕐᕕᐅᔪᑦ ᒪᑭᒪᑎᑦᑎᔪᓐᓇᖅᑰᖅᐸᑦ ᐅᖃᐅᓯᕐᒥᒃ? ᐋᒃᑲᐅᖅᑰᖅᑐᖅ.
ᐊᖏᕐᕋᒥ ᐃᓄᒃᑎᑐᑦ ᐅᖃᓪᓚᖃᑦᑕᕈᒪᓂᖅ
ᐃᓄᐃᑦ ᐅᖃᐅᓯᖓᑦ ᐱᑕᖃᕈᓐᓃᕐᓂᐊᙳᑉᐸᑦ ᑖᓐᓇ ᐱᑕᖃᕆᐊᖃᒻᒪᕆᒃᑲᓗᐊᖅᐳᖅ ᐊᖏᕐᕋᒥ ᐱᑕᖃᐃᓐᓇᖁᔨᓂᖅ: ᐱᓗᐊᖅᑐᒥ ᐊᖓᔪᖅᑳᕆᔭᑦ ᐱᑕᖃᖁᔨᓂᕆᔭᖓᑦ. ᑎᒥᒋᔭᐅᔪᓄᑦ ᑕᒪᓐᓇ ᐊᑐᖅᑕᐅᔭᕆᐊᓖᖅᑐᕈᓐᓇᙳᑕᖓᑦ. ᐃᑲᔪᖅᑐᐃᑐᐃᓐᓇᕈᓐᓇᖅᐳᓪᓕ. ᑕᒪᓐᓇ ᐱᑕᖃᐃᓐᓇᖁᔨᓂᖅ ᐃᓄᖕᓂᖕᒑᖓᔭᕆᐊᖃᖅᐳᖅ. ᑕᒪᓐᓇ ᐱᑕᖃᐃᓐᓇᖁᔨᓂᖅ ᑐᙵᓂᖃᕐᓂᐊᖅᐳᖅ ᐅᖃᐅᓯᕐᒥᒃ ᐅᐱᒋᔭᖃᕐᓂᕐᒥᒃ ᐊᑐᖅᑐᑦᔪᒪᓂᕐᒥᒡᓗ.
ᒪᕐᕈᓪᓗᐊᑕᐅᕘᒃ ᐃᓄᐃᑦ ᐅᖃᐅᓯᖓᓐᓂᒃ ᓄᖑᓴᐃᔨᐅᓪᓗᑎᒃ. ᓯᕗᓪᓕᖅ, ᐊᖓᔪᖅᑳᕆᔭᑦ ᐅᔾᔨᕈᓱᓕᑕᐃᓐᓇᕋᓗᐊᕐᓗᑎᒃ ᐱᑕᖃᕈᓐᓃᖅᐸᓪᓕᐊᓂᖓᓂᒃ ᑭᖑᕙᓗᐊᓕᕇᕐᓗᑎᒃᓗ.
ᑐᒡᓕᐊᓕ ᐅᓇᐅᕗᖅ, ᖃᓪᓗᓈᑦ ᐅᖃᐅᓯᖓᑦᑕ ᓴᙳᔪᒻᒪᕆᐊᓘᓂᖓ. ᐅᖃᕐᓗᐊᖅᑕᕈᑕᐅᔪᓐᓇᕐᓂᖓᓅᙳᑦᑐᖅ ᑭᓯᐊᓂ ᐊᑐᖅᑕᐅᕙᖕᓂᖓᓄᑦ ᓯᓚᕐᔪᐊᕐᒥ ᐊᖓᔪᖅᑳᕐᔪᐊᒡᒍᑕᐅᔪᑦ ᐃᖕᒥᖕᓄᑦ ᐅᖃᖃᑎᒌᒍᒪᔭᕌᖓᒥᒃ. ᑖᓐᓇᓗ ᐅᖃᐅᓯᖅ ᐊᑐᖅᑕᕙᖕᓂᖓᓄᑦ ᐱᔫᒥᓵᕆᔾᔪᑕᓪᓗᓂ, ᓲᕐᓗ ᑕᓚᕖᓴᓂ ᑕᕐᕆᔭᒐᕐᓂᓗ. ᐊᖓᔪᖅᑳᖑᔪᑦ ᑖᔅᓱᒥᖓ ᐅᖃᐅᓯᕐᒥᒃ ᐊᑐᖅᑎᑦᑎᕙᒃᐳᑦ ᓄᑕᖅᑲᑎᒃ ᐃᓚᒋᔭᐅᖃᑕᐅᖁᓪᓗᓂᔾᔪᒃ ᑖᔅᓱᒥᖓ ᐅᖃᐅᓯᕐᒥᒃ ᓴᙳᓂᓕᐊᓗᖕᒥᒃ.
ᐃᓕᓐᓂᐊᕐᓂᓕᕆᓂᖅ
ᐃᓄᐃᑦ ᐊᒥᓱᐊᓗᐃᑦ ᐃᓱᒪᒋᔭᖃᕐᒪᑕ ᐃᓄᐃᑦ ᐅᖃᐅᓯᖓᑦ ᐱᒡᒍᒃᑎᑦᑎᕚᓪᓕᕈᑕᐅᔪᓐᓇᕆᐊᒃᓴᖓᓂᒃ ᓄᓇᕗᖃᓕᕈᑦᑕ. ᑕᐃᒪᓕ ᑎᒥᐅᔪᑦ ᖃᓄᐃᓕᒃᑲᓐᓂᕈᓐᓇᕋᔭᖅᑰᖅᐸᑦ ᐃᓄᐃᑦ ᐅᖃᐅᓯᖓᑦ ᐱᑕᖃᐃᓐᓇᖅᑎᓐᓂᐊᕋᓱᒡᓗᓂᔾᔪᒃ ᐱᕈᖅᐸᓪᓕᐊᑎᓐᓇᓱᖕᓂᐊᕐᓗᓂᔾᔪᒡᓗ?
ᐃᓕᓐᓂᐊᖅᑐᓕᕆᓂᖅ ᐃᓱᒪᒋᔭᐅᕐᖓᐅᑕᐅᔭᑉᐳᖅ. ᖃᐅᔨᓴᖅᐸᓪᓕᐊᓂᕐᓗ ᓴᖅᑭᑎᑦᑎᕙᓪᓕᐊᓕᕐᓂᕐᓗ ᐃᓄᒃᑎᑑᖓᔪᓂᒃ ᐃᓕᓐᓂᐊᕈᑎᑕᖃᖅᑎᓇᓱᒃᖢᑎᒃ ᐱᒋᐊᓕᓚᐅᖅᓯᒪᕗᖅ ᓄᓇᑦᑎᐊᑉ ᐃᓕᓐᓂᐊᖅᑐᓂᕆᓂᓕᕆᔨᒃᑯᒋᑦ ᐱᒋᐊᖅᑎᑕᐅᑎᓪᓗᒋᑦ 1970ᒥ ᑕᐃᒪᙵᓪᓗ ᑲᔪᓯᑎᑕᐅᓪᓗᓂ. ᐃᓄᒃᑎᑐᑦ ᐃᓕᓐᓂᐊᖅᑎᑦᑎᖃᑦᑕᖅᑐᒃᓴᓂᒃ ᐃᓕᓐᓂᐊᖅᑎᔨᒃᓴᓄᑦ ᐃᓕᓐᓂᐊᕐᕕᒃᑕᖃᖅᓯᒪᓕᖅᐳᖅ 1980ᑦ ᐱᒋᐊᓕᓵᖅᓯᒪᑎᓪᓗᒋᑦ.
ᐱᐅᓯᕚᓪᓕᕐᓂᖅᑕᖃᕈᓐᓇᖅᐳᖅ ᓱᓕ. ᐊᒃᑐᕉᑎᒋᔭᐅᔭᕆᐊᖃᖅᑑᓕᕐᒪᑦ ᐃᓅᒐᓗᐊᑦ ᐃᓄᒃᑐᑦ ᐅᖃᕈᓐᓇᐃᓪᓕᓂᑰᓯᒪᔪᑦ ᐅᖃᕆᐅᖅᓴᔾᔪᑎᒃᓴᖏᓐᓄᑦ ᐃᓕᓐᓂᐊᕈᑎᑕᖃᕆᐊᖃᕐᒪᑦ, ᑮᓇᐅᔭᖅᑕᖃᖅᑎᑕᐅᔭᕆᐊᓕᒃ ᐃᓄᒃᑎᑐᑦ ᐅᖃᕆᐅᖅᓴᔾᔪᑎᓄᑦ ᐃᓕᓐᓂᐊᖅᑕᔪᒃᓴᓂᒃ ᐋᖅᑭᒃᓱᖅᑕᐅᔪᖃᕈᓐᓇᖁᓪᓗᒍ ᐃᓕᓐᓂᐊᕈᑎᒃᓴᓕᐅᖅᑐᖃᕈᓐᓇᖁᓪᓗᒍᓗ. ᐅᐊᓕᓂᕐᒥᐅᑐᐊᖅ ᓵᖖᖓᑦᑎᔪᑑᙳᓕᕐᒪᑕ ᐅᖃᐅᓯᖅᑎᒃ ᔭᒐᐃᓇᔭᖅᑲᖦᖤᕆᐊᒃᓴᕐᒥᖕᓂᒃ ᐃᓕᓐᓂᐊᖅᑎᑦᔨᖁᑎᖏᑦ ᐃᑲᔪᖅᑕᐅᓂᖃᒻᒪᕆᒋᐊᖃᕐᒪᑕ ᖃᓄᖅ ᔭᒐᐃᑦᑕᐃᓕᑎᑦᑎᓂᐊᕐᓗᑎᒃ ᐱᓕᕆᔪᓐᓇᖃᑦᑕᕋᔭᕐᒪᖕᒑᑕ. ᒫᓂᑦᑕᐅᖅ ᑲᓇᖕᓇᖅᐸᓯᖕᒥ ᓲᕐᓗ ᐃᖃᓗᖕᓂ ᓄᑕᖅᑲᑦ ᐃᓄᒃᑎᑐᑦ ᐅᖃᐅᕆᐅᖅᓴᑎᑕᐅᕙᒡᓗᑎᒃ ᐃᓕᓐᓂᐊᖃᑦᑕᕆᐊᖃᕐᒥᔪᑦ. ᑕᒪᓐᓇ ᐅᖃᕆᐅᖅᓴᔭᕆᐊᖃᕐᓂᖅ ᐱᓪᓗᐊᑕᕐᓂᖅᓴᐅᖅᑰᔨᖕᒪᑦ ᐃᓕᖅᑯᓯᖃᖃᑎᒌᙳᑦᑑᖕᓂᒃ/ᐅᖃᐅᓯᖃᖃᑎᒌᙳᑦᑑᖕᓂᒃ ᐊᖓᔪᖅᑳᓕᖕᓂ. ᐃᓐᓇᐅᓂᖅᓴᓄᓪᓕ ᐃᓕᓐᓂᐊᕐᕕᒋᔭᐅᔪᓄᑦ ᐱᑕᖃᕆᐊᖃᖅᑰᔨᖕᒪᑦ ᐃᓄᒃᑎᑐᑦ ᐅᖃᐅᓯᕐᖓᐅᑎᓖᑦ ᐅᖃᕈᓐᓇᕋᓗᐊᖅᖢᑎᒃ ᑎᑎᕋᕆᐅᖅᓴᑎᑕᐅᖃᑦᑕᕆᐊᖃᕐᒪᑕ ᐊᒻᒪᓗ ᐊᓯᖏᑦ ᐃᓄᒃᑎᑐᑦ ᐅᖃᕆᐅᖅᓴᑎᑕᐅᕙᒋᐊᖃᖅᖢᑎᒃ.
ᒐᕙᒪᒃᑯᑦ
ᐃᓄᐃᑦ ᐅᖃᐅᓯᖓᑦ ᓄᓇᕗᒻᒥ ᐃᓚᒋᔭᐅᓂᐊᖅᐳᖅ ᐅᖃᐅᓯᓪᓗᐊᑕᕆᔭᐅᓂᐊᕐᓗᓂ (ᖃᓪᓗᓈᑎᑐᓪᓗ ᐅᐃᕖᑎᑐᓪᓗ ᐅᖃᐅᓯᓪᓗᐊᑕᐅᖃᑕᐅᓂᐊᕐᒥᔫᒃ). ᐅᔾᔨᕆᔭᐅᓂᖅᓴᐅᓪᓗᐊᖅᐳᕐᓕ ᐃᓄᐃᑦ ᐅᖃᐅᓯᖓᑦ ᓄᓇᕗᒃᑯᑦ ᒐᕙᒪᒃᑯᖏᑦᑕ ᐅᖃᐅᓯᓪᓗᐊᑕᕆᓂᐊᕐᒪᔾᔪᒃ. ᑕᒪᒃᑯᓄᖓ ᐅᒃᐱᕈᓲᑎᖃᖅᑐᓄᑦ ᐅᖃᐅᓯᐅᑉ ᐱᒻᒪᕆᐅᓂᖓᓂᒃ ᑐᓴᖅᖢᒍ ᑕᒪᓐᓇ ᐸᑦᑕᒃᑐᕈᔾᔨᔪᒥᓇᖅᐳᖅ. ᑭᓯᐊᓂᓗ ᐊᒡᕕᐊᖅᑯᑎᑕᖃᐅᖃᑦᑕᕐᓂᐊᖅᐳᖅ ᐊᑐᓕᖅᑎᑕᐅᓇᓱᒃᑎᓪᓗᒍ.
ᐅᐊᓕᓂᕐᒥ ᐅᓄᖅᑐᑦ ᒪᒃᑯᒃᑐᑦ ᐃᖢᐊᕆᔭᖃᕐᓂᖅᓴᐅᖕᒪᑕ ᖃᓪᓗᓇᐅᔭᖃᑦᑕᕆᐊᒃᓴᖅ ᓴᓇᕝᕕᖕᒥᖕᓂ, ᑖᒃᑯᐊ ᐃᓱᒪᒋᔭᐅᓇᔭᖅᐸᑦ ᑕᒪᓐᓇ ᐃᖅᑲᓇᐃᔭᕐᕕᖕᒥ ᐃᓄᒃᑎᑐᑦ ᐅᖃᓪᓚᖃᑦᑕᕆᐊᒃᓴᖅ ᐊᑐᓕᖅᑎᑕᐅᓇᓕᖅᑎᓪᓗᒍ ᐅᕝᕙᓘᓐᓃᑦ ᖃᓄᖅᑑᕈᑕᐅᓂᐊᖅᐸ ᖃᓄᑦᑎᐊᕚᓗᒃ ᐋᖅᑭᒃᓯᒪᑎᑕᐅᔪᓐᓇᕐᓂᐊᕐᒪᖕᒑᑦ?
ᐊᒡᕕᐊᖅᑯᑕᐅᓂᐊᖅᑐᑦ ᑐᒡᓕᕆᖅᑰᔨᔭᖓᑦ ᐅᓇᐅᕗᖅ, ᐃᖅᑲᓇᐃᔮᑦ ᐃᓇᖏᑦ ᐊᑯᓂᐸᓗᕈᓗᒃ ᓱᓕ ᖃᓪᓗᓈᓂᖖᒑᖅᓯᒪᔪᑦ ᐃᖅᑲᓇᐃᔮᖑᔭᕆᐊᖃᕐᓂᐊᖅᑰᕐᒪᑕ ᐃᓄᒃᑑᕈᓐᓇᖅᑐᓂᒃ ᐃᓕᓯᒪᔪᖃᓕᓚᐅᖅᑎᓐᓇᒍ ᓄᓇᕗᒻᒥ. ᐃᓄᐃᑦ ᐅᖃᐅᓯᖓᑦ ᐃᖅᑲᓇᐃᔭᕐᕕᖕᒥ ᐅᖃᐅᓯᓪᓗᐊᑕᕆᔭᐅᓂᐊᖅᐸᑦ ᐃᓄᒃᑎᑐᑦ ᐅᖃᕆᐅᓴᑎᑕᐅᖃᑦᑕᕆᐊᖃᕐᓂᐊᖅᐳᑦ ᐃᓄᒃᑐᑦ ᐅᖃᕈᓐᓇᙳᑦᑐᑦ.
ᑕᒪᓐᓇ ᐱᔭᕆᐊᑭᑦᑐᑯᓘᔾᔮᙳᑦᑐᖅ. ᖃᓪᓗᓇᐅᔭᖅᐸᒃᑐᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᖁᑎᒋᔭᐅᔪᑦ ᐅᐃᕖᑎᑐᑦ ᐃᓕᑦᑎᒡᒐᖃᑦᑕᕐᒪᑕ. ᐅᐃᕖᓪᓗ ᐅᖃᐅᓯᖓᑦ ᐃᓕᑕᕐᓂᕐᓂᖅᓴᐅᓂᕋᖅᑕᐅᓪᓗᓂ ᐃᓄᐃᑦ ᐅᖃᐅᓯᖓᓐᓂᐅᖓᓂᑦ.
ᐃᒻᒪᖄ ᐃᒫᒃ ᐋᖅᑭᐅᒪᓂᖃᖅᑐᓕᐅᕈᓐᓇᖅᐳᑦ ᐃᓄᐃᑦ ᐅᖃᐅᓯᖓᑦ ᐃᖅᑲᓇᐃᔭᖅᑎᓄᑦ ᐃᓄᒃᑎᑐᑦ ᐊᔪᙳᑉᐸᒌᖅᑐᓄᑦ ᐊᑐᖅᑕᐅᓂᖅᓴᐅᖃᑦᑕᓕᕋᔭᖅᐸᑦ ᑐᓵᔭᐅᓂᖅᓴᐅᕙᓕᕐᓗᓂ ᐊᒻᒪᓗ ᐅᖃᓐᓇᖅᐸᒌᙳᑦᑐᑦ ᐋᖅᑭᒪᓂᖃᑦᑎᐊᖅᑐᒥᒃ ᐃᓕᓐᓂᐊᒐᒃᓴᓕᕈᔭᐅᓇᔭᕈᑎᒃ. ᐃᓄᒃᑎᑐᑦ ᓂᓪᓕᖅᑐᖃᐅᖅᑕᕐᓂᖅᓴᐅᓇᔭᖅᐳᖅ ᑖᒃᑯᐊ ᐊᔪᕈᓐᓕᖅᐸᓪᓕᐊᔭᐅᔪᑦ ᐊᑐᖅᑕᐅᑦᑕᕐᓂᖅᓴᐅᓇᓱᒡᓗᑎᒃ. ᐅᓄᖅᓯᕙᓪᓕᐊᓇᔭᖅᐳᑦ ᐃᓄᒃᑐᑦ ᐅᖃᕈᓐᓇᙳᓚᐅᖅᑑᒐᓗᐊᑦ ᐃᓄᒃᑐᑦ ᐅᖃᕋᓱᖕᓂᖅᓴᐅᖃᑦᑕᓕᕐᓗᑎᒃ ᖃᓪᓗᓇᐅᔭᕆᐊᖃᓕᓚᐅᖅᑳᕋᑎᒃ ᐃᓚᖏᓪᓘᓐᓕᑦ ᐃᓄᒃᑎᑐᑦ ᐅᖃᒪᔭᖃᑦᑕᓕᕈᓐᓇᓯᓇᔭᖅᖢᑎᒃ.
ᐅᖃᐅᓯᕐᓗ ᐃᓕᖅᑯᓯᕐᓗ ᓯᕗᓂᑦᑎᓐᓂ
ᑕᕝᕙ ᒫᓐᓇᒃᑯᑦ ᒫᓕᑉᐳᒍᑦ ᓯᕗᓂᒃᓴᕗᑦ ᐊᒡᒋᖅᑐᖅᑐᖅ ᐃᓱᒪᒃᓴᖅᓯᐅᕈᑎᒋᓪᓗᑎᒍᑦ. ᒪᕐᕈᓪᓗᐊᑕᐅᕘᒃ ᓯᕗᓂᒃᓴᑦᑎᓐᓂ ᓄᑖᖑᓪᓗᑎᒃ ᐱᒻᒪᕆᐅᓪᓗᑎᒡᓗ. ᓄᑖᒥᒃ ᓄᓇᕗᖃᕐᓂᐊᓕᕋᑦ. ᐊᕐᕌᒍᓪᓗ ᕼᐊᓐᓇᓚᐅᔪᑦ ᐱᒋᐊᕐᓂᐊᓕᕐᒪᑕ. ᓯᕗᓂᒃᓴᕗᑦ ᒫᓐᓇᒃᑯ ᐃᓱᒪᒋᓪᓗᑎᒍᑦ ᓂᕆᐅᓇᖅᑐᖁᑎᖃᕈᑎᒐᑦᑎᒍᑦ ᐃᓚᖓᒍᓪᓗ ᑯᒃᓴᓱᖕᓇᖅᑐᖅᑕᖃᐅᕆᓪᓗᓂ. ᑕᐅᑐᙳᐊᖅᑕᖃᖅᑎᓪᓗᑕ ᓄᓇᕗᑦ ᖃᓄᐃᓕᖓᓕᕋᔭᕐᒪᖕᒑᑦ 2099ᒥ ᑕᑯᑎᑕᐅᔪᒪᓇᔭᖅᑰᖅᐱᑕ ᖃᓄᐃᑦᑑᓪᓚᑦᑖᕋᔭᕐᒪᖕᒑᑦ? ᑕᑯᑎᑕᐅᓇᔭᕈᑦᑕ ᑕᑯᓇᔭᖅᑰᖅᐱᑕ ᐊᖏᕐᕋᕆᔭᐅᔪᓂ ᐃᓄᒃᑎᑐᑦ ᐅᖃᓪᓗᕆᒃᓴᑲᑕᒃᑐᓂᒃ, ᑎᑎᕋᕐᕕᖕᓂᓗ ᐅᖃᐅᓯᓪᓗᐊᑕᕆᔭᐅᓗᓂ, ᐃᓕᖅᑯᓯᕆᔭᓇᔭᖅᐸ ᐊᑐᖅᑎᑕᐅᓗᓂ ᐅᖃᓕᒫᒐᕐᓂ ᑎᑕᐅᓯᕐᓂᓗ ᐃᒃᐱᒋᔭᑦᑎᓐᓂᒃ ᓴᖅᑭᑎᔪᑎᒋᔪᓐᓇᕐᓗᒍ ᐃᓅᓯᕆᔭᑦᑕ ᒥᒃᓵᓄᑦ?. ᒫᓐᓇᒃᑯᑦ ᑕᐃᒪᐃᓕᖓᔪᒥᓇᖅᑐᒥᒃ ᓯᕗᓂᒃᓴᖃᖅᐳᒍᑦ. ᓂᕆᐅᒋᔭᖃᑦᑎᐊᓚᐅᖅᑕ ᐊᒃᓱᕈᕈᑎᒋᑦᑎᐊᓚᐅᕐᓚᕗᑦ ᓴᙳᓂᖃᖅᑎᑕᐅᔪᒪᓪᓗᑕ ᐱᑕᖃᖁᔨᓂᖃᑦᑎᐊᕐᓗᑕᓗ ᑖᓐᓇ ᓂᕆᐅᒋᔭᕗᑦ ᑕᐃᒪᓐᓇᐅᔪᓐᓇᕐᓂᐊᖁᓪᓗᒍ.
